Sunday, March 20, 2011

التقرير النهائي لجمعية بلدي عن مراقبة الاستفتاء

جمعية بلدى
مشهرة برقم 1706 لسنة 2004
تقرير نهائى

1-     بدأت اللجان فى محافظة الاسكندرية فى موعدها المحدد نقريباً.
2-     لوحظ الاقبال الشديد منذ ساعات الصباح الاولى على معظم اللجان.
3-      الحبر الفوسفورى فى معظم اللجان النى تم ابلاغنا بها يتم ازالته بسهولة بالغة امثلة من المدارس:  مدرسة البيطاش الابتدائية و مدرسة سيد درويش و مدرسة على جاد و مدرسة العطارين الابتدائية و كلية الزراعه بسابا باشا ومدرسة سامى البارودى وغيرها، وفى بعض اللجان لا يتم التأكد من غمس الاصبع فى الحبر السرى،مثل لجنة مدرسة مجمع ملك حفنى، لجنة على جاد التجريبية.
4-     شكوى تكاد تكون جماعية من الاستمارات الغير مختومة وقلق المواطنين على أصواتهم بسبب ذلك.
5-     اتضح زيف الشائعة المتعلقة باستخدام اقلام صينية.
6-     عملية الاقتراع غير سرية تقريبا لا توجد اماكن مخصصة للتصويت امثلة من المدارس مدرسة لوران الثانوية ومدرسة ناصر الاعدادية ومدرسة كليوباترا التجريبية  ومدرسة جناكليس الثانوية  مدرسة العجمى الابتدائية وعلى جاد التجريبية وغيرها من اللجان الانتخابية فى المدينة وعلى وجه الدقة لم يذكر اى من مراقبينا وجود اماكن تمكن من سرية الاقتراع.
7-     يوجد تفاوت شديد فى مستوى الاداء من المشرفين داخل اللجان على سبيل المثال ظهرت سيطرة كاملة على مجريات الأمور من السلفيين وتدخل بالغ السوء فى توجيه عملية التصويت وقد بدا ذلك فى مدرسة أبو هيف بسيدى بشر الذى وصل الأمر إلى حد تهديد المراقبين بل والاعتداء على احداهن فى وقد تركت الشرطة والجيش لهم حق تنظيم العملية الانتخابية خارج اللجان وفى بعض الاحيان داخلها مما أعطاهم الفرصة لتوجيه التصويت ، فى الوقت اتلذى سارت فيه الأمور بشكل بالغ التنظيم مثل ماتم فى لجنة مدرسة كليوباترا التجريبية،وهو ما يجعلنا نعرف ان ذلك لم يسكن بخطة مقصودة من الشرطة أو القوات المسلحة ولكن بسبب عدم الخبرة.
8-     فى مدرسة العجمى الابتدائية المنقبات داخل اللجان يدفعن المواطنين للتصويت بنعم.
9-     فى مدارس غرب الاسكندرية الجيش والشرطة تقريبا غير ظاهرين والسلفيين والاخوان موجودين على الابواب وفى داخل اللجان يوجهون المواطنين للتصويت نعم وذلك فى اللجان التالية الحسن بن الهيثم الابتدائية والحسين بن على وزاوية عبد القادر الابتدائية وابن رشد الابتدائية وراغب ضيف الله الابتدائية والهوارية الابتدائية وابو بسيسة الابتدائية والوادى الجديد الابتدائية والواحة الخصراء والفتوح الاسلامية وبلال بن رباح اعدادى وخديجة بنت خويلد والادريسى الاعدادية ووادى القمر الابتدائية.
10- اتهامات لجميع الأحزاب بأنها لا دينية و ماركسية كافرة،من قبل السلفيين.
11- فى مدرسة شربات الثانوية بمنطقة النهضة القريبة من العامرية حيث تجمعت الدعوة السلفية أمام مقار اللجان منذ الفجر و قبل وصول قوات التأمين ،و قامت بمنع المواطنين المسيحيين من الوقوف في الطوابير.
12- امام مدرسة الادريسي بالعجمي - تم اقامة الصلاة في الخلاء من الجماعات السلفية و اعطاء بعض الدروس الدينية تضمنها تحذير من قول لا.
13- الاعتداء على احد المراقبات وهى الناشطة الحقوقية/ إيزيس فتحى بعد خروجها من مجهول، ولكن بعد توجيه تهديدات إليها من أحد السلفيين امام لجنة مدرسة أبو هيف.
14- فى لجنة مدرسة ناصر الاعدادية احد المسؤلين عن ادارة العملية الانتخابية يقوم بتوجيه المواطنين للتصويت بنعم وعلى ابواب المدرسة يقوم السلفيين بدفع المواطنين للتصويت نعم مما ادى لحالة من التوتر دفعت احد المواطنين للتوتر البالغ فاخذ يصرخ لا  لا فظهرت قوات الجيش تطلق اعيرة فى الهواء وقاموا باعتقاله.
15- من الملاحظ ان نسبة الحضور فى المناطق الريفية إدكو مثلاً لا ترقى لمثيلاتها داخل المدن، كما أن اتجاهات التصويت داخل لجان المدينة متقاربة بينما فى المناطق الريفية أو النائية تميل بشدة للتصويت بنعم.
رئيس الجمعية
محب عبود

سيتم التوثيق بمجموعة من الصور



--------------------------
اقرأ أيضا
التقرير الخاص بي في المراقبة على الاستفتاء على التعديلات الدستورية

تقرير المراقبة على الاستفتاء على التعديلات الدستورية


مقدمة
من هو المراقب؟

شخص مدني تفوضه جمعيه حقوقية بتصريح مكتوب للمراقبة على الاستفتاء
المراقب شخص محايد لا يعبر عن رأيه الشخصي يوم الاستفتاء أو الانتخاب
المراقب من حقه الاطلاع على ما يحدث في أي مكان في اللجنه ويخرج ويدخل منها في أي وقت
المراقب من حقه حضور فرز الأصوات والاشراف على كتابة أعداد النتائج بل ويمكنه أيضاً سؤال كل رئيس لجنة عن الأعداد والنتائج التي بحوزته

كنت مراقبة على الاستفتاء اليوم في لجنة هادئة جدا.. كنت محايدة لا أتحدث عن رأيي مع الناس ولا حتى أتحدث مع من أعرفهم إلا بعد أن يدلوا بأصواتهم وكنت لا أسأل عن رأيهم ولا أذكر رأيي


المراقب فقط مهمته رصد الأحداث دون ابداء رأيه فيها، فهو عين المجتمع في الاشراف على الانتخابات

---------------------------------


شارع مسجد العبيسى متفرع من شارع الدير - كليوباترا

رقم اللجنة: لجنة عامة رقم 5
لجان فرعية رقم 10 و 11 و12

البداية:
-       وصلت في الثامنة الا الثلث صباحاً – كنت في اللجنة طوال اليوم ما عدا من الساعة 6:15 حتى 7:15 مساءً، وانتهى الفرز كله في التاسعة مساءً.
-       وجدت القضاه حاضرين الي جانب 2 من الشرطة العسكرية من البحرية ورائد وعدة مجندين
-       يوجد 3  لجان في المدرسة، كل لجنة بها 4 صناديق، بمجموع 12 صندوق
-       كان باللجنة صندوقين غير مستخدمين ابعدهم الجيش في حجرة بالمدرسة
-       كل صندوق مسئول عنه ثلاثة مدنيين أعضاء لجان، وسألتهم ويعملون بالمحاسبة جميعا وحضروا انتخابات عديدة قبلاً
-       في الثامنة الا الربع قاموا بفتح المظاريف وقام أعضاء اللجان بعدّ الورق. الورق كان في شكل رزم، كل رزمة بها 4 أوراق استفتاء.
-       قام أعضاء اللجان بعزل الورق الغير مختوم ولم يستخدم إلي آخر اللجنة لأن عدد الورق المختوم كان كافياً لعدد الناس التي قامت بالاستفتاء.
-       بعض الأختام لم تكن واضحة على الأوراق.
-       لا يوجد اي ساتر في اللجان لكل شخص ليكتب صوته، كتابة الأصوات كانت أمام أعضاء اللجنة، إلا إذا ابتعد الشخص عن المكان ليكتب في خصوصية.
-       القضاة قاموا بالملاحظة الدقيقة جداً للجان وفتح المظاريف وكل عملية الاستفتاء.
-       الأقلام الموجودة معظمها لم يكتب واستخدمنا أقلام خاصة بأعضاء اللجان والقضاة والمستفتيين.
-       لا وجود للأقلام الصينية ذات الحبر السحري، أنا قمت بتجربة بعض الأقلام ولم تزل الكتابة حتى الآن.
-       في البداية كان كل قاض يمر بجانب كل صندوق حتى حوالي منتصف النهار حتى استقرت عملية التصويت، ثم جلسوا ليراقبوا الصناديق في مواجهتها من على بعد حوالي 3 او 4 متر على الجهة المقابلة وكانوا يتدخلون عند اللزوم بالتوجيهات أو التعليمات لأعضاء اللجان.
-       لاصق رقم اللجنة وضع على كل صندوق: أحياناً على الزجاج وأحياناً على المنظقة الخشبية.
-       تأكدت من الصناديق كلها في بداية التصويت وكانت فارغة ذات وجهين زجاج ومغلقين بأقفال.


في خلال اليوم:
-       الاقبال على الاستفتاء من كل الأعمار، سيدات ورجال، وكبار السن من الغير قادرين على السير، وحتى الأطفال الذين كانوا يصممون على تجربة الحبر الفوسفوري على أصابعهم!
-       كنت المراقب الوحيد الموجود وأيضاً البنت الوحيدة فكان يطلب مني أحد القضاه من آن لآخر التحقق من شخصيات البنات والسيدات المنقبات، ثم بعدها طلب مني الرائد أحمد من القوات المسلحة ذلك شخصياً بأن أتولى التحقق من شخصياتهن وأبديت ترحابا شديدا، ومنذئذ وأنا أقوم بهذا الدور حتى نهاية التصويت، فكنت أطابق الوجه بصورة البطاقة الشخصية، وأطلب نزع القفازات لأتأكد من عدم قيامهم بالتصويت قبلاً عم طريق التحقق من آثار الحبر الفوسفوري.
-       المنقبات كن معظمهن متعاونات جداً وأبدين سعادتهن بأن اجراءات التحقق من الشخصية تضمن النزاهة في الاستفتاء.
-       ضباط الشرطة لم يدخلوا اللجنة سوى مرات قليلة للتحدث مع القضاة لمدة دقيقة أو لامدادهم باستمارات استفتاء اضافية، ولم تستخدم هذه الاستمارات في أي حال.
-       3 مجندين من الجيش تواجدوا باستمرار داخل اللجنة، لم يقوموا بأي دور، جلسوا في صمت.
-       عسكري من الشرطة العسكرية كان ينظم الدخول إلي فناء المدرسة حيث الصناديق، كان واقفاً على الباب طوال الوقت وسلاحه مشهر أمامه.
-       لم يوجد أي أوراق دعايا بداخل فناء المدرسة ولم يوجد حديث دعائي أبداً.
-       الحبر لم يكن يوضع في اصبع معين، وكان أحيانا لا يطول الأظافر ومن السهل ازالته من على الجلد بالماء والصابون أو الكحول، ولقد أبديت هذه الملاحظة لأحد القضاة الموجودين. لم تعط تعليمات بتأكيد وجود الحبر على أظافر المستفتيين.
-       لم يتم منع أحد من الادلاء بصوته، وتم قبول الاستفتاء برخصة قيادة + صورة من البطاقة الشخصية.
-       الاستفتاء من خارج الدائرة كانوا يسجلونه في سجل الوافدين المتواجد مع كل صندوق من الـ12 صندوق الموجودين.
-       في حالة تنبيه أعضاء اللجان لبعض ممن ابطلوا أصواتهم، وكانوا قليلون، بأن هذا خطأ، كان القضاة يطلبون منهم عدم التدخل في حديث مع المستفتيين.
-       في أول اليوم سمح للبعض بأخذ صور ولكن منع ذلك لاحقاً من قبل القضاة.
-       بعض المستفتيين كانوا يتحققون من الأختام الموجودة على الاستمارات، وأخرون كانوا يصروا على قراءة مضمون الأوراق قبل وضع العلامة، وآخرون يتأكدون من أرقام البطاقة الشخصية بعدما يكتبها أعضاء اللجان في سجل الاستفتاء.
-       كان هناك العديد من اللمسات الانسانية مع المستفتيين من قبل أعضاء اللجان المدنيين، من خلال مثلاً مساعدتهم في حمل أطفالهم الرضع حتى يستطيعوا التصويت.


حالات فردية:
-       في خلال عدم وجود مستفتيين فقط أبدى أحد القضاه رأيه أكثر من مرة في التعديلات الدستورية وكان موقفه معترضاً على من يريدون دستوراً سريعاً، وأن الجيش مرهق ولن نأتي بقوت يومنا في خلال شهرين. وكذا فعل أعضاء اللجان المدنيون في عدم وجود مستفتيين. ولكن لم يحاولوا التأثير على أحد بهذا الكلام، ولكن أحياناً بعض أعضاء اللجنة المدنيين كانوا يتحدثون مع المستفتيين اذا كان المستفتي يعلن أنه موافق على "نعم" للتعديلات فيقولون له أنهم موافقون على هذا أيضاً، ولكن حدث هذا بعد وضع ورقة استفتائهم في الصندوق.
-       بعض المصوتين كانوا يظنون انها انتخابات الرئيس!
-       اعترضت سيدة على عدم وجود ساتر وظنت أن أحداً من أعضاء اللجنة المشرفة يمليها ما تكتبه، وقال لها عضو لجنة آخر أن التصويت "ليس سراً"، السيدة أصرت على التحدث بصوت عال جدا وحاول القضاه واللجان تهدئتها وارضائها واقناعها بأن عضو اللجنة لم يكن يمليها أين تضع العلامة بل يقول لها ما تفعل.
-       سيدة اعترضت على عدم وضع الورقة بنفسها في الصندوق، و أعضاء اللجنة كانوا أحيانا يساعدون البعض في وضع الورقة في الصندوق، ولم يمنع أحداً بتاتاً لأي شخص من أن يضع ورقته بنفسه.
-       أكثر من مرة طلبوا مستفتيين أوراق بديلة لأنهم وضعوا علامتين في الورق الخاص بهم، ولم يعطوا، كل شخص استخدم استمارة استفتاء واحدة فقط.
-       اذا ابتعد بعض من المستفتيين بالأوراق بعيداً بحوالي 5 او 6 أمتار من صناديق الاستفتاء وتأخروا، يطالبهم القضاة بالاسراع.
-       كان هناك حدث خارج اللجنه لم أره ولكن تحدث بخصوصه باستفاضه مع الرائد أحمد من القوات المسلحة – بحرية، وكان بشوشاً جداً معي وتحدثنا كثيراً. الحدث هو مرور بعض السلفيين في الشارع الرئيسي المتفرع منه شارع المدرسة الموجود بها اللجنه، وكان معهم لافتات وطلب المستفتيين من الجيش أن يصرفهم ولكن الرائد أحمد لم يتمكن من ترك اللجنه في بداية الأمر بصفته الضابط الوحيد بها، ولم يتعرض أحد من السلفيين للمستفتيين ولم يدخلوا حرم اللجنة، وظن البعض أنه متوانٍ في عمله في صرفه لهم، ولكنه برر موقفه الشخصي لي بأنه لم يستطع ترك اللجنة، وأنه بعد أن تضايق الناس ذهب وتحدث معهم فانصرفوا. الموضوع كله استمر لعشرة دقائق حسب قول الرائد أحمد. وهذه فيديو يوضح الحدث: http://www.youtube.com/watch?v=KBtOSrW8W88 هذا الفيديو بجوار مسجد العبيسي، وهو غير ملاصق للجنة ولكنه كما قلت على الشارع الرئيسي المتفرع منه شارع المدرسة.


فرز الأصوات:
-       حضرت للاشراف آنسة من النيابة الادارية في آخر النهار وظلت حتى نهاية الفرز.
-       الفرز تطابقت فيه الأرقام بكشوف المستفتيين والفرق بين عدد الاستمارات في أول اليوم وآخره، كما كُتب في محضر اللجنة في نهاية اليوم.
-       ظابط الجيش المسئول لم يسأل القضاة عن النتائج ولكن استند إلي معرفتها مني شخصياً.
-       في حالة وجود علامة "صح" و "خطأ" على نفس الورقة كان الصوت يحتسب لصالح الاختيار المقابل لعلامة "صح". الأصوات الباطلة هي التي كان بها علامتين متشابهتين على الاختيارين.
-       سجلت نتيجة كل صندوق في كل لجنة وكانت كالتالي:




رقم اللجنة الفرعية (كلٍ به 4 صناديق)
أصوات نعم
أصوات لا
باطل
10
134
196
2
10
153
193
0
10
113
161
0
10
173
248
0
11
124
197
0
11
152
210
0
11
148
207
0
11
113
207
1
12
81
128
0
12
184
276
0
12
128
204
0
12
192
143
1
Total
1695
2370
4




ملاحظات شخصية:
-     الأعداد الموجودة باللجنة قمت برصدها يدوياً قدر الامكان وهي تتقارب كثيراً لاجمالي عدد الأصوات في اللجنة.
-   لم يكن هناك أي تزوير كما لاحظت ولا حتى نية التزوير.
-       القضاة كانوا مرحبين جداً بالاشراف المدني وكانوا يجاوبون على أى أسئلة موجهة لهم.
-       الجيش قام بمجهود جبار ولم يتوانوا عن مساعدة أحد، بل وأعطوني صلاحيات تفتيش ذاتي للنساء اللواتي أشك في أمرهن، وأعجبني في هذا ثقتهم بإشراف المجتمع المدني بل واستخدامنا لمساعدتهم، وكذلك القضاة.
-       أعضاء اللجان كانوا لطفاء جداً معي وساعدوني في تجميع نتائج الفرز كلها دون تأخير.
-       تحدثت في نهاية اليوم مع الرائد أحمد لمدة تقترب من النصف ساعة وهو شخصية انسانية احترمها بشده، غير عنيف بالمرة ومقدر جداً لحال البلد، وعبر لي عن ارهاقهم الشديد وكم المجهود المبذول، وحزنهم على رفقائهم الذين استشهدوا في مواجهة البلطجية. أيضاً قال أنه لا توجد أوامر بضرب مدنيين من الجيش، وأنه ان كان بعض عناصر الجيش صدر عنهم تجاوزات فهذا لا يعني أن الجيش كله هكذا. وجاوبني عن بعض من الأسئلة الأخرى وعدته بألا أتحدث عليها على الملأ. وعدته بأن أقول الحق عن حال اللجنة وأنني سأتصدى لأي كلام يشكك في نزاهته بخصوص ما حدث مع السلفيين.

توقيع
افرونية عازر
مفوضة من جمعية بلدي لحقوق الانسان
مشهرة برقم 1706 لسنة 2004
----------------------------------
اقرأ أيضا:

Friday, March 11, 2011

مقالات شبه سياسية بقلم ثورجية مصرية - ثقافة القطيع

مقالات شبه سياسية بقلم ثورجية مصرية





الجزء الثالث: ثقافة القطيع


رشحوا بطوط لرئاسة مصر - لا! بطوط بيمشي حافي وده حرام! 
كمان احنا جبنا صور - من مصدر مؤكــــد- لبطوط وهو في البحر واتضح ان المايوه اللي بيلبسه بيكيني، واحنا لن نتنازل ابدا عن ان مرشح مصر يلبس مايوه شرعي! 
وبعدين بطوط ده ابن بنت خالة عم حماة اخته كانت ماسونية ومتجوزة واحد بوزي وأمه كان بيقال عنها - من مصادر مؤكده برضه - انها بتاكل لحم خنزير صنع في مدينة الواك واك...ازاي تقبلوا ان بطوط العميل الخاين ده يبقى رئيس مصر!!!! 

يا جماعة برضه عيب تقولوا على بطوط كده.. بطوط خدم كل البط اللي في البركة بقاله سنين، بطوط ده مفيش في ادبه، شوفوا ده حتى سحنته زي القمر وتحس كده انك مستريح وانت بتتكلم معاه وانت بتطبطب على ريشه... يا سلام يا بطوط.. مصر هاتخسر كتير من غيرك.. 
احنا اسفين يا بطوط.. من كل قلوبنا.. كل جنينة الحيوانات بتتأسفلك.. 
يلا نعمل مسيرة رد جميل وشكر وتقدير وعرفان لبطوط ابو البطابيط.. بطوط ابونا وحبيبنا وابن جنينتنا المخلص العزيز...


اللي كتبته فوق هو سيناريو مصغر من اللي بيحصل كل يوم على الفيسبوك من ساعة ما الثورة قامت. فيسبوك بس الحمد لله مش تويتر.

السيناريو ده مشكلته مش بس في اللي بيقوله، مشكلته في اللي بينشره او بيصدقه، لأنه معناه انه ماشي مع أو ورا "القطيع". ثقافة القطيع للي مايعرفش هي ثقافة "هوبا يلا بينا"، بمعنى اني النهاردة اقول حاجة كله يمشي ورايا ويسمع كلامي بدون ادني تفكير، تاني يوم ارجع اقول عكس الكلام تماما، الاقي كل الناس ماشية ورايا بدون برضه تفكير. م الآخر، ثقافة القطيع تتمثل في انك تصدق اي حاجة اي حد بيقولها وبتلغي تفكيرك.

بعض اعراض ثقافة القطيع أثناء الثورة:

1- النقاش على اي حد حلو او كويس بناء على شكله، كلامه المعسول، او العاطفة اللي في قلوبنا - وكأننا بننقي عريس بالظبط!!
هاستعير تشبيه وجملة جمله من صديقتي ماريان مجدي
" ده شكله غلبان، و ده شكله محترم، و ده شكله ابن ناس و ده شكله و شكله... السياسة يا جماعة ميتحكمش فيها بالعواطف ولا بالشكل!  هو أحنا كنا بنحكم علي الناس أزاي!!!! الأحكام دي نحكمها ع العرسان بس D:"

احترم جدا الرأي المختلف عن رأيي في تأييد أو رفض شخص أو فكر ما.. لكن بناء على أسس موضوعية سياسية بحته ومش اسس الادب والشكل والمش عارف ايه.. يهمني في اللي يحكم مصر شغله، "اجندته"، فكره، اعماله، انجازاته، خطته المستقبليه، انتماؤه الفعلي للنظام واساليبه.. وبالتالي، الناس اللي رفضت أو طالبت ببقاء أو ترشيح مبارك، شفيق، موسى، البرادعي، شرف،..الخ، بناء على اي سبب غير اللي فات ده، يبقى سوري يعني ماشي مع القطيع ومش بيسمع لصوت العقل لكن لصوت الصفحات اللي مالهاش لازمة ع الفيسبوك.

2- تخوين نص المصريين على انهم عملاء ومش كويسين
هاحكي قصة واقعية في السريع كده.. انا مرة وانا في ثانوي كنت باكتب على forum مدارس طلبة IG  المندسين وكنا بندردش وكل واحد يقول على ايه اكتر اماكن بيحبها او زارها في مصر وانا ذكرت "ما معناه" ان انا زمان انا رحت بورسعيد ومالقيتش معاملة كويسة هناك ساعتها وبالتالي انا مش باحب اروحها دلوقتي.. عادي انا كنت باعبر عن رأيي وسط اصحابي وماحسيتش اني غلطت في حد وماحدش زعل من كلامي.. بعد كام سنة كنت بادور في جوجل على اسمي ولقيت اسمي مذكور في forum لبورسعيد. ولأني طبعا مندسة وباين عليا، لقيت حملة شنيعة ضدي في الموقع وشتيمة واتهامات. واللي يضحكك بقى، واحد قاللك دي يهودية صهيونية مزقوقة وبتتكلم انجليزي اهو مع ناس خونة وبتشوه سمعتنااااااا، وكلام بقى زي اللي اتقال على غنيم بالظبط! وبعدين رحت انا شمرت ونزلت عليهم رديت وبالعربي عشان افهمهم ان انا مصرية ومش جاية اسوأ سمعة مصر وكنت باكلم مصريين، وعادي جدا ان حد يقول هو بيحب يروح فين او ييجي منين.. هوبا لقيت لك واحد قالك يا عم دي اسرائيلية برضه وبتكتب بالعربي عشان تتوهنا .. ونزلوا فيا! لول.. ! المهم انا كبرت دماغي منهم عشان دول مكانوش قطيع طبيعي، دول كانوا فضائيين !! 
وبالتالي انا كنت من أوائل المدافعين عن تخوين غنيم لأنه بصراحة مفيش اي دليل يقول انه ماسوني والهجص ده، ولأن انا طول عمري باحاول اقنع ناس كتير اني مش اجنبية ولا من اصل اجنبي ومش يهودية ولا أصلي اسرائيلي وحتى عمري ما ركبت طيارة هاهاا! فأنا بصراحة باعذر وائل غنيم وفاهمة هو حاسس بايه D:

عارفين حتى لو وائل غنيم كان عميل بجد؟ (افتراض وهمي انا غير مؤمنه بيه) انا هاشكره برضه!! على رأي البلوجر صديقي "محمد أويس" اللي قال "عليك أن تؤمن أو ترفض الفكرة و ليس الشخص..فالمفترض أن نتبع أفكاراً وليس أشخاصاً ! "

 رداً على من يحاول تبرير و تلويث نوايا وائل غنيم او اي حد تاني في الثورة: كلنا نتفق على ان ما حدث كان ثورة على السرقة و الظلم و الفساد.. ووائل كان أحد العوامل اللي أدت الى قيام الثورة باشعال فتيل البداية.. فإذا كان وائل هو رئيس الموساد شخصيا، فشكراً للموساد .. اما اذا كنتم خايفين على نوايا وائل أو غيره في المستقبل هايعمل ايه، فمصير البلد بأيدي 85 مليون دلوقتي و مش بإيد وائل، هما اللي هيفكروا و يقرروا مصيرهم.. ايوه مصيرنا احنا اللي نحدده ومش هانبقى قطيع يجيبوه يمين فيروح يجيبوة شمال فيروح..


3- محاولة تبرىء ناس كتير من اعضاء النظام البائد ونعد نتأسف بقى ونعمل مسيرات رد جميل، جميل ايه ماعرفش!
يحضرني خبر قريته من كام يوم عن محاكمة الرئيس الفرنسي السابق جاك شيراك باتهامات بأنه أساء استخدام أموال عامة.. جاك شيراك يا راجل؟ عيب ده في مقام جدنا، والراجل ما شفناش منه حاجة وحشة، لا لا عيب عيب تتكلموا بالطريقة دي على الراجل...يلا نعمل له مسيرة رد جميل!
مش فاهمة هو في ايه بيننا وبين اي مسئول؟ هو من بقية عيلتنا؟ هو كبر السن او المرض بيمنع اننا نحاسب الناس على افعالها اللي اضرت بالبلد؟ ارجعوا للجزء الأول  في السلسلة دي اللي كتبت فيه اننا نحاسب ونقيم كل مسئول على انه موظف وشخصية عامة!

كمية الجروبات اللي على الفيسبوك ضد ناس ومع ناس مهولة ومخيفة، وتلاقي كل واحد على الفيسبوك داخل في تلات اربع خمس صفحات وجروبات تأييد لأكتر من شخص (سبحان الله!! كأن رئاسة الجمهورية هاتبقى تورتة تتوزع على 5)  ورفض لناس تانية.. المهم، ناس مشغولة جدا انها تعمل جروب ضد البرادعي او موسى او اي حد، المهم اننا نشتم فيهم طبعا، مش مهم ابــــــــــــدا نشوف مين نازل قصادهم في الانتخابات، مين يصلح للمنافسة، ايه برامجهم، ليه اصلا بنشتم فيهم من الاساس، هل لأسباب موضوعية سياسية ولا عشان واحد كح ولا عطس قاللك ده عميل، قوم هوووب جمع الفين تلاتة واعمل جروب "يا واد يا عميل" وهيص وعيش! 


4- تصديق (ونشر) الاشاعات الغريبة بطريقة سريعة جدا
الاشاعات الاشاعات... حرقوا ده، لا موتوا ده، لا ده عاش، لا ده مات، ايوه ده خبر من مصدر مؤكد، واحد فضائي ماحدش يعرفه كتب اي كلام ع الفيسبوك ويقول لك شاهد عيان وهوبا تلاقي كله نشره..

من اهم الاشاعات واخطرها لما النيل للأخبار نشرت اكتر من مرة اخبار عن سفن حربية تهاجم فين وتنتشر فين وكلام بقى ايه.. تحس ان الحرب العالمية هاتقوم بكره.. المشكله ان الاخبار دي وغيرها كتيـــــــــر بتمثل حرب اعلامية غير شريفة تسمة (media propaganda) واشهر من استخدمها كانت امريكا وروسيا في الحرب الباردة.. المهم، انا هاتكلم عن الحرب الاعلامية في مرة منفصلة بس اللي انا عايزة اقوله هنا ان في اخبار بتبقى باينة انها متفبركة، وحتى لو مابانتش بالنسبة لبعضنا، مش اول ما تسمع اي خبر تهرول وركبك تخبط ف بعض وبدل ما تحاول تفهم تعد تنشر كلام مالهوش اي اساس من الصحة ومن غير اصلا ما تحاول تتأكد اللي سمعته ده صح ولا غلط، من حقك تخاف وتاخد حذر بس استخدم عقلك هاتلاقي 100 الف رد.

فمثلا في موضوع السفن الحربية اللي في البحر دي الجيش رد عليها بعدين وكذبها، وتقدر تفكر تشوف عدد جيش مصر كام وان الجيش مش منتشر بكامل قوته وقواته الخاصة جوا البلد وبالتالي هما مش سايبين الحدود، وتفهم ان في اتفاقيات بتنظم عدد الجنود اللي بيبقوا على الحدود، وطريقة السفن اللي تروح وتيجي، وتفكر برضه ان في قاعدة امريكية موجودة في الخليج، وان مش شرط السفن تكون جاية تهد امن وامان مصر.

يعني انا بس باحاول ادي مثال ازاي الواحد ممكن يفكر اول ما يسمع خبر "مخيف" بالنسبة لناس كتير اول مرة تلاقي نفسها بتتكلم في السياسة غصب عنها بسبب الظروف الحالية، والناس معذورة طبعا، بس ياريت نفكر ومانتعبش اللي حوالينا بالخوف والتقوقع وانسياقنا ورا القطيع. في أسوأ الطروف لو في خبر انت مش متأكد منه، اسأل، استطلع آراء الناس المثقفة اللي بتثق في رؤيتهم، ولو نشرت حاجة وطلعت اي كلام، خليك شجاع وكذّب اللي نشرته، وثق تماما ان الناس هاتحترم شجاعتك دي.
   

5- اي حد يختلف معاك في الرأي اشتمه وقولله انه مش فاهم وبوظ البلد
خلاص يا سيدي انا بوظت البلد، انت نزلت وحاولت تصلحها؟ ولا قاعد ع الكمبيوتر تشتم وخلاص وتردد كلام كل الناس بتقوله؟! الثورة مش عاجباك؟ الثوار المثقفين صفوة البلد مش بيفهموا وانت اللي فتك؟ زعلان من الثورة عشان مش عارف تروح النادي؟ ولا عشان ابن اخت عفاف شعيب مش بياكل يا كبد أمه "بيدزا" وريّش بقاله 10 أيام؟ ولا عشان مش لاقي مكان تركن العربية من كتر الدبابات اللي في الشارع؟ ولا زعلان انك لما هايوقفوك بعد كده في مخالفة مرور مش هاتلاقي الظابط صاحبك بيظبطك ويجيبلك الرخصة ويشيل من عليك الغرامة؟ ايها الشباب السيس.. دي ثورة مش اتاري.. اللي مش عاجباه الثورة، هانجيب له حبيب العادلي يحكمه ونقعدهم هما الاتنين في جزيرة واحدة!

انا مش هادافع عن الثورة مرة تانية، كفاية اللي كتبته في الجزء اللي فات واللي غيري كتبه، بس الاتهامات بتاعة انت مش فاهم وانت بوظت البلد دي عيب بقى ومايصحش وانا باخدها على نفسي حتى لو مش موجهة ليّ! وباتضايق! عشان اللي بيتكلم ده غالبا مرفه ومغيب عن الواقع والتاريخ الدولي والمحلي! الثورات بتاخد سنين والناس بتحارب عشان الحرية، الحرية غالية وصعبة والناس عمالة تقول انتوا وانتوا وينساقوا وخلاص!!! ما تركزوا في اللي جاي والدستور والانتخابات وفككم مني ومن الثورة واللي بدع الثورة من اساسه؟ مستقبل مصر اهم من ماضيها.. خلينا نبص لقدام احسن.


6- القاء اللوم على الثورة لأي حاجة مش عاجباك حتى لو نزلت الصبح لقيت عربيتك مخبوطة 
ونسينا او تناسينا كل البلاوي والفساد المالي والسياسي والاجتماعي والمؤسسي اللي قبل الثورة؟ اللي بيقول عصر مبارك كان منظم وآمن هاقوله ان النظام في عصر مبارك كان فعلا موجود.. بدليل ان الانفجارات والعمليات الخارجة عن القانون كانت بتحصل بمواعيد.. اما دلوقتي للأسف البلطجية بيطلقوهم على الناس من غير ميعاد هاهاهاا!! انتم فعلا مش حاسين كان فيه ايه في البلد لو بتلوموا الثورة على أي حاجة غلط بتحصل... وبالتالي صمتكم أيها القطيع هو أكثر فائدة تقدموها لبلدكم.


الحل الأضمن والسريع للخروج عن ثقافة القطيع:

1- لا للتقليد والانقياد وراء أي رأي سياسي حتى لو ورا اقرب الناس ليك .. لازم انت تكون مقتنع باللي بتقوله وتردده.
2- لو حد قال اي رأي قدامك ماتوافقش لمجرد انك بتحب الشخص لنفسه أو معجب بشكله أو لأنه كوووول، افصل رأيك عن عواطفك.
3- فكر فكر واقرا كتيــــــــــر في التاريخ والاخبار واستند لمصادر موثوق فيها اعلاميا مش القناة الأولى والأهرام فقط!! اسمع الرأي والرأي الآخر وشوف اللي بيقول كلام مختلف عن اللي انت بتقوله ده ايه مبرراته واسبابه، مش يمكن هو صح؟
4- اهبط كده وقبل ما تاخد اي قرار انت مع او ضد مين، فكر وخد وقتك وشوف الرأي والرأي الآخر وشوف انت ميال تصدق مين أكتر، ومين اللي رأيه مدعوم بوثائق ومواقف واقعية ومش اشاعات.
5- لا لخلط الدين مع السياسة - ماتروحش تسأل رجال الدين انتخب مين، اقول ايه في الاستفتاء، فكر انت بذات نفسك كده، ربنا ادانا مخ عشان نوزن بيه الأمور مش نخلي حد يفكر لنا ويقرر لنا.
6- ماتحكمش ع الامور بعاطفية.. بمبدأ حرام عليكم جدو جاك شيراك!
7- ماتنساقش في قراراتك وراء الخوف والفتنة اللي النظام بيحاول يزرعهم.. يعني ماتنتخبش مسلم أو مسيحي لمجرد ديانته، شوف انت فعلا مقتنع مين هايفيدك ويخدم البلد.
8- ماتدوسش لايك على الفيسبوك على كل من هب ودب وعلى أي صفحة وأي كلام وكأن اللايك ده هو اللي هايغير مصير البلد! استفيد بالوقت في انك تقرا كلام ونقد مفيد وبناء.
9- لما تحس انك بتستفز اللي حواليك بعدم ثقافتك عن أي موضوع.. سمعهم صوت صمتك المدوي، واحترم انفعالات الناس.
10- بغض النظر انت مع أو ضد الثورة.. ارجوك، اظهر شوية احترام لدم الشهداء، وحاول تغير من نفسك وسلوكك لو بتعمل حاجة تضر بالبلد، ان شالله حتى لو كان كسر اشارة مرور، المهم، ماتقولش مفيش فايدة، والبلد دي زفت، ابدأ بنفسك يا جدع انت بس!

والله المستعان