Saturday, May 11, 2013

عن الأمانة: هو حرامي بس كويس


أول مرة اعرف ان الحرامي بيزعل لما بيعرف ان حد قال عليه انه سرق

والعيب مش بس ع الحرامي، انما ع اللي اداله فرصه يسرق، واللي سهل له السرقة، و ع اللي سكت على سرقته، و ع اللي شافه وقال معلش الحرامي صح

العيب ع اللي مش فاهم يعني ايه تكون أمين في الحاجة الصغيرة قبل الكبيرة، وإنه لو غشيت ف امتحان ده برضه جريمة زي ما بتلوم مبارك انه سرق فلوس البلد، انت بتسرق حاجة مش بتاعتك

فأنت لو شفت حرامي بيسرق وسبته تبقى ايه؟ طب لو شاركته في السرقة أو ساعدته تبقى ايه؟ 
 
Image from this link
الامانة عمرها ما كانت مثالية وشعارات، هي بس حاجة عمر ما الشعب ده سمع عنها قبل كده


في أقسام الجامعات والمدارس االلي دخلتها الغش كان ممنوع، وكان اللي بيغش يا اما يتحرم من الامتحان ويسقط (في الثانوية الانجليزية) أو زمايله يحتقروه جدا (في هندسة قسم كمبيوتر بتاع الدحيحة)، بس اكتشفت بعد كده في مصر ان الغش كالماء والهواء، لأن بالذات الجامعات الخاصة في مصر التعليم فيها مهلبية، بفلوسك، ماحدش بيقولك بم انت غلطان، وماحدش اصلا حاسس انه غلطان، رغم انك مثلا لو داخل تعمل ماجيستير فأنت بتتعلم بمزاجك!

أنا ماباعرفش أغش أو أغشش، ماباعرفش أسرق أو أكذب، وبرضه مش باعرف أبرر ده لو حد عمله، تبرير الخطأ أسوأ عندي من الخطأ نفسه!

قررت اني مادخلش اي جامعة تاني في مصر بعد تجربة ماجيستير انتهى بدبلومة في جامعة ESLSCA  اللي المفروض انها جامعة فرنسية والمفروض اني كنت واخدة منحة فيها بس برضه دفعت حبة حلوين من تحويشتي، عشان في الآخر أطلع وحشة وسط الطلبة (اللي معظمهم مديرين في شركات مصر المحروسة) اني فضحت الغش واتكلمت عنه، رغم ان ادارة الجامعة مابصتش في وش أي حد بيشتكي من أي حاجة، ولا مستوى الدكاترة ولا التفرقة والوسايط في المعاملة، ولا الغش، ولا أي حاجة نهائيا، رغم اني اتكلمت كتير...

بس اتعلمت ان الصح بيتحارب، ولازم يصمد حتى لو بيفضل واقف في جبهة لواحده، ماتستناش من الحرامي انه يقولك كلام جميل، هو مش هايعمل حاجة غير انه يشتمك

هافضل أعمل اللي أنا شايفاه صح حتى لو فضلت وحدي في العالم كله مش بس في اسكندرية أو مصر

يسقط فساد وزارة التعليم العالي في مصر
يسقط الفساد والاعوجاج الأخلاقي
تسقط ازدواجية المعايير في الحكم على كل أمور حياتنا


1 comment:

Sara said...

Well said ya eve.
للاسف فعلا.الغش كالماء.و الهواء فى مصر و للاسف السبب ان مافيش عقاب رادع. لما كنت فى سنغافورة عقوبة اللي يغش فى الجامعة الرفد...و تقريبا القانون اتعمل مرة او اتنين و الطلبة بطلوا يغشوا..لازم يكون فى قانون صارم و لازم الغشاش ما يصعبش على حد لان الل يغش فى امتحان هيغش لما يتخرج و يشتغل هيغش لما يتجوز هيغش لما يتعامل مع.الناس هيغش فى كل حاجة....انا اكتر حاجة بكرها فى حياتى الغش و الكذب اللى برده كالماء و الهواء فى مصر