Saturday, September 10, 2011

ليلة سقوط سي السيد – الجزء الرابع: مش كلكم سي السيد


ليلة سقوط سي السيد 



الجزء الرابع: مش كلكم سي السيد




بصوا يا رجالة مجتمعنا الاعزاء.. احنا مش داخلين حرب.. انا مش باهاجمكم.. انا باهاجم بصراحة ووضوح: سي السيد، و من هو ضد سي السيد ليس ضد الرجال جميعا







ما هي مواصفات سي السيد؟

سي السيد هو الشخص الذي يتمتع بأحد هذه الصفات أو اكثر:

-        متحكم في البنت تماما  وفي جميع مواعيد نزولها وخروجاتها وعلاقاتها وانشطتها والذي منه، وحتى نوع المواصلات اللي بتركبه، كأن مكانش ليها أهل يربوها ويخافوا عليها قبل ما ترتبط بيه: يعني يتصل بيها وهي بره يشخط له شخطتين كده: اتأخرتي ليه؟ مش انتي قلتي جاية الساعة 8؟ دلوقتي الساعة 8وخمسة!
-        غيرة عمياء وحب امتلاك... مثلا يقول لها: اهلك اهلا وسهلا بيهم بس مايطولوش، صحابك دول مش عاجبينني، ماتبوسيش خالك وعمك وانتي بتسلمي عليهم، ...
-        مؤمن ان البنت اتخلقت عشان البيت والخلفة والباقي امور تافهة، فالمرأة هي كائن مرزوع في البيت لتربية العيال.. فمثلا يبدأ يقول شعر في قد ايه اهم حاجة للست هي عيالها، وانها لازم تضحي عشانهم على طول الخط.. طب وسيادتك؟ ماتضحي انت كمان ولا ايه؟ وبعدين ماهي فاهمة كل التضحيات دي كويس ولو انت واثق انها قد المسئولية، عمرك ما هاتحتاج تقول لها الكلام ده وتحسسها انها دون المسئولية!
-        مش بيمد ايده في شغل البيت لأنه باشا ومتربي ع الدلع.. مثلا: امه وابوه واخواته البنات كلهم بيعاملوه على انه الكينج ومش معقول هايقوم اسم الله عليه يجيب لنفسه كباية مياه، اصل على رجله نقش الحنة...
-        بيؤمر ويشخط عشان يطاع... لأنه بيقول كلام مش منطقي، فالحل الوحيد في النقاش معاه انه يشخط، عشان يقرف اللي قدامه فتقول له حاضر عشان "المركب تمشي" وتكبر دماغها والشيطان مايدخلش والكلام الفاضي ده.
-        ممكن يقول للبنت انا عايز اتجوز خدامة ويضحك لأن ماعندوش دم.. فشايف انه لما يقول للبنت كده هي هاتبقى عايزة تريحه اكتر واكتر، تحت مسمى"الحب"، وكم من جرائم ترتكب باسمك ايها الحب!
-        دموع البنت بالنسبة له لا تعني شيء.. المهم كلامه يتسمع.. هايسيبها تعيط، وماله، يقول لها: انتي بتعيطي كتير على فكره وانا مش كل ما اكلمك تعيطي.. ده بدل ما تحس على دمك يا اخي؟ المفروض تحس ان كل دمعة منها سيف يقطع في قلبك، وتشوف هي ليه بتعيط اساسا!
-        أناني، مستقبله فوق راسك وانتي مستقبلك تحت رجليه.. بحجة ان هو الراجل والمسئول عن مصاريف البيت.. ده على اعتبار انك مش بتساعديه في المصاريف، ولا انك بني ادمه ومن حقك يكون عندك طموح!
-        بيقنع الست انها لما تطيعه على طول الخط فهي بكده بتنفذ أوامر دينها بغض النظر هي دينها ايه اصلا...بس يا عمنا انت مفيش أي حاجة في الدين تخلي الست في مرتبة أدنى من الرجل لأن ربنا عادل بين كل البشر، ستات ورجالة! انتم بس يا صنف سي السيد ياللي بتحبوا تفسروا الدنيا على مزاجكم عشان الستات تسمع كلامكم بدون نقاش بحجة انها كده بتسمع كلام الدين!
-        الخ!

الشاب المصري فعلا ظروف الجواز صعبه بالنسبه له والمجتمع بيحمله كتير.. والبنت كمان بتنتظر منه كتير.. بس كل ده مالهوش دعوة بسي السيد..سي السيد هو طبيعة في الرجل... هو داء أورثه المجتمع في تربيته للولد، وفي نفس الوقت، التربية دي حطت البنت في مكان الكائن الضعيف أبو جناح مكسور، بتطيع سي السيد لأنها ماتعرفش تعمل حاجة غير كده، مقتنعة انها بكده هاتبقى سعيدة في حياتها...


الحملة بقى اللي عملها الباشمهندز جون عصمت، صاحب مدونة "عصموتي"، ضد حملتي ضد سي السيد، مش موجهة للمواصفات اللي فوق.. اعتقد إن أي ولد أو بنت "عاقلين" المفروض يكونوا ضد المواصفات اللي فوق.. لأنه حسب كلام الباشمهندز برضه إن: " برمجة الانسان اللى ربنا خلقها فيه بالنسبة لموضوع الجواز مش بتستقر الا بالمشاركة المتساوية تماما بين الطرفين، يعنى الراجل مش هيكون مرتاح اصلا لو زوجتة مش مشاركاه حياته بشكل متزن بدون قهر، غير كده بيكون حاسس إن فيه حاجة ناقصة و ده يدفعوا للمزيد من القهر وبرضه مش بيرتاح، لو عرف الراجل إن كل ما يقدّر و يحترم زوجته كل ما إتزانه و إشباعة النفسى والجنسى يزيد كان كل الناس عملت كده..."


في آراء مستنيرة تانية برضه وصلتني كرد على الأجزاء اللي فاتت عن سي السيد، إنه الأهل بيربوا الولد على انه المسيطر عشان هو اللي بيصرف وده دوره الرئيسي، والبنت اتربت عشان يتجوزها واحد، وكل ما الولد يدفع اكتر، كل ما فرصته للفوز بالبنت تكتر... فالراجل بيحس إنه هو اللي عليه كل الضغوط وإنه بيطلع عينه عشان ينجح العلاقة دي اصلا.. وده بيديله مبرر للسيطرة...(مبرر في عقله المريض فقط لا غير)!

في رأيي الغلبان، مفيش أي مبرر يدفع شخص للتحكم بآخر .. وموضوع ان ربنا خلق كل واحد ليه دور في الدنيا، فالكلام ده مش بينطبق بس ع الست والراجل، لا على كل فرد في الدنيا، ولو ربنا خلق كل البشر بيعملوا نفس الحاجات وعندهم نفس الامكانيات، مكانش حد احتاج لحد، ولا لأصدقاء ولا لارتباط! في حالة الراجل والست بقى، لازم أدوارهم تكون بتكمل بعض، كل واحد بقى عايز يعمل ايه، يبقى يتفقوا مع بعض... كله بالاتفاق مش بالخناق، ومفيش حاجة منزلة بتقول الست مكتوب عليها تعمل كذا، وكذلك الحال بالنسبة للراجل.. تمام؟

نرجع تاني لكلام جون عصمت في مدونته.. بيقول :
المرأة الحكيمة تعرف طباع زوجها الشرقى،  تعرِف أن تبدأ بالخضوع فتشبع إحتياج مباشر ليعطيها هو أيضا خضوعا فى المقابل بعدما تأكد من مكانته عندها فيصبح خضوعهما متبادل، تعرِف مبدأ يسمى بـ "حاضر، لكن" تعرف مبدأ سقراط فى الإقناع..الذى يعتمد على الاسئلة المرتبة و المتدرجة بحيث تصعد بالإجابات لهدفها المنشود..مثل: حاضر..لكن ألا ترى انه لو فعلنا ذلك محتمل حدوث كذا و كذا؟و فى هذه الحالة هل ستكون راضى ام لا؟ و إذا حدث ذلك هل سنكون خاسرين او رابحين؟ هل ترى هذا الحل مفيد حقا ام توجد بدائل؟ ....فتدفعه دفعاً ليقول الحلول من فمه..و هذه الطريقة صالحة و فعالة للاقناع...هل ترى إنى ألقيت بكل المسئولية على المرأة؟ 

ايوه!! سي السيد مش بينفع معاه اسئلة.. ويسيبك تتناقش لغاية ما في الاخر يقوللك المركب ام ريسين تغرق، وانا الريس، انا اللي اقول، وكلامي يتنفذ!! الشغل اللي انت اتكلم عنه جون ده اسمه: ديبلوماسية في الحوار، وده مابياكلش مع سي السيد وأمثاله..وده نفس الرد للي بيقولوا على البنت انها لو ذكية هاتخلي الراجل يعمل اللي هي عايزاه وهو مش حاسس! لأن انت كراجل لو ماعندكش استعداد تتقبل الآخر كشريك حياة ومصّر انك تعيش حياتك بسيطرة مرضية، عمر ما الست الغلبانة هاتوصل لك وجهة نظرها في أي حاجة أو تخليك تعمل حاجة مش على مزاج معاليك...

المهم ان الباشمهندس جون بيقول كلمتين حلوين في الآخر:
الرجل الناضج هو القائد الخادم، القائد الحنون، بل و القائد الجماعى الذى يعلم أن بمشاركته أمور الحياة مع زوجته يصبح أقوى و أحكم و بالضرورة أسعد..يعلم الحقيقة العجيبة أنه كلما إحترم شريكة حياته و ساعدها أن تكون شريك مساوي له تماماً، كلما زادت سعادته و قلت ضغوتهما النفسية..فقط لندرس إحتياج الآخر مع الاحتفاظ  بالادوار

الأدوار دي بقى نختلف أو نتفق عليها، دي شغلة كل واحد وشريك حياته..


اشكر كل المناقشات الهادفة  اللي تمت معايا حوالين اجزاء سلسلة سي السيد السابقة واللي اقتبست منها العديد من الافكار اللي باكتب عليها، وشكرا لكل سي السيد بنشوفه في الدنيا بيوحي لينا اننا ننتقضه ونقرفه في عيشته...

واخيرا، عزيزتي حواء، عليكي أن تكوني سريعة التصرف في حال اكتشفتي في شريك حياتك مواصفات سي السيد اللي فوق، المقشة عندك، واللي ربنا يقدرك على فعله بقى ياختي..وده مش تحريض ع العنف لا سمح الله! قلبي عندك بقى يا ست أمينة!

 المرة الجاية نتكلم عن المركب أم ريسين...وربنا يستر علينا...


تابع سلسلة سي السيد كاملة

2 comments:

John Essmat said...

طب تمام....قد تنتصر فى موقعة لكن مازالت المعركة مستمرة :)

Evronia said...

هاهاهاها ماشي :) الايامووو بيننا