Monday, June 27, 2011

ليلة سقوط سي السيد – الجزء الثاني: حملة نشر الغسيل


ليلة سقوط سي السيد 

الجزء الثاني: حملة نشر الغسيل

هل حضرتك فكرت ف يوم انك تحل محل الست والدتك/اختك/مراتك/حماتك/الخ...؟؟

جربت تحس باللي هما فيه؟
جربت تنشر الغسيل وضهرك يتقطم؟
جربت تطبخ؟ عارف يعني ايه تتلسع في الفرن؟
جربت تمسح الارض وانت راكع على ركبك؟
جربت تدعك لامؤاخذة الحمام بالديتول؟
جربت تشيل 20 كيلو خضار من السوق؟
جربت تغير البامبرز للعيال؟
جربت تقوم م النوم الفجر تحضر الأكل للعيال وتحميهم وتكوي هدومهم وتلبسهم؟
لا وكل ده عايزها حضرتك متأنتكة وعلى سنجة عشرة كل يوم
ده باعتبار ان طلاء الاظافر أو بالبلدي المانيكيوووووور اللي هاتحطه مقاوم للمواعين ولا مقاوم للصابون؟
ولا على اعتبار ان شعرها مش هايبوظ من سخونية المطبخ والفرن؟
ولا ان جلد ايدها مش هايقشر من الصابون؟
ولا ان ضهرها على اخر اليوم هايبقى مستحمل يقّلع سيادتك الجزمة ويحط رجلك في مياه سخنة؟

جربت بقى تعمل كل ده في وقت فراغك وكمان تشتغل شغلانة صعبة وتحاول تثبت نفسك؟




عزيزي سي السيد، لو انت مش شايف قد ايه الستات اللي في حياتك الكريمة بيتعبوا من دون كلل ولا ملل، فاعذرني اني اقوللك انك اعمى

ولو انت ف يوم ماجربتش تعمل الحاجات اللي هما بيعملوها عشان تساعدهم وتخفف عنهم يبقى اعذرني اني اقوللك انك ماعندكش احساس


ولو انت شايف ان ده دور الستات عشان انت "مش بتعرف" فأحب ابشرك ان كلنا اتولدنا مش بنعرف اي حاجة في الدنيا واتعلمنا وبقينا زي الفل الحمد لله.. اتعلم واتعب شوية، مش هاتندم

الأنيل بقى لو انت شايف ان ده دور الستات وان انت اتخلقت لهدف اسمى من كده وان ده دورهم في الحياة وانت لا.. يبقى اعذرني اني اقوللك انك مغرور  وشوية كلام وحش تاني .. ربنا ماخلقش حد احسن من حد والشغل لازم يتقسم ع الكل قسمة عادلة.. لأن الستات مش خدامين! دول بني ادمين!


عزيزي سي السيد، في هذا الاسبوع ادعوك فقط انك تجرب تنشر الغسيل.. فقط لا غير، ماتعملش حاجة تاني، مش هاقول لك طبيخ وبتاع عشان انا عارفة ان دماغك مش هاتستوعب العمليات الكيميائية المطبخية دلوقتي.. فقط قول للي عندك في البيت انك هاتنشر الغسيل الاسبوع ده، مشاركة منك عشان انت عندك دم وحاسس باللي هما فيه..

اما بقى لو عندك دراير، وده شيء الستات المصريات مش بيجيبوه لأنهم معتقدين ان الشمس المصرية احسن وبتقتل الجراثيم (انا شخصيا ولا بتفرق معايا الجراثيم بس المهم ضهري مايتقطمش من اطنان الغسيل) ففي هذه الحالة ادعوك عزيزي سي السيد الي غسيل المواعين... لو انت ربنا فاتحها عليك وعندك ديش واشر.. ادعوك لدعك الحلل بسلك المواعين الذي يمتاز بتخشين اليدين.. اما بقى لو بتغسل المواعين بجوانتي او الحلل اللي عندك كلها تيفال مش ستانليس ستيل.. فأدعوك لاستخدام المكنسة الكهربائية للسجاد والاستمتاع بصوتها المزعج والمزيد من قطمة الضهر..لو بيتكم مش مفروش سجاد او ماعندكوش مكنسة كهربائية، يبقى انزل اشتري سجاد وشيله ونفضه بالمنفضة .. وماتنساش تربط دماغك بالقمطة، على رأي بلدياتنا، عشان تحس باحساس البهدلة قدام الجيران...


عزيزي سي السيد المبجل.. خلي عند حضرتك شوية دم واحساس باللي حواليك


تابع سلسلة سي السيد كاملة


5 comments:

Anonymous said...

أكيد لايك :D
لأ و كمان ايه في رجالة بتبقى عايزاكي تشقي برا كمان علشان تجيبي فلوس و بيتهيقلي ده موضوع تاني كبير
و بعد كل ده عايزينك هادية مش عصبية و نسخة من هيفا
loooooooooooooooooooooool

il sognatore said...

مش عارف ليه حاسس انى اتهزأت :D

لكن عندك حق فعلا فى كل اللى بتقوليه

Evronia said...

ههههههههه لا انا ماقصدش اهزأ حد نهائيا :) وبعدين انت مستعجل ليه ما الغسيل والطبيخ هاينادوا عليك قريب :) ـ

M_Graffiti said...

عندك حق في حاجات كتيرة يا ايفي بس لو بصينا علي واقعنا الشرقي البحت هتلاقي ان ام الزوج احد اهم الاسباب الاساسية في ان الزوج مبيعملش الحاجات دي..صح ؟؟

Evronia said...

بس ما الام مابتخليش لا الولد ولا البنت يعملوا حاجة في البيت، والبنت احيانا بتتجوز وهي مابتعرفش تعمل حاجة، بس في الاخر يفضل ده دورها في المجتمع.. وحتى احيانا في من الستات بتطلب مساعدات من زوجها وهو يطنشها، او من عيالها كمان... موروثات اجتماعية ان ده دور "ماما" انها تبقى خدامة