كنيسة برمنجهام والأطفال.. كلاكيت المرة العاشرة

 "ومن أعثر أحد هؤلاء الصغار المؤمنين بي فخير له أن يعلق في عنقه حجر الرحى ويغرق في لجة البحر." (مت 18: 6).

قد تبدو لك أنها لعبة أطفال عادية يا عزيزي.. لكن انتظر المفاجأة...

كل يوم أحد أقعد أعبي شنطة مليانة لعب وأكل عشان بنتي ف الكنيسة تتلهي.

لأن طبعا كلنا عارفين إن الواحد بيروح كنيسة برمنجهام مش عارف الخناقة مع مين النهاردة عشان يكتموا العيال والأمهات.

الاسبوع اللي فات أرشيذياكون من العواجيز اللي بيشخطوا دول قال لناس يطلعوا بره بنتهم بس كانت "بتتحرك" ف مكانها.

المهم، بعد جولة الخناقة مع أحد الاكليروس من سنتين (انظر هنا)، بقيت أروح كل اسبوع معايا حاجات كتير متنوعة عن الاسبوع اللي قبله عشان بنتي تلعب بيها.

الاسبوع ده اخدت العربية دي.

فملوك النظام محبي الصلاة والهدوء والجو الروحاني، قديسين برية شيهيت، كواكب بستان الرهبان، انزعجوا من صوت عجل عربية الليجو المصورة أعلاه.

أه صدقني زمبقولك كدة، صوت عجل عربية لعبة تسبب في خناقة.

يعني المشكلة مش اننا مابنعملش قداسات للأطفال وبنكوم الناس ف قداس واحد فقط يوم الأحد؟ مش ف انعدام الافتقاد وقلة الخدمات وهروب الناس من الكنيسة وخصوصا الشباب؟ لا، المشكلة ف عجل عربية بنتي.

كنيسة فيها مئات الناس بيتعمل لهم قداس واحد يوم الأحد متكربسين في مكان كله سيراميك مفيش سجاد ولا كراسي خشب ولا حاجة بتمتص الصوت، المفروض العيال تقعد حاطة جزمة في بقها؟ النفس اللي هايطلع من كل فرد هايعمل صوت لأن الكنيسة مش مجهزة ومش متصممة صح. 

الكنيسة مسئوليتها تخدم العيال قبل الخناشير اللي عايزين الكنيسة ليهم هما بس وبيعملوا علينا شرطة مدرسية جوا الكنايس. الكنيسة كمان مسئوليتها ماتطردناش بره، مسئوليتها انها ماتزيحش الحاجات اللي مفروض يعملوها علينا. يعني لو الكنيسة مفروض تعمل قداس أطفال، مايجوش في قداس فيه ما لا يقل عن 100 طفل يقولوا أصل الكبار مش عارفين يصلوا (ياخي انشالله عنكم ما صليتم، ده انتوا ولا الكتبة والفريسيين).

طبعا ييجي الأشاوس يقولك ما العيال بتجري في الكنيسة، لا يا عزيزي، احنا مضروبين بالجزم في كنيسة برمنجهام والعيال بتقعد ساكتة فعلا. بس الكنيسة ميكروفوناتها واطية، وصدى الصوت بيرن. معرفش متوقين من العيال انها ماتقولش ماما مثلا لمدة ساعتين؟ مايقولوش ولا كلمة؟ مالكم يا جماعة انتوا ماكنتوش أطفال قبل كده ولا ايه؟

ييجي بعد كل ده قسيس يلوم الأمهات عشان العيال عاملة دوشة وهو مش شايف ان الدوشة جاية من الزحمة، قلة التجهزيات في المكان، سوء التصميم، سوء الخدمة، ضيق الصدور، قلة الأدب، وسوء الادارة. 

نهايته، هو الواحد مابقاش عارف يقول ايه غير انه يلعن اليوم اللي خلاه مضطر يروح كنيسة برمنجهام دي.

كفرتوا سيئاتنا ياخواننا. أشوفكم في لجة البحر بقى.

للمزيد من الصولات والجولات عن الموضوع ده، انظر الرابط ده عن كنيسة برمنجهام

Tweet

Follow @evronia

هل تسمح الكنيسة القبطية في أبو ظبي للأنبا موسى الأسود بالدخول؟

"لا يمكن إلا أن تأتي العثرات، ولكن ويل للذي تأتي بواسطته! خير له لو طوق عنقه بحجر رحى وطرح في البحر، من أن يعثر أحد هؤلاء الصغار ... وإن أخطأ إليك أخوك فوبخه" (لوقا 17)

الحقيقة ماتخيلتش اني هاكتب التدوينة دي في يوم من الأيام. أولاً، طاقة مهدرة لما الواحد يتكلم في سوء الاداريات في المؤسسة القبطية. ثانيا، أنا اصلا مش عايشة في أبو ظبي! لكن أحيانا في مشاكل الواحد مايقدرش مايشتبكش معاها، خصوصا لو انت جزء من المشكلة، وانت في مكان تاني من الكوكب. 

 ملخص المشكلة هو إن في صديقة من أصل اريتري نقلت أبو ظبي وهي كانت بتحضر معايا الكنيسة القبطية في انجلترا، ولما هي نقلت هناك حبت تحضر برضه الكنيسة القبطية. أنا اتواصلت مع أحد الكهنة من شهور وهو ادى رقمها للكنيسة الاريترية عشان تروح هناك مش القبطية. 

يوم الأحد 30 يونيو صديقتي بعتتلي انها اتمنعت من الدخول على باب الكنيسة وقالولها الكنيسة دي للمصريين بس، روحي شوفي الكنيسة بتاعتك. صديقتي استائت جدا، بس أنا اكتر! ومش حابة اتكلم عن المستوى الاجتماعي/المهني بتاعها لأن ده مش مفروض يكون جزء من النقاش!

قمت بعتت لاتنين من الكهنة، وفي واحد منهم ادى رقمي لشخص كبير سنا وبيعتبروه مسئول الأمور الادارية في الكنيسة، واتصل بيا بالتليفون لمدة نص ساعة.

ملخص المواضيع اللي باحاول فعلا ألاقي فيها اجابة مريحة، ان انت مش مرحب بيك هناك لو انت مش من الجالية القبطية. اتقاللي كلام كتير متضارب. في قسيس رد عليا كتابة على الواتساب وقاللي ما ملخصه إن "كل الجنسيات التانية ممنوعة وده التصريح اللي مع الكنيسة، حتى العاملات ممنوع"... واحنا عارفين كويس (وأي حد بيروح الكنايس هناك في الخليج) ان العاملات مش ممنوعين من الدخول. 

طيب ايه كمان اتقال؟ 

أي شخص غريب جاي لواحده الكنيسة ممنوع من الدخول. ليه؟

- مش هايفهم عربي فييجي عندنا ليه.

- لو دخل ممكن يسرق أو يطلب شغل لأنه الجنسية بتاعته 90% منها عاملات منزل.

- لو دخل عشان يحضر قداس بالانجليزي القسيس لازم يسأله فين شهادة المعمودية بتاعته لأن القداس للأقباط الأرثوذكس فقط.

- الكنيسة معهاش تصريح تستضيف أي جنسية لأنه التصريح للأقباط بس.

- الجنسيات غير الأقباط ممنوع.

- الكنيسة مش للزيارة ولا للسياحة.

- مفيش مكان لحد من بره، القاعة بتساع عدد معين بس.

- أنا لازم امنعه افرض هو مش مسيحي يعملي مشكلة؟ افرض انه ارهابي؟

- احنا من حقنا نوقفه نمنعه ع الباب، وهو لو عايز حد من المسئولين هو اللي يطلب، مش احنا اللي نطلع له.

- هو جاي عندنا ليه أصلا؟ ما يروح كنيسته، لازم نعرف مش عايز يروح كنيسته ليه.

- احنا بندي كنيسة للجاليات الارثوذكسية يصلوا فيها، يروح يصلي معاهم هناك.

- احنا بنعمل قداسات بالانجليزي للناس اللي متجوزة أجانب (طب يعني في جنسيات تانية بتدخل أهو، طب ندخل ازاي) - بس لازم الشخص يثبت مسيحيته!

في آخر الحوار مع الشخص الاداري، وبعد قيل وقال كتير مني ومنه وأنا رديت على كل الحجج اللي هو قالها، هو قاللي ان صديقتي ممكن تروح الكنيسة بتنسيق معاه (قاللي جزمتها فوق راسي، شكرا يا سيدي الفاضل)، بس الأول لازم تنسق معاه وهو يدخلها بس برضه لازم تثبت مسيحيتها! ولازم تقعد مع القسيس الأول، ولازم يعرفوا هي ليه مش عايزة تروح الكنيسة الاريترية! يعني موضوع المنع ده طلع حسب "المزاج" وحسب انت تعرف مين يوصلك بمين جوا الكنيسة.

وهنا ممكن نسأل شوية أسئلة مشروعة:

- لو الاجبار جاي من الدولة، ليه الكنايس المجاورة ليك (وأنا اديت للشخص اللي كلمني مثال على كنيسة خمسينية) بتسمح للجميع بالدخول بدون قيود؟ ولما انت نفسك بتعرف تسمح لجنسيات تانية تدخل تصلي القداس الانجليزي، يعني الاجبار مش من الدولة، صح؟ طب والكنايس القبطية في الامارات التانية بيدخلوا الناس عادي ولا أبو ظبي بس؟ ولو الاجبار مش من الدولة بس منك، انت مش شايف نفسك عنصري وبتقول كلام مش حقيقي؟

- ناس كتير من اللي بيحضروا في الخليج بيقولولي الجاليات الافريقية بتحضر عادي. الرد انهم بيحضروا كعاملات مش كأفراد مستقلين. يعني هل الكلام اللي اتقاللي ده حقيقي؟ الكلام ده جالي من مسئولين الكنيسة، ومن قسوس، يعني المفروض ده الرد الرسمي للكنيسة. فهل الممارسة تجب القواعد ولا القواعد تجب الممارسة؟

- ازاي دولة فيها جنسيات كتير زي الإمارات تعمل قانون أو قاعدة لدور العبادة مبني على التفرقة العنصرية؟ مش منطقي ان الدولة تقول للكنيسة الجالية المصرية فقط هي اللي من حقها تستخدم المبنى ده، لأن ده بيخلي الدولة تحت طائلة القانون الدولي اللي بيمنع التفرقة بناء على اللون والجنس الخ. اذا انت مباشرة "بتتبلى" على الدولة اللي "مضايفاك" وبتعاملك كويس ومدياك أرض وكنيسة الخ، ايه مصلحتك في ده؟ وليه مش شايف ان الدولة ممكن تزعل من كلامك ده عليهم؟ وإيه السبب الحقيقي لقفلك الكنيسة على جاليتك اللي انت مش بتجاهر بيه واخترت تجيب اللوم على الدولة؟

- فين الخط الفاصل بين حماية نفسك كمؤسسة دينية في بلد انت مهاجر فيها، وبين ممارستك لتعاليم المحبة والأخوة؟ الحقيقة اننا بنختار نريح دماغنا ومانواجهش المشاكل، بنختار المنع قصاد الحوار والترحيب بالغريب. يعني هي الكنايس في مصر مش بتواجه نفس المشاكل؟ عمر ما حد قال لحد وريني شهادة معموديتك قبل ما أدخلك أناولك؟ ما طول عمرنا بنروح كنايس في كل مكان في العالم ماسمعناش قسيس بيقول لحد انت متعمد فين!

- هل من حق الشخص يختار هو يحضر في انهي كنيسة وبأنهي لغة؟ أيوة. خصوصا لأن التوازن في جاليات معينة مش موجود، يعني جالية مافهاش أطفال مثلا (لأن أيوة معظمهم عاملات سايبين أطفالهم في بلدهم) فمفيش مدارس أحد.

- هل أنا من حقي أنشر الكلام ده على الملأ؟ تماما وضروري كمان. احنا ازاي وصلنا للمرحلة دي وإن العنصرية يعتبرها الأجيال الكبيرة دي نوع من أنواع النظام؟ ده احنا كده بنمارس عبودية رسمية مش حتى عبودية حديثة!

- أنا ككنيسة مثلت ايه في العالم لو دي القواعد اللي ماشيين عليها؟ أنا مؤسسة منغلقة على ذاتي باخدم اللي شبهي وأمشي تحت الحيط. أنا كنيسة بتخدم ال 99 خروف، والخروف الباقي ده يتصرف، أنا ماليش دعوة بيه.

- هل لو الأنبا موسى الأسود حاول يدخل كنيسة أبو ظبي النهاردة هايدخلوه؟ أكيد لا، ياريت يجيب شهادة معمودية الأول. أو ممكن يجيب واسطة؟

في حاجة أخيرة عايزة اشرحها وهو معيار قانوني بيحددوا بيه العنصرية في المواقف المختلفة. المعيار هو: لو انت شلت الشخص اللي حصلت معاه المشكلة وحطيت شخص تاني مختلف، هل هاتحصل معاه نفس المشكلة؟ 

كل سنة وانتم طيبين بمناسبة عيد الأنبا موسى الأسود. ربنا يزيدكم من ازدواجية المعايير كمان وكمان.

Tweet

Follow @evronia

Inside the church, everyone is looking at the crying child

 Inside the church, everyone is looking at the crying child.

While no one is looking at the overcrowded space, inadequate number of services, bad acoustics, unattractive voices or length of service.

Everyone is looking at the mother..
No one is looking at themselves..

Photo: Birmingham Coptic Orthodox church 1 October 2023.

Context:
https://www.evronia.com/2023/04/blog-post.html 

For more on Birmingham Coptic Church blog posts, please visit this link.

Tweet

Follow @evronia

غرف الأطفال الزجاجية بالكنائس، وما عليها!ـ

"من أفواه الأطفال والرضع أسست حمدا بسبب أضدادك، لتسكيت عدو ومنتقم" - مزمور 8: 2

الكراي رووم، أو غرفة البكاء، هكذا يسمونها..

لم أجد ما "لها"، فقط ما "عليها"، فأنا أكرهها منذ أن كنت طفلة لم تجلس بهذه الغرف قط، لكن كنت أراها في العديد من الكنائس وأضحك أنا وأسرتي على هذه الفكرة التي تحقر من الأطفال.

أنشأت كنيستي في الاسكندرية في الصغر قداسا للأطفال، كنت أحضره ولكن لم أُمنع قط من خدمات الـ"كبار"، حتى صرت كبيرة وتم منعي وأنا كبيرة خارج مصر!

source: https://shorturl.at/gioJY

 تتعرض الأسر في العديد من الكنائس المسيحية لهذا العزل الذي يطالب الأسر (يأمرهم فقط في حالة الكنائس المصرية)، والأمهات بالأخص، أن يجلسوا في حجرات "المنفى" الزجاجية:

"Dear all

For parents who have children under the age of 3 (or older,) who won't be able to tolerate long church services over the coming 3 days, the Church is kindly asking you to be seated in the glass room on the top floor in the Cathedral. An usher will be standing by the elevator with a fob so parents with push chairs and heavy bags can use the elevator to go to the top floor. 

The screen and mic in the glass room are working perfectly so parents can still follow all church services."

_________

تحديث بتاريخ فبراير 2024 لشرح الأحداث التي تلت هذه الرسالة. في عيد القيامة عام 2023، كانت هناك تعليمات في القداس معطاه من أحد الكهنة بكنيسة برمنجهام التابعة لايبارشية وسط انجلترا، لمنع دخول السيدات ذوي الأطفال الصغار الكنيسة وخروجهم فور وصولهم للجلوس في ال"كراي روم". لقد تحديت من أرادوا اخراجي من الكنيسة في ذلك اليوم وطلبت "حد كبير" أتكلم معاه، فخرج الكاهن لنشتبك بالصوت العالي خارج الكنيسة وقال لي "يعني أنا أعمل لكم ايه". 

دخل بعدها الكاهن لصحن الكنيسة ووقف على المنجلية وأمسك بالميكروفون وأشار لبعض السيدات اللواتي كان معهن أطفال بالخروج ليتساوى الجميع في "الطرد". ثم بعد قليل، صعد للغرفة الزجاجية واعتذر لي على انفراد اعتذرا غير مقبولا من طرفي لأنني وصية على طفل أهم مني ومنه أمام الله، ولم يقل هذا الكاهن أو يسمح لأي من السيدات والأطفال بالدخول مرة ثانية لقداس العيد في الكنيسة، فهو لم يتراجع عن قراره. 

أضفت هذه التفاصيل لأن هذا الكاهن حتى يومنا هذا وبعد الكثير من المشاكل مع الأطفال والأمهات، مازال يتحدى وجود الأطفال بالكنيسة ويقوم بعمل وقفات صامتة لثوان في صلاة القداس حال سماعه صوت أي طفل. نجلس في الكنيسة كأننا في امتحان، فهو شخص لا يحب السيدات والأطفال بشكل واضح. ينظر شزرا وينتهر كأول رد فعل حتى وهو يقدم التناول، ثم يذهب لالتقاط الصور مع أطفال مدارس الأحد ليبرز عن نفسه صورة محب الأطفال. وأنا كرد مني على هذه المعاملة المستمرة، وكرد على سؤاله "وأنا أعمل لكم ايه"، كتبت له وعنه ولكل كارهي النساء والأطفال هذا المقال.

_________

 أكتب هنا أموراً خاصة بالمكان الذي تم طردي منه، لا أريد مناقشة تفاصيل أحداثه، لكن أريد مناقشة ما ورائه، وكيف يتم الاستفاده من هذا الموقف في صالح الأسر في شتى الكنائس.

بما أن الكنيسة أرسلت رسالة تطلب من جميع الأمهات ذوي الأطفال عدم التواجد في صحن الكنيسة الرئيسي والخروج للمدرج، فقام العديد من القائمين على الخدمة بالصياح في السيدات يوم قداس عيد القيامة لتخرج سيدات معهن أطفال رضع للمدرج غصبا وفور وصولهن للكنيسة حتى بدون أن يفتح الطفل فمه.

أناقش الموضوع من عدة نواحي، أملاً في وجود حل لائق، لأن وجود الغرف العازلة يتسبب في اشكاليات عدة. يمكنكم دائما تطبيق هذه الأفكار على الكنيسة الخاصة بكم حسب الدولة ووضع "الغرفة" تلك...

1- الجانب القانوني: في قانون المساواة رقم 2010 للمملكة المتحدة، يمنع التمييز ضد الأشخاص بسبب سنهم، أي أن ليس من حق المؤسسات العامة (كالطائرات، المولات، الخ) منع تواجد الأطفال في الأماكن العامة إلا في حالة تقديم خدمات (كالخدمات الكحولية) التي تتطلب منع تواجد الأطفال لحماية الطفل نفسه.

ابحث في قوانين دولة كنيستك عن القوانين التي تحمي الطفل وتواجده، وقوانين التمييز. 

2- الجانب الاجتماعي واللياقة: يبدو أن أمر الكنيسة بعدم تواجد الأطفال في صحن الكنيسة أعطى اشارة غير رسمية للشعب بممارسة السلطة على بعضهم البعض، ففي قداس الأحد التالي لعيد القيامة قام أحد الحاضرين بالقداس بطرد أحد الأباء وابنته ذات العام الواحد، والذين لم يمض على تواجدهم بالمدينة أكثر من بضعة أسابيع، وانتهار العديد من الأطفال الحاضرين وكانوا يجلسون في أواخر الصفوف. كذلك يقوم العديد من الشمامسة بممارسة تلك السلطة بالنظر والفعل لانتهار أي أم يبكي رضيعها للحظات لكي يخرجوا خارجا.

هذا إلي جانب أن الحجرة التي يتطلب من الأمهات الجلوس فيها هي حجرة غير مجهزة بكراسي، سماعات أو شاشات تعمل (بعكس الكلام الذي تم ارساله)، تهوية، سجاد، أو أي تجهيزات للأطفال. بل تحولت الحجرة إلي مكان يذهب إليه الأطفال الكبار للعب والجري بعيدا عن أهاليهم الجالسين بصحن الكنيسة، بالتالي فهو ليس مكان للصلاة لأي أم معها طفل رضيع أو أسرة تريد متابعة الصلاة. يجب أن نفرق تماما بين الأماكن المخصصة للصلاة، والحجرات التي يذهب إليها الأطفال الكبار للعب مثل "الحوش". فما ذنب أم معها طفل رضيع أن تخرج إلي هذا المكان جبرا ومنعها من الصلاة؟ هل هي معاقبة الأمهات والعائلات؟ ليس هكذا تتعامل باقي الكنائس "الأجنبية" مع الأطفال، بل يرحبون جدا بتواجد الأطفال وبجريهم، لعبهم وحتى أصواتهم، ويطلبون من المتضررين من ذلك الذهاب لتلك الحجرة! 

أن تتواجد الأسرة بحجرة ما أو خارج الكنيسة ليراعوا ظروف طفلهم هو أمر يجب أن يخضع لكل أسرة وتقديرها، وليس بالاجبار. أن تكون الحجرة موجودة لمساندة العائلات هذا حل، لكن لا يجب أن يصبح الحل سلاحا ضد الأسر وتواجدها في الكنيسة. الكنيسة الكاثوليكية تم انتقادها مرارا وتكرارا بسبب هذا الغرف لمجرد انها "اختيارية"، فما بالك بالاجبار؟

ثم دعني أسألك عزيزي، من يتحدث بالكنيسة ويتسبب بالضوضاء؟ أليس هم الكبار أيضا؟ الشمامسة في جميع المناسبات دائمي الكلام، والسيدات، والشباب، اذا الأطفال ليسوا هم من يضرونك.

3- الجانب الخاص بالصحة والسلامة العامة: المصعد الخاص بالمدرج حاليا (في المكان الذي أتحدث عنه) يخل تشغيله بالمعايير العامة للأمن والسلامة وذلك بناء على كلام القائمين على "خروج الأطفال والسيدات" يوم عيد القيامة، مما يجعله غير آمنا لاستخدامه للأطفال والرضع بالأخص! التهوية السيئة تجعل المكان لا يطاق، وقد يتسبب في سخونة شديدة تضر الأطفال خاصة وقت الزحام. انها حجرة "صوبة زجاجية" كما نعلمها!

اسأل القائمين على كنيستك: هل تلتزم الكنيسة، في المكان الخاص بك، بمعايير الأمن والسلامة لحماية الأطفال؟

 

4- الجانب الديني: وهو الأهم، والأشمل، أين المحبة واللياقة في التعامل مع الأمور؟ إلي من ندع الأولاد "يأتون .. ولا تمنعوهم"؟ وصية المسيح واضحة، بدون استثناءات، بدون ظروف، ولا تحفظات. ماذا تعكس تصرفات مثل تلك عنا كشعب كنسي مسيحي؟ أننا مع التمييز ضد النساء والأطفال؟ أننا لا نريد الأطفال؟ أننا نكره أطفالنا؟ أننا نكره الأسر التي تتحمل أعباء كبيرة لمجرد القدوم للكنيسة من مسافات بعيدة، حتى وبمجرد وصولهم نطلب منهم التواجد في مكان معين دون الآخر لكي يصلي "الآخرون" بسلام؟ وماذا يقولون وهم يصلون، أنهم مثل المرائين والفريسيين الذين يحبون العبادة المظهرية ويحملون الناس أحمالا عسرة؟ 

ما هي الرسالة المسيحية التي نوجهها ككنيسة للعائلات باقتصار التواجد في صحن الكنيسة للرجال والسيدات دون الأطفال؟ ثم متى يتعلم الطفل الصلاة والتسبيح إذا كان مطرودا دائما مع أهله خارج صحن الكنيسة في مكان غير آدمي؟ هل جربنا أن نجعل القداسات والتسابيح مناسبة للأطفال الكبار مع توفير كتب ووسائل ايضاح  يحبونها فيمتنعون عن الضوضاء التي يشتكي منها الأقلية، كأنهم لم يكونوا هم نفسهم أطفالا يوما ما؟ هل وفرنا جو محب وميسر لأسرة جديدة معها رضيع لكي يحبون التواجد في الكنيسة لتكون بيتهم الثاني، بل والأول بالأحرى؟ هل جربنا أن نصلي معا بمحبة دون النظر وتوجيه الإدانة لآخرين لا نعلم معاناتهم ولا ظروفهم؟

نهايته: على المتضرر من وجود أطفال بصحن الكنيسة أن يخرج هو للجلوس في حجرة "المنفى" تلك، وفي حالة الحديث غير اللائق مع أي أم/أب/طفل، لا يوجد على الأسر حرج في اتخاذ إجراءات تستلزم وقف المعتدي عند حده في حدود القوانين الكنسية والمدنية المعطاة لنا. 

أن تتحدث عن اهمال الأمهات أو تطالب الأمهات بتسكيت أطفالها فأنت بهذا تترك كل المشاكل التي يتحدث عنها المقال لتتحول لشرطي يدين الأمهات بطريقة دنئية، وبطريقة "بص العصفورة" لدفن راسك في الرمال بعيدا عن مشاكل التمييز التي طالما تعرض لها الأطفال والنساء في الكنائس، ومشاكل التعليم والأصوات المنفرة وقلة الاهتمام التي تجعل الأطفال (الكبار وليسوا الرضع) يفقدون اهتمامهم بالكنيسة.

على كل حال، اذا تضايقت عزيزي من ضوضاء الأطفال، اذهب لغرفة الصوبة "للتأمل" بدلا من جعلها غرفة للأطفال. استخدموها إذا كغرفة للتركيز، الخلوة، أي شيء، إنما الأطفال مكانها الكنيسة فقط. 

من حق الأسر ذوي الأطفال التواجد كما يريدون في الوقت والمكان الذي يريدونه، هذا حق اجتماعي، قانوني ومسيحي، وليس من حقك طردهم أو تحديد تواجدهم في مكان دون آخر.

أن نشترك مع الله في عمل الخلقة هو أمر مقدس للأسر المسيحية لا يستوجب العقاب بهذه الطريقة. كلنا كنا أطفالاً يوما ما، لم نولد كبارا، ولم نُعطى سلطة إلا من الله، فلا يجب أن نمارسها لقمع بعضنا البعض.

المستقبل للأطفال، وليس للسلطة على الأطفال. 

دمتم في محبة الله التي تعطي بسخاء ولا تعير.

ولا عزاء لكارهي حرية التعبير عن الرأي.

--

ملحوظة: شكر وعرفان للعديد من الأمهات اللواتي قمن بإثراء الموضوع بتعليقاتهن التي دمجتها في المقال.

--

للمزيد من الكتابات عن كنيسة برمنجهام، انظر هذا الرابط.

Tweet

Follow @evronia

العنصرية والسلطوية في خطاب الاكليروس القبطي عن السيدات

في مقال سابق ليا علقت بالتفصيل والتفصيص على كلام للقمص بولس جورج عن جواز الصالونات، واللي أهان فيه الستات اللي بترفض جواز الصالونات بقوله انها هاتتنقل من "الفاترينة للتحنيطة".

تخيلت الموضوع هايقف لحد كده، لكن يبدو ان مع انتشار السوشيال ميديا، ظهر بعض الاكليروس باستمرار يتحفونا بآراء عنصرية وسلطوية عن الستات.

العنصرية هنا هي الsexism وده معناه انك بتعامل الستات بطريقة مختلفة أو متدنية لمجرد كونهم ستات. زي مثلا انك تبقى شايف ان الستات مابتعرفش تسوق، دي حاجة sexist ومالهاش دليل من الصحة في الواقع لمجرد ان جارتك مش بتعرف تركن العربية، بينما كل التريلات والميكروباصات اللي بتعمل حوادث سايقها رجالة.

السلطوية بقى هي انك تبقى شايف ان من حقك تفرض حاجة معينة على الستات وإن رأيك قانون أو ملزم، وتقدر تتحكم فيهم، وده بيتضمن سلوك فوقي كشخص بيصدر نفسه انه بيفهم عن اللي قدامه من غير ما يحترم خبرات اللي قدامه وفكره.

مثال رقم 1:

بنلاقي القمص بولس جورج بيدلي بدلوه عن الستات مرة تانية، وبيهرج انه لو الست سألت الراجل على العيوب اللي فيها، الراجل لازم يكذب عليها ومايقولش أي حاجة، وضحك وقهقهة لأن طبعا الستات مفترية وممكن تتهور على الرجالة.

ايه مشكلة الخطاب ده؟

في مجتمعات فيها نسبة العنف الأسري (لفظي وجسدي) عالية، والبابا تواضروس بيشتغل في مواضيع تخص العنف ضد المرأة فعلا، هل التريقة على الستات بانها مفترية على الرجالة أصلا منطقي؟ هل ده ممكن يشجع الرجالة انها تمارس عنف أكتر على الستات بحجة انهم "مفتريات" وده بشهادة أبونا طبعا؟

في مقالة بحبها قوي في الموضوع ده عن تنميط الهزار عن الستات، وازاي الهزار ده بيرسخ النمط عن الستات وبيوصل لنتايج مؤذية قوي على مستوى أكبر في المجتمع. المقالة بتشرح اسلوب استخدام النكت اللي بتقلل من شأن الستات، واسمها disparagement humor أو فكاهة الاستخفاف اللي بتخلي المجتمع شوية بشوية يحول العنصرية ضد الستات لحاجة مقبولة في المجتمع، وده بيؤدي لتحامل وظلم بيتحمل نتيجته الستات (أو المجموعة اللي بيتم السخرية منها عمال على بطال).

وهانطبق ده على الفيديو السابق بتاع القمص بولس عن الستات: انت بتستخف بطريقة الستات في كلامها مع جوزها وبتقوله يعني ما معناه انك تاخدها على قد عقلها ومشي امورك معاها، فانت بكل الطرق بتقول للراجل يحقر من كلام مراته عشان هي "خُـلَـل" ودي أحد الأنماط عن الستات "دولا مجانيين"...ده طبعا بدل ما جوزها يسمعها ويشوف هي ليه بتقول الكلام ده، هل في حاجة هو يقدر يساندها فيها؟ هل في حاجة هي عايزة توصلها بالكلام ده بس مش عارفة تقولها ازاي؟ فين الكلام عن النقاش المفتوح اللي مفروض يكون وسيلة تواصل طول الوقت بين الست وجوزها؟ فين الكلام عن أهمية احتضان كل واحد للتاني والاعتراف بالمشاكل اللي بيوجهها الآخلا أو ال insecurities اللي بتخليه يسأل اللي قدامه أسئلة زي "ايه العيوب اللي انت شايفها فيا"؟

طبعا هاييجي حد يقولي انتي بتكبري المواضيع ويعني انتي مش عايزانا نضحك يعني؟ لا مش عايزاكم تضحكوا، لو هاتضحكوا ع الستات، بالأولى تضحكوا على خيبتكم، ياكش انشالله عن ما حد ضحك اساسا لو الستات هاتبقى هي المادة بتاعة السخرية، واللي رجال الكنيسة الأجلاء مافكروش للحظة يوقفوا ده لكن كملوا وتمادوا فيه تاني وتاني.

مثال رقم 2:

فاجئنا من يومين القمص مكاريوس ساويرس ببوست على فيسبوك (كاهن بالولايات المتحدة!) بيطلب فيه الستات انها "لا تخطىء" وتعمل أعمال منزلية في اسبوع الآلام ولا تعمل أكل ولا زينة للعيد ولازم تخلص كل حاجة قبل أحد الشعانين عشان تتفرغ للعبادة في اسبوع الآلام.

المشكلة في اللي اتكتب مركبة جدا، لدرجة اني كل ماحاول افككها من ناحية، تضرب من ناحية تانية.الكاتب هنا ماستخدمش اسلوب السخرية، لكن استخدم اسلوب النهي عن المنكر، وحدد ايه هو المنكر، وقال انه خطيئة و"اساءة" للمسيح ان الستات تعمل الأعمال المنزلية في اسبوع الآلام. 

أولا ده فكر مش مسيحي ولنا في مريم ومرثا خبرة وعبرة. ممكن جدا الانسان يسبح ربنا في كل وقت وفي كل عمل، بل ان اكبر تمجيد لاسم ربنا بيكون ان الانسان يكون نور في العالم. ولو ماحدش عمل أكل العيد، يوم العيد هاتاكلوا زلط يعني ولا ايه؟ أنا فاكرة السنة اللي فاتت مكانش في حضور في الكنيسة وكنت باعمل مكرونة بشاميل وانا باسمع أبوغالمسيس، كفرنا؟ أخطأنا؟ أسئنا إلي اسم المسيح؟ لا. ولا بالفم المليان كمان. البابا شنودة في قصيدة مريم ومرثا بيقول: "دخلت البيت لا مرثا في ساحته ولا مريم، فمن للرب في البيت، وكيف اذا أتى يخدم؟" اذا، كلنا محتاجين نؤدي أعمالنا الدنيوية عشان نعيش.

ثانيا الاسلوب غير مناسب وغير مسيحي. طريقة الانتهار والسلطوية دي مش اللي استخدمها المسيح. بالعكس، المسيح كان لطيف، بينصح، بيرشد، بيقترح، ولما كان بيجيب آخره مع الخطاه كان بيطردهم من الهيكل. اذا معرفة استخدام انهي اسلوب للكلام في انهي وقت هو فن. فكان مثلا ممكن الكاهن يقول "ياريت يا جماعة نركز في عباداتنا في اسبوع الآلام وماننشغلش بالأرضيات كتير، فده وقت مبارك لينا كلنا ونحاول ناخد بركته، وحتى لو بتشتغلوا، اتأكدوا انكم بتسمعوا البصخة كل يوم وتقروا القراءات". ايه بقى العيب في اللي أنا قلته؟ ولا حاجة، أعدنا صياغة المطلوب بطريقة مسيحية مناسبة بتعبر عن الرسالة من غير ما تثير حفيظة أي مجموعة من الناس أو تخصهم بالكلام. 

ثالثا الكلام مش منطقي خصوصا في ظروف الحياة الحالية، نستقيل من أشغالنا؟ نسيب عيالنا تجوع؟ نرمي التزاماتنا في الزبالة؟ نبقى ناس غير مسئولة ولا يعتمد عليها ونقول لأي حد عايز حاجة "تعالى بعد العيد"؟ طب ما بالأولى الاكليروس بقى يتفرغوا للعبادات في الصوم الكبير ويسيبوا الفيسبوك؟

رابعا الكلام عنصري، فهو بيخصص كلامه للستات، وبيحملهم أحمالا عسيرة، وبيخصصهم في شغل البيت. شغل البيت من امتى بقى مسئولية الستات بس؟ ما لو الرجالة مدت ايدها اللي عليها نقش الحنة، مكانتش الستات مدعوكة ليل نهار في "الاعمال المنزلية اللي بتسيء للمسيح" وكان كله بقى عنده وقت يحضر الكنيسة ويصلي في اسبوع الآلام، ولا ايه؟ ده بدل ما نشكر الستات اللي بتدفع وقتها وصحتها وراحتها والكاريير بتاعها وبتشتغل خدامة ليل ونهار مقابل تنضيف هدومكم وبيوتكم يا رجالة؟ وعلى الرغم من كل الأعباء، مين اللي صفوفه مليانة أول ناس في الكنيسة؟ الستات. مين اللي بييجي متأخر والستات بتصحيهم بالموبايل في نص الصلاة؟ الرجالة. مين اللي بيلبس عيالهم شمامسة وشيل لهم التواني؟ الستات اللي مش من حقهم يبقوا شمامسة.

أحد الاصدقاء قرر يعمل الصورة دي للرد على البوست الأصلي، لكن السلطوية ممكن تمتد كمان لاقصاء المعارضين ومسح التعليقات فلقينا في اقل من 12 ساعة الصورة اللي تحت دي اتمسحت مع بعض التعليقات كمان، وده اللي اضطرني آسفة اني اضيع وقت شغلي وعبادتي عشان أكتب رد مطول على المهازل اللي بنشوفها يوميا.

اذا فالملخص هو:

لقد هرمنا ياخواننا.. 

الاكليروس القبطي لازم يتكلم عن الستات بروح المسيحية مش بالطريقة دي. بس للأسف الاكليروس هما رجالة المجتمع، ولو المجتمع ذكوري ف الحداية مش هاتحدف كتاكيت، والرجالة الناتجة مش هاتكون أقل ذكورية وسلطوية. إذا ايه الحل؟

لو سألتني إيه الحل أقولك ياريت نسكت وبلاش نشر للعثرة دي والكلام بالاسلوب ده على المنابر التقنية والكنسية، خلي افكاركم المضطربة جوا دماغكم لحد ما ييجي الوقت والأشخاص اللي تعرف تحترم الستات وتتكلم عنها بذوق وباسلوب مسيحي لائق. هل مثلا سمعتوا وعظة أبونا بيشوي سلامة المتميزة (الكاهن الأول في الكنيسة القبطية على مستوى العالم اللي بيساند مشاكل الستات بقوة وجرأة واحترام) عن مشاكل تهميش السيدات في الكنيسة وازاي نحاربها؟

في الأول والآخر، الراجل المميز بيبقى اكليروس مميز، الراجل الذكوري بيبقى اكليروس ذكوري... الرتب الكهنوتية مش بتغير من طبيعة الانسان، والانسان هو اللي بإيده بيعلي من شأن كهنوت ملكيصادق وهارون، أو بيخفس بيه الأرض. 

إذا، ياريت نعلي شوية من شأن الكهنوت من خلال تقديم كامل احترامنا للستات في كل مكان وزمان: قولاً وفعلاً وإيماناً.

Tweet

Follow @evronia

معضلة القبطي والألحان اللي مزعلة الناس من زمان

معضلة القبطي والألحان اللي مزعلة الناس من زمان

هانقسم معضلة القبطي والألحان إلي نقطتين:

1 - مظهرية العبادة والمنظرة في الميكروفونات

الشمامسة عندهم مشكلة والمشكلة دي مش عشان الألحان، دي مشكلة داخلية في رغبة المجموعات دي في الظهور والجعير والنشاذ، لدرجة إن اللي بيصلي بروحانية بقى هو ده المتفرد فيهم لأن العادي بقى إن كل من اقترب من الميكروفون فهو اقترب لينفرنا.

بالتالي المشكلة عند الشمامسة أكبر بكتير من الألحان والقبطي، دول لو جابولهم يقولوا ترنيمة "ما أحلى أن نجتمع معا" هايفضلوا برضه يحطوا عُرب في اللحن وماحدش هايعرف يقول معاهم وهايصحوا الميتين اللي تحت الأرض.

ياما اتكلمنا إن الشمامسة محتاجين تدريب صوت وأداء، إلي جانب حزم شديد في مين اللي يمسك الميكروفون عشان مايطرشناش، يعني الميكروفون مش مجاملة، مش واسطة، مش منظرة.

احنا بنحب العبادة المظهرية والظهور ودي المشكلة، مش المشكلة في الألحان.

أنا كنت بافرغ شرايط صلاة من التمانينات والتسعينات، وكلها مبوظها جعير الشمامسة لدرجة ان في قداسات بالكامل مش طالع فيها غير نشاذ وحزق وسرسعة.

أتمنى النقطة دي تكون وضحت.

2 - المحتوى المقدم في الألحان القبطية

كل واحد بيقابل ربنا بطريقة معينة. لو حد بيحب الترانيم يتفضل، حد بيحب القراءة في سير القديسين يتفضل. كل واحد بيشوف ربنا بطريقته وباسلوبه. هل كل ما لا نفهمه نلغيه؟ هل كل ما يختلف عن طريقتنا في مقابلة ربنا نمنع غيرنا منه؟

لو احنا صلحنا النقطة 1 واهتمينا بالتعليم مش هاتكون القبطيات لوغاريتمات، إلي جانب اننا لازم نبطل التكرار الممل في الصلاة، يعني مش لازم نقول المزمور الحزايني خمسين ألف مرة في اليوم، ممكن مرتين مثلا باللحن الطويل ومرة دمج، الخ.

كمان لازم نتعامل بطريقة حكيمة مع الألحان اللي نوتتها الموسيقية مش مستساغة. زي مثلا البولس الفرايحي الكبير، ده لحن طويــــل مالهوش أي أهمية في حياتي وده رأيي الخاص، بس نلغيه يعني نقتله؟ لا ممكن نقول حتة بسيطة، ممكن يتقال بصوت ألطف، ممكن يتقال في التلفزيون واليوتيوب بس مش لازم قداس العيد.. الخ.

طبعا ناس كتير اتكلمت عن أهمية التراث والحفاظ عليه وكل الكلام الحلو ده، ومش حابة أكرره. بس أنا هاقولكم حاجة أثرت فيا ولمستها. في درس قبطي باديه اسبوعيا أونلاين لمتحدثي الانجليزية، ودرس كمان لمدارس الأحد. في ولد عنده 6 سنين بيقعد مع ناس عندها 30 سنة وبيقرا الحروف أشطر منهم، وبيفتح الكاميرا ويقعد يطلب ويسأل ومش هو بس، معاه زمايله اللي عندهم 10 سنين اللي قاعدين وماحدش قاعد جنبهم. العيال دي عايزة تتعلم نقولها شكرا مع السلامة؟

في ولاد في مدارس الأحد مش أقباط يعني لا ينتموا للكنيسة المصرية زي الأثيوبيين والأريتريين، الولاد دي بتسمّع الألحان والحروف أحسن من الولاد المصريين، مجتهدين ومبسوطين باللي بيعملوه. نقولهم معلش أصل احنا قررنا نعلمكم ترنيمة من الكنيسة الانجليكانية عشان دي الترانيم الانجليزي الموجودة عندنا؟

نهايته، سيبوا كل اللي عايز يتعلم يتعلم، واللي عايز يمارس يمارس. لكن الليتورجية محتاجة شغل أكبر من اللغة والموسيقى، الصلاة محتاج ناس قريبة من ربنا تقرب غيرها مش تبعدهم بالميكروفونات.

مش لازم الناس تكون بتحب المزيكا والألحان عشان تعرف تصلي، بس لازم الناس اللي بتصلي تكون بتحب ربنا قبل نفسها.

 

Tweet

Follow @evronia

عشر أفكار عن كيفية تحضير وإلقاء كلمة أو درس مدارس الأحد

"اكرز بالكلمة. اعكف على ذلك... عظ بكل أناة وتعليم" (2تي 4: 2)

مقدمة

بمناسبة مرور 100 سنة على بداية مدارس الأحد، قررت أشارك في المناسبة دي بحاجة بديت أفكر فيها وأكتبها من سنين، وحاجة تهمنا كلنا في مدارس الأحد، وتساعد على النهوض بالمحتوى المقدم فيها وبالمعلم الكنسي، واللي هي ازاي نحضر درس لمدارس الأحد.

مهم نبعد بقى الكلام في مدارس الأحد عن معضلة لبس البنطلون واستخدام طلاء الأظافر، ونوعية الكلام ده اللي سمعته كتير جدا وأنا صغيرة. في الزمن الحالي لازم نقدم مستوى تعليمي يرقى لفكر ناس بتقعد على الانترنت، ناس بتفكر وتبحث وتسأل أسئلة مكانتش على أيام زمان.

بداية الطريق ده هو ان المعلم اللي بيقدم تعليم كنسي سواء في مدارس الأحد او غيره، لازم ينهض بنفسه هو كمان ويكون على مستوى الحدث، وده لأن فاقد الثقافة والعلم مش هايقدر يديهم لحد.

طيب ازاي ممكن ننهض بالمعلم؟ طبعا عن طريق القراءة ثم القراءة، لكن لواحدها ماتكفيش انها توصل المعلومة للمخدومين. وبالتالي حبيت أشارك بعض الأفكار المتواضعة اللي ممكن تساعد الخادم في تحضير وإلقاء كلمة أو درس مدارس أحد.

الأفكار دي ممكن تكون بديهية لبعض الناس، وممكن استخدام بعض منها لتحسين طريقة إلقائك أو تحضيرك وممكن إتباع الخطوات بطريقة شمولية لو لسة مبتدىء. لازم طول الوقت تفتكر نقطتين ان التعليم بالممارسة فلازم تغلط وتجرب عشان تتعلم تلقي كلمة، والنقطة التانية ان ماحدش بيعمل كل حاجة صح من الأول حتى أكبر المتكلمين أو المحاضرين، ومقبول انك تتعلم وتاخد وقتك في ده. الفكرة ف إنك تدي نفسك وقت مش تقتنع إنك مش شاطر ف ده وتهرب منه أو تحس إنه حمل أو عبء عليك. بالعكس، لو عملت الموضوع بفكر مفتوح للتعلم، هاتحبه وهاتطور بسرعة.

ملحوظة: المدونة مكتوبة بصيغة المذكر (اعمل، اقرا، افتح،...) ولكنها موجهة للجميع، بس للأسف اللغة العربية بتفترض الضمائر المذكرة هي الجامعة للجنسين.

1-    الفرق بين دروس الأطفال والكبار

لو المستمع سنه صغير ممكن الدرس يتقري من أي كتاب ويتقال. أي حكاية أو معلومة بتقراها في خمس دقايق وتقعد تشرحها نص ساعة للأطفال بالحركات والعرايس. لكن كل ما يكبر سن وعقل المستمع كل ما دور المتكلم يختلف. عشان كدة أهم خطوة قبل ما تحضر كلمتك هي تحديد المستمع. لو انت بتكلم اطفال هاتقول لهم كلمة غير لو بتكلم اجتماع الأسرة، حتى لو كان الموضوع هو هو. ويمكن ده يكون موضوع بديهي، بس مش بديهي قوي لما بنلاقي اولاد صغيرين في مدارس الاحد قاعدين ساعة بيسمعوا الدرس وزهقوا، او لو سامعين ومش فاهمين، الي آخره.
مهم كمان نفكر في الدرس واحنا فاهمين ايه الخبرة أو المعرفة السابقة للمستمع بتاع الكلمة. يعني لو بتكلم فصل مدارس أحد فالمستمعين هايكونوا متجانسين أكتر من لو بتتكلم في عشية أو نهضة، وبالتالي الدرس الموجه لمستمعين متجانسين في الخبرة والسن والظروف بيكون أسهل وتحدياته أقل من الكلمة أو الدرس الموجه لجمهور عريض من الناس.
وبالتالي، مهم نعرف ايه الرسالة اللي عايزين نوصلها للي هايسمعوا الكلمة، ودي هانجيلها في النقطة رقم 3 باستفاضة.

2-    بين تصفح وقراءة الكتب  

ممكن موضوع الكلمة يكون في دماغك وتدور في كتب عن نقاط له، وممكن تتصفح كذا كتاب الأول وبعدين تختار موضوع بناء على فكرة ما شدتك في اللي قريته. ممكن تحتاج تتصفح ٥-٦ كتب ع الأقل عشان تحضر كلمة مهمة لعيد أو مناسبة. مش ضروري تقرأ كلمة كلمة ف الكتب عشان تعرف الموضوع اللي عايزه أو فايدة الكتاب بالنسبة للموضوع اللي انت عايزه، لكن ممكن تتصفح الكتب بسرعة. التصفح معناه أولا هاتبص ف الفهرس، أول أو ضهر الكتاب ومحتويات عشوائية منه أو محتوى فصل معين شدك عنوانه.. ممكن تقرأ أول سطر في كل فقرة أو تبص بعينك بسرعة على المحتوى وتشوفه مفيد ولا لا. لو في فكرة محتاجة تركيز منك ممكن تقراها بتأني، غير كدة مفيش احتياج لقراءة بطيئة عشان التحضير. كتر القراءة والتعود عليها بيخلي تصفح الكتب وفهم الافكار اللي فيها أسهل وأسرع.

مثال: لو في عيد القيامة عايز تحضر درس عن القيامة، فهاتروح المكتبة وتشوف اكتر من كتاب عن عيد القيامة، وتتصفحهم وتستعير أو تشتري المناسب منهم. نفس الحكاية ممكن تدور على الانترنت بكلمات بحث مفيدة، بس خد بالك إن مش كل محتوى الانترنت كلام موثوق فيه وممكن الاعتماد عليه تماما، لازم تتأكد انك واخد المصدر من كاتب مش من منتدى (بس ممكن تاخدوا من المدونة دي أكيد :D  )

3-    كن محدداً

الأفكار اللي أنا باقترحها في المقالة دي مبنية على خبرة عملية وأكاديمية. كتابة البحث العلمي بتعلم الشخص ازاي يكون محدد طول الوقت ف الحاجة اللي عايز يقولها. وفي نفس الوقت خبراتنا في الكنيسة كمستمعين وخدام بتدينا خبرة عن النمط اللي ممكن نتبعه عشان نحسن من جوده كلماتنا. فمثلا انت لما تبقى بتستمع لمتكلم وتتوه منه ماتبقاش عارف هو عايز يوصل إيه بالظبط في الكلمة، ده بسبب أنه مش محدد في الرسالة اللي عايز يوصلها. بيبدأ يتكلم في موضوع وينتهي بموضوع مختلف.

مهم تختار رسالة او اتنين هاتوصلهم للناس طول الكلمة وتركز كل نقاطك إنهم يصبوا في مصلحة الرسالة دي. لو لقيت نفسك بتشتت المستمع، يبقى انت عندك رسايل كتير جدا ومحتاج تركز كلامك في نقاط محددة أكتر. تخيل نفسك بتقرا كتاب، لو لقيت أول باراجراف ف الصفحة بيبدأ بجملة وينتهي بموضوع تاني خالص، يبقى الكتاب ده أي كلام. وكذلك الكلمة اللي بتسمعها، لازم تكون متناسقة في أهدافها ومحددة.

حاول تفكر في الكلمة قبل ما تقولها بشكل شمولي، لو لقيت نفسك في الآخر بتسأل نفسك "أيوة يعني وبعدين" (so what?)  يبقى الرسالة اللي انت عايز توصلها مش واضحة أو مفيش رسالة أصلا والكلمة عبارة عن أفكار متبعترة وخلاص.

مثال:  في سلسلة نحو الله لأبونا سارافيم الباراموسي وآخرين، في فيديوهات صغيرة جدا هدف كل واحد منها الاجابة على سؤال محدد جدا. من متابعتي للفيديوهات، قدس أبونا واضح جدا انه شخص فاهم البحث العلمي وفاهم ازاي يكون دقيق في استخدام جمل وتساؤلات محددة في كل فيديو، ويجيب عن التساؤل اللي طرحه كل مرة في ايجاز وفي الصميم. الفيديوهات دي مهمة لأنها بتبين ازاي في كل فيديو أبونا بيتناول سؤال او نقطة واحدة فقط للإجابة عليها. فمثلا في الفيديو ده عن الألم بيقول هانجاوب عن سؤال كيف مش لماذا. وده اللي بنعمله لما نكتب بحث اننا نكون محددين احنا عايزين نجاوب على انهي سؤال بالظبط. وده اللي لازم نحاول نتبناه في عظاتنا وكلماتنا، وده اللي بيخلي في رسالة واحدة ناخدها من كل عظة، والرسالة دي ماينفعش يختلف عليها اتنين، لأنها واضحة. ممكن كل واحد يتعلم طبعا حاجة مختلفة من العظة لكن الاطار الاساسي للعظة لازم يكون واضح للكل.

4-    خط القصة أو الstory line

زي ما قلنا في النقطة رقم 3 إن الكلمة لازم يكون لها رسالة ثابتة تكون كل نقاط وحكايات الكلمة بتصب لمصلحة الرسالة دي. ازاي تعمل ده؟ أول لما تتصفح الكتب وتختار فكرتك اللي هاتبني عليها الكلمة وتكون دي الرسالة اللي الناس هاتاخدها معاها، ممكن تبدأ تكتب (ع الكمبيوتر يستحسن لأنه هايساعدك تزود افكار ف النص)، وحتى لو مش ع الكمبيوتر، مع الوقت والتحضير هايكون في تعود على ترتيب الأفكار في الكتابة. بعدين تشوف ايه الافكار اللي بتخدم على او بتعزز الهدف اللي انت حددته وتبدأ تقولها ازاي.

ازاي تتأكد ان خط القصة بتاعك متماسكة ومتصلة؟ ممكن تناقشها مع حد، أو تكتبها على ورقة بصورة خط مستقيم وتشوف هل كل الاجزاء متصلة ومنطقية ولا فجأة في افكار دخيلة نطت وسط الكلام.  

مثال: تخيل نفسك بتتفرج على مسلسل، وبتلاقي مشاهد مش مهمة، بتعمل ايه كمشاهد؟ يا إما بتفوتها أو مش بتركز فيها، وده لأن المشاهد دي مش مهمة في الخط الرئيسي للقصة. لكن المستمع اللي قاعد في الكنيسة بيسمع كلمة أو درس، ماينفعش تاخده في مشاهد أقل أهمية وتشتته لأن لازم تراعي إن الناس ماتزهقش وكمان إن وقتك محدد. وبالتالي لو في مثال/قصة/موضوع بره الموضوع، حتى لو حلوة او مفيدة او غيره، ماتقولهاش لانها هاتشتت فكر الناس وتتوههم، خليها لمرة تانية.

5-    تقسيم الكلمة

أول حاجة بتبدأ بمقدمة ومدخل للموضوع اللي عايز تقوله، ممكن يكون قصة أو سؤال للمخدومين، أو معايدة على الناس لو العدد كبير والكلمة مش تفاعلية.

بعدها بتبدأ تقدملهم جسم الموضوع وممكن يكون نقط او أقسام بس كله بيخدم على نفس الهدف. وتقول لهم انك هاتقول عدد كذا نقطة وعناوينهم كذا، وتبدأ تشرح في نقطة نقطة. وافتكر إن التكرار يعلم الشطار. كرر الرسالة الرئيسية طول الوقت واربط الكلام اللي بتقوله بيها. ولو الكلمة متقسمة لنقاط، راجع النقاط مع المستمع وخليهم يسمعوها معاك، وكتير من المتكلمين بيعملوا ده حاليا في الكنيسة. افتكر إن الكلام لازم يكون واضح ومحدد طول الوقت، فماتقولش كلام مبهم أو ملخبط او مش مفهوم إيه الهدف منه.

في الآخر بتختم وبتركز تاني على الرسالة اللي انت بنيت عليها خط الكلمة وبتلخص اللي انت قلته وتنهي.

6-    اعصف الأذهان

 التحضير بجودة عالية مهم لأنه بيؤدي ف الآخر لشخص متعلم بيزود تعليمه وبينقله للناس. في نفس الوقت، دور المعلم مش بس بينحصر في تلقين معلومات للمستمع أو المخدوم، لكن كل ما يكبر المستمع سنا وخبرة، بيحتاج الي إنه يتعلم يفكر (انظر تدوينة بين ميسر وملقن للتعليم).

المتكلم بالتالي محتاج يسأل أسئلة ويسيب الناس تفكر في إجاباتها ويحصل لهم عصف ذهني ويبدأوا يسألوا نفسهم أسئلة.. وفي طريقهم للبحث عن إجابة في دماغهم هايتعلموا. وفي اسئلة المتكلم هايجاوب عليها بنفسه بس مهم كمان يناقش الحضور ويفتح مجال للاختلاف في الفكر، عشان يتقبلوا إن في وجهات نظر كتير لنفس الحاجة، والمتكلم كمان لازم يتقبل، وكمان ينمي، الفكر النقدي عند المستمعين.

مثال: لو هاتعمل كلمة عن ليه المسيح اتجسد فهاتجاوب عن السؤال ده، عن "ليه". ممكن أحد النقاط هي إنه عشان يكون قدوة ومثال حي ملموس ومعروف لدينا عن المحبة المسيحية اللي هي جوهر الله، وعن السلوك المسيحي في العالم.

في النقطة دي ممكن بقى تسأل فيها أسئلة فرعية تسيب اجابتها للناس...

وتسيب الناس تفكر لو كنا عايشين في زمن المسيح كنا هانتصرف ازاي؟ هل كنا هاننتقده للتعامل مع العشار والسامرية والخطاه، ولا كنا هانتعامل معاه ازاي؟ وهل سلوكنا فعليا هايكون زي ما بندعي ولا كنا هانبقى منافقين؟ كنا هانتعامل ازاي مع التعاليم اللي المسيح جاي يقولهالنا؟

بعد ما تسأل الأسئلة دي ترجع برضه لسؤالك الرئيسي اللي هو "ليه المسيح اتجسد"، ولا "ازاي" ولا "امتى"، ولا أي حاجة تانية، تركز بس في سؤال ليه اتجسد...

7-    وقت الكلمة

الالتزام بالوقت بييجي بالخبرة والتمرين او عدد السلايدز المستخدمة ع الكمبيوتر. بس الافضل تكون أقصر من المطلوب أحسن ما تطول وتتزنق وتضطر تكروت. لو انت متكلم مرتاح مع الكلام مع الناس، في الأغلب إنك هاتطول وترتجل عن المكتوب وبالتالي تكتب افكار اقل لانك وانت بتتكلم ممكن تزود عليها فالوقت يطول منك. لو انت عندك رهبة من الكلام، يبقى هاتبدأ بإنك تكتب كل أفكارك حسب الوقت المتاح لأن احتمال كبير تنسى أو تتلخم وتبقى مش عارف قصدك إيه من جملة او حكاية مكتوبة في الورقة فهاتفوتها. لو بتعمل سلايدز، اتمرن إنك تاخد دقيقة في السلايد الواحدة.

8-    وسائل الإيضاح أو النشاط

طبعا السلايدز من برنامج باوربوينت، صور، فيديوهات من يوتيوب، ممكن Prezi برضه يستخدم في تحضير البريزنتيشنز. اتأكد إن الخط على الشاشة كبير ومقروء وماتكربسش الكلام. 

ممكن جدا النشاط برضه يكون تمرين مكتوب على ورقة، أو اطلب من كل اتنين جنب بعض يناقشوا فكرة معينة في خلال دقيقتين ويعرضوا اللي اتوصلوا له، وده هايخلي الدرس كمان تفاعلي أكتر مش بس متكلم ومستمع. ممكن كمان تحويل الكلمة الي مناقشة أو ورشة عمل في الأعداد الصغيرة.

9-    الكلمة وما بعدها...

وضوح الصوت ومخارج الكلام من أهم الحاجات اللي لازم تتمرن عليها. حتى لو واقف ورا مكتب أو منجلية أو كرسي أو غيره، استخدم لغة الجسد في التعبير عن نفسك وشد الانتباه. في البداية وأنت بتتكلم ممكن تتلجلج شوية بس بعد دقيقتين بتكون رهبة الكلام راحت وبديت تكون مرتاح اكتر.

لما تتكلم، جس نبض المستمع هل مركز؟ سامع؟ فاهم؟ كل ما العدد يقل بيكون سهل بس برضه ممكن عملها ف العدد الكبير بأنك تشوف الناس عينيها رايحة فين، نايمة، مستمعة، الخ. لو الناس زهقت بسبب طول الوقت يبقى لازم تقصر الكلام وتحاول تنهي.

في التدريس في الجامعة عامة، الطالب مش بيقدر يركز أكتر من ٢٠ دقيقة متصلة من غير ما يغير النشاط ، يعني يكون فيه فيديو أو مناقشة أو حاجة تكسر الرتم بعد عشرين دقيقة. ومع وجود اللابتوب و البروچكتور في كل الكنايس والقاعات دلوقتي، ممكن المتكلم يعمل ده، او على الأقل يراعي إنه بعد عشرين دقيقة ماحدش هايكون تقريبا سامعه أو مركز معاه بنفس الدرجة اللي هو بدأ فيها وإن الناس هاتكون تعبت.

بعد الكلمة، فكر في أدائك وقيم نفسك، فكر ازاي تحسن من أدائك. اطلب مساعدة إن لزم سواء في مراجع أو عصف ذهني لتحسين أو تطوير افكارك والقائك. واطلب كمان من حد يديك رأيه بأمانة بدون مجاملة، سواء خادم او كاهن أكثر خبرة، واطلب منه يديك حاجات تحسنها.

10- كيفية تطبيق كل ما سبق...

الكنايس محتاجة تعمل ورش عمل فيها تدريس لطرق التحضير، ويشارك فيها الأشخاص خبراتهم في التحضير ويتبادلوا الأفكار، ويسمعوا من غيرهم بيحضروا ازاي، وكل واحد يبدأ يفكر في ايه الطريقة اللي تناسبه في التحضير والتدريس.

في ورشة العمل، مدير أو ميسر الورشة يختار موضوع معين يبدأ الحضور يجهزوا عنه كلمة، وممكن كل اتنين يشتغلوا مع بعض، ويبدأوا يمشوا بالتسلسل في: اختيار الموضوع، الرسالة المأخوذة من الموضوع، النقاط، المراجع اللي هايحاولوا يستخدموها، النشاط أو التمرين اللي هايختاروه، رسم خط للكلمة، .. إلخ. وفي آخر الورشة يقدم كل اتنين ملخص عن اللي حضروه ويبدأوا ياخدوا اقتراحات أو تعديلات من الحاضرين.

ختام

كنيسة بدون تعليم قوي هي كنيسة هشة وضحلة. مش حقيقي أبدا إن مطلوب مننا نبقى بسطاء في التعليم فقط، مهم نكون برضه عندنا امكانيات فلسفية زي بولس، وحجة للرد وفكر منفتح للنقاش. الكنيسة تحتاج للفكر النقدي جدا، وده مش هايحصل طول ما المعلم مش قادر يطور فكره الشخصي أولا.

اهداء: بأهدي المقالة دي لأمي وأبويا اللي باعتبرهم إلهامي في البحث والقراءة والتحضير والخدمة والوعظ

Tweet

Follow @evronia