Monday, June 20, 2011

ليلة سقوط سي السيد – الجزء الأول: حضرتِك مش قطعة غيار لعربية البيه

ليلة سقوط سي السيد
الجزء الأول: حضرتِك مش قطعة غيار لعربية البيه


استعننا ع الشقا بالله

الاستفتاح: تسقط ثقافة سي السيد ويسقط سي السيد وكل الرجالة اللي زيه

النهاردة كان يوم التدوين والزقزقة على تويتر عن موضوع التحرش الجنسي والعنف ضد المرأة .. وانا بصراحة مكتبتش اي تدوينة عن الموضوع واكتفيت اني اكتب على تويتر لأن يمكن ماكانش عندي الشجاعة الكافية اني اتكلم فيه بصراحة وع البلاطة، ويمكن عشان مكانش في حاجة في دماغي اقولها اكتر من كل اللي الناس قالته

لكن في وسط كل المدونات اللي بتتكتب وكل الناس اللي بتكتب، انا عارفة ان اللي كانت هاتجيب من الاخر هي ايمان، لأنها كتبت عن المواضيع دي كتير، ولأني باتخذها مثل أعلى ليا في الدفاع عن حقوق المرأة والذي منه.. وبالتالي انا قلتلها اني مستنية اللي هاتكتبه عن الموضوع، وفعلا ايمان كتبت البوست الرائع ده
http://thawratalbanafseg.blogspot.com/2011/06/blog-post_20.html  ربنا يخليها.. وبصراحة جاتلي ع الوجعة.. ايون.. جاتلي على الوتر الحساس اللي كنت بديت اكتب عنه قبل كده وماكملتش...

انا ابتديت اكتب عن سي السيد .. الهي ربنا يريحنا منه  ومن أمثاله...وكلام ايمان اداني دفعة اني اكمل اللي عايزة اقوله وافش غلي

هاقتبس من مدونة ايمان: "اللى يعاملك وحش مايستاهلكيش اللى يهينك لا يمكن يكون بيحبك، "الراجل" – مش اى كائن آخر – اما بيحب بيبقى عايز الست تبقى هانم"

أوجه حديثي لعزيزتي حواء.. عمرك كنتي في علاقة مريضة كان فيها بيتحكم فيكي سي السيد وماكنتيش قادرة تفتحي بقك؟ عمرك اتعرضتي للضرب النفسي، بمعنى القهر والكبت، وبرضه ماقدرتيش تفتحي بقك؟؟ عمرك شريكك قاللك اوكي قولي رأيك بس أنا اللي رأيي هايمشي في الآخر عشان انا الراجل وانتي الفليبينية (مع الاعتذار للفليبينيات) ؟؟

دلوقتي جه الوقت انك تبقى حرة من قيود المجتمع وتقولي انتي حاسة بإيه.. تفتحي بقك .. تتكلمي.. تنتفضي.. تثوري.. تنيلي أي حاجة المهم تدي سي السيد فوق دماغه. ليه؟ ببساطة لأن ده اسمه ارهاب فكري وعنف نفسي وده أنيل من العنف الجسدي لأنك مش بتقدري تثبتيه ع الراجل، وهو عمال يقهر فيكي ويذلك، وانتي  بتطاطي تطاطي وتقوليله اديني اكتر انا هاطيعك، ومش بتقدري تفتحي بقك عشان عايزة المركب تمشي... اسمحيلي اقولك.. تغور المركب، خصوصا لو كنتي ع البر ولسه ماتجوزتيش ..

انتي بني ادم عنده احساس ولحم ودم ومش من حق اي بني ادم تاني في الكون انه يسيطر عليكي ويتحكم فيكي، انتي انسانة وليكي كرامتك  واختياراتك في الحياة اللي البيه المحروس لازم يحترمها ورجله ام ريحة وحشه فوق رقبته. في فرق انكم تختلفوا في الرأي وتوصلوا لحل وسط يرضي الكل، وفي فرق انه بيشترط عليكي انه كلامه يمشي بدون جدل كأنه منزل ومنزه عن الخطأ...
اوعي تفتكري ان مش من حقك تتكلمي وتتدافعي عن نفسك، وترفضي اختيارات ضد رغتبك، لا وكمان من حقك تطلبي اللي انتي عايزاه! ايوه صدقيني!! تطلبي اللي انتي عايزاه!!

في بنات كتير بتعيش حياتها مالهاش غير أمل واحد وهو انه تتجوز، يعني كل افكارها وأفعالها بتدور حوالين الرغبة في الجواز.. من أول ثانوية عامة كده تبدأ تتشيك وتستنى الفارس ابو حصان، وتبدأ تدي الفارس ده صلاحيات انه هو اللي يقرر مصيرها وحياتها وهي عايزة ايه وبتعتبر ده نوع من انواع الحب، انها تعتمد عليه وانه يسيطر عليها في كل حاجة من الناحية العاطفية والاجتماعية والمادية.. الخ

شفتي بقى؟ انتي اللي بتديه الصلاحيات دي، وكله باسم الحب... كم من جرائم ترتكب باسم الحب!!! حب ايه ده اللي يخليكي تحسي انك قطعة غيار يشيلك من هنا ويحطك هنا حسب مزاج معاليه؟؟ انتي انسانة
، وغالية قوي كمان، وعندك حاجات كتير حلوة انتي مش واخده بالك منها.. عندك قدرة على العطاء غير محدودة، عندك مواهب وشهادة تشتغلي بيهم تقدري تعيشي وتعتمدي على نفسك... ايوه انتي تقدري تاخدي قراراتك من غير ما تحتاجي لأي راجل ييجي يتحكم فيكي ويخليكي تطاطي راسك ويملي عليكي ايه اللي تعمليه ..

عيشي حياتك، ماتتلهفيش كده ع الجواز وتقولي ظل راجل ولا ظل حيطة.. انا عندي الحيطة اهون من سي السيد وأمثاله.. لازم تستني اللي يستاهلك ويقدرك ويحترمك ويعاملك كما ينبغي ويبقى "شريك" حياتك مش "المسيطر" على حياتك..

اوعي تخلي حد يقررلك حياتك ومصيرك، اوعي تحطي حياتك في ايدين واحد مايستاهلكيش.. دي حياتك انتي، اختيارك انتي، واللي بيحبك هاياخدك كلك على بعضك زي مانتي، من غير ما يغير فيكي، من غير ما يطلب منك انك تنزلي بميعاد وترجعي تديله التمام، من غير ما يمنعك عن اصدقائك عشان مش على هواه، او يمنعك عن أهلك عشان يستأثر بيكي ويحس انه بيمتلك "شيء" مش بني آدم من لحم ودم وعنده إراده!


لو انتي في علاقة مسيطرة من النوع ده، لو سمحتي ارفضي وانهي الموضوع لو انتي لسه ع البر، ولو انتي متجوزة، اعلني العصيان واطلعي للنور، اوعي تكبتي ف نفسك، وسيبك من كلام الناس، ماهي الناس مش هاتبطل كلام في أي حال من الأحوال، بس انتي اللي بتعيشي وبتدوقي وبتحسي، انتي اللي هايتقفل عليكي باب واحد مع الوحش السيد المسيطر ده.. ارجوكي ابوس رجلك ورجل يور فاذر اديله كارت احمر من حياتك الكريمة..

اخيرا.. رسالة الي سي السيد.. لو بتدور على فليبينية، روح اشرب من البحر، بناتنا مش شغالين عندك، مش هايطاطوا، مش هايبلعوا لسانهم، انت ماتستاهلش تعيش على نفس الكوكب.. اتكل على الله وسكتك خضرا..
جاتها نيلة اللي عايزة خلف زي حضرتك

5 comments:

John Essmat said...

مقالة نارية:) مش كده يا عم مش خناقة :)

Evronia said...

هههههه اصل الكبت بعيد عنك يولد الانفجار ههه

Amr Ebaid said...

على فكرة هي بنت آدم.. مش بني آدمة
:P :P :P

Evronia said...

صلحتها :D

Anonymous said...

agree :D