حظكم وحش يا موبينيل، انتوا اللي عليكوا الدور!ـ

باحاول الاقي شركة او مؤسسة بتحترم العملاء في مصر مش لاقية.. ولأني دايما مش باسيب حقي، انتهى بيا الامر اني في خلال السنين اللي فاتت في حياتي قدمت شكاوي تقريبا في كل مكان، من اول امينة المكتبة وانا ف ثانوي، لغاية ارامكس، البنك الاهلي ومصر للطيران وشركات الاتصالات طبعا ، جامعة اسلسكا وحتى دكتور السنان

انتصرت فيهم؟ اه  لأن عندي "حق": اخدت تعويض من ارامكس ومصر للطيران وشنعت بدكتور السنان، وأمينة المكتبة كانت هاتمشي من المدرسة بسببي، والجامعة اتركب فيها كاميرات لمنع الغش

ودي المقدمة اللي حابة ابدأ بيها تشنيعي بالشركة اللي حظها سيء معايا النهاردة وهي "موبينيل"

من اسبوع حولت خطي من فاتورة لكارت، عشان الاستخدام هايقل، ومن ساعتها وهما مش عارفين يرجعولي انترنت ع الخط 

عملت شكوى عشان يتابعوا المشكلة، وكل يوم يقولولي، احنا بتابع ، بنتابع، تحس اسطوانة محفوظة.. بعدين اخر لما زهقت قلتلهم ادوني حد من الدعم الفني اكلمه او قولولي ميعاد لرجوع الخدمة، برضه حافظين مش فاهمين "بنتابع بنتابع" طب لما سيادتك بتتابع، بقالك اسبوع مش عارف تحل المشكلة ليه؟؟ المشكلة لو صعبة عليك يبقى انت شركة فاشلة لأن ما بالك بباقي الحاجات المستعصية في مجال الاتصالات بتتعامل معاها ازاي؟

اما بقى لو المشكلة سهلة، فهي ليه بقالها اسبوع ماتحلتش، خصوصا لو انت  بتتابعها "فعلا"؟؟ عشان المهندسين اللي عندك كسلانين ولا مش بيشتغلوا بضمير ولا مش بيعرفوا يشتغلوا اصلا ولا كل ما سبق؟

حضرتك عارف انك عشان تحل المشكلة دي مش بتنزل تسلّك بلاعات، انما بتستخدم سوفت وير، يعني لو عندك شوية "مخ" هاتحل المشكلة ف يوم، والكلام ده لأني مهندسة كمبيوتر ودارسة ادارة، وباقولك انك فاشل فاشل

قبل كده كنت عاملة شكوى بسبب ضعف الارسال في المنطقة، وطبعا كان الرد انهم هايعملوا cell tower جديد في مكان قريب بس احنا مش في خطتهم دلوقتي.. وطبعا في اماكن التجمعات والتظاهرات الأخيرة، الشبكات كانت بتضعف جدا، بس هما فالحين يقووها في حفلات عمرو دياب ف الساحل، انما للسكان في سيدي جابر ياكش يولعوا.. 

ما علينا..

الاجراءات في مشكلتي الحالية:
- عملت شكوى لجهاز تنظيم الاتصالات
- عملت شكوى تاني في موبينيل، وباطالب بالتعويض ورجوع الخدمة في اسرع وقت مع اعطاء ميعاد لرجوعها ونكتفي باسطوانة "بنتابع بنتابع"
و يكلمني حد من الدعم الفني يشرح سبب المشكلة والتأخير

- تقديم شكوى في خدمة العملاء نفسهم لأنهم حافظين مش فاهمين

- هاشتاج على تويتر عشان الناس تحّفل عليهم كويس ويعرفوا ان اداءهم من سيء لأسوأ، ولأنهم مقللين جدا من قدر الشبكات الاجتماعية في التأثير على ربحيتهم وسمعتهم، ولهم في حملة "كسر الشريحة" عبرة!

السؤال اللي بيطرح نفسه هنا: مصر بيتخرج منها الاف المهندسين كل سنة، وانا واحدة منهم، كام واحد فيهم بيفهم اصلا؟ وكام واحد فعلا مؤهل انه يشتغل في سوق العمل التنافسي؟

ف الآخر العميل بس هو اللي بيشيل القرف بتاع روتين الشركات  دي..

لو شركات الاتصالات اهتمت بالعميل نفس اهتمامهم بالكول تون والاعلانات اللي بيتدفع فيها ملايين لشوية ممثلين ومدّعين وأغاني، الدنيا كانت هايبقى فيها صدق اكتر بينهم وبين العميل .. أنا يهمني ايه أكتر: إن  يكون عندي أغنية تحفة من شركة "اتصالات" مش انتاج فني؟ ولا خدمة كويسة؟

نهايته.. 

وراكم يا موبينيل! حقي  ف خدمة ومعاملة محترمة مش هاسيبه، وزيكم زي الشركات التانية اللي خدت منها حقي

تحديث بتاريخ 22 سبتمبر: رحت فرع سموحة، قابلت شخصية في قمة قلة الذوق (التيم ليدر بتاعة الشيفت) اسمها نرمين المصري، كانت بتتعامل مع المشكلة بقمة اللامبالاة وقالتلي انها مش دورها ارضاء العميل، هي بس بتوصل المشكلة للقسم المختص وخلاص
جابتلي مديرة الفرع، كانت ذوق أكتر شوية، واديتني خط عليه انترنت لغاية ما يصلحوا الخط الأولاني، عشان بس يسكتوني بعد ما الناس اتفرجت عليهم
قالولي انتي بس اللي عندك مشكلة وباقي الناس مبسوطة، انا وعدتهم اني هافضحهم وهانكد عليهم ع النت، وهانشوف!

تحديث بتاريخ 24 سبتمبر: بعد صراع 10 أيام كلمتني ناردين رؤوف من قسم الشكاوي وحلت المشكلة والنت رجعت!! وشحنت 100 جنية رصيد تعويض..! هي كانت لطيفة وأنا شكرتها، انما، ليه يا موبينيل مانشتغلش من غير تهزيق وتصعيد في الشكاوي للادارات اللي فوق؟ ليه ها؟

تحديث بتاريخ 11 اكتوبر 2013: بعد ما سافرت لندن يوم 29 سبتمبر 2013 الخط بتاعي ماشتغلش عليه التجوال لأسباب تقنية برضه، نفس المشكلة التقنية شبه اللي خلت الانترنت ماتشتغلش.. بعد شكاوي ومماطلات وعك من اول يوم 29 سبتمبر ليوم 10 اكتوبر، قررت أبعت للـ CEO والمشكلة اتحلت بعدها ب 10 دقايق بالظبط من الايميل لما اتبعت، رغم ان بقالها 13 يوم تقريبا، لأنهم طبعا مش عايزين يتشدوا من رئيس مجلس الادارة!!
نفس اللي كلمتني "ناردين" ونفس الموقف، دفعوا تعويض 200 جنية رغم اني ماطلبتش (يعني في فترة اقل من 30 يوم واصلني 300 جنية تعويض من موبينيل بسبب اللكاعة اللي عايشين فيها)

المهم اني قلت لرئيس مجلس الادارة ان ده مش اسلوب شركة ينفع تشتغل إن كل عميل عنده مشكلة يبعت للادارة المتوسطة او العليا، ولازم مشاكل العملاء تدار بطريقة أفضل وباحترام ومتابعة أحسن
وهو رد عليا كمان كتر خيره

ف الآخر أحب اقوللكم ماتسيبوش حقكم أبدا، الشركات شغاله عندك وانت بتدفعلهم فلوس عشان كده، حتى رئيس الشركة دوره يخدمك ويريحك، واللي عمله الCEO ده عمل كده لأنه مش مصري فمش متعجرف ومش هايعدي أي ايميل من غير اهتمام.. 

قدامنا سنين ضوئية كتيرة على ما نفهم في الادارة وخدمة العملا وحاجات كتير جدا

Tweet

Follow @evronia