Saturday, August 2, 2014

شوية العيال الحكوكيين بتوع حموم الانسان

عارف مشكلة الزبالة اللي ف الشارع سببها ايه؟ شوية العيال الحكوكيين بتوع حموم الانسان
أصل هما اللي معاهم عقود شركات النظافة والمفروض يكونوا رقيبين عليها ومايسرقوش فلوس المناقصات والفواتير وكده

عارف مشكلة تهجير المسيحيين ف الصعيد سببها ايه؟ نفس شوية العيال
لأن هما اللي المفروض ينزلوا يطبقوا القانون ويحموا الناس 

عارف مشكلة المصريين اللي بيموتوا ع الحدود ف تونس ايه؟ العيال دي برضه
لأن هما اللي يمتلكوا طيارات وأجهزة خارجية تروح تنقذ الناس وتتفاوض مع الدول

عارف مشكلة النور اللي بيقطع ايه؟ نفس شوية العيال اللي بيقولوا مش عايزين الفحم ف الطاقة عشان عايزين يعيشوا ف الضلمة وبيقولك أمراض رئة وبتاع

كل المشاكل اللي ف الدنيا من أول أرأر سندود لحد النور اللي بيقطع ف بيتكم والأسعار اللي بتغلى سببها العيال دي.. حط عليهم كل يوم قبل ماتنام تبقى جدع

وماتنساش تعمل فيها بطل وانت قاعد تتمطع ف التكييف وبتلومهم
وأخرك تاكل ف محل المينيمام تشارج بتاعه بالشيء الفلاني
وبعدين تنام وتصحى تهاجر م البلد اللي العيال دي خربوها ومادوكش فرصة تطبق أفكارك العبقرية لتصليحها

نهارك سيد وخد فشار

No comments: