Thursday, July 24, 2014

التضامن الملزق

شوف يا أخي المؤمن ألاقيلك واحد من أصل مصري مش بيتكلم عربي وبالنسبة له مصر دي ف كوكب تاني وشعب جاهل عايز الابادة، بس أول لما حصل موضوع تهجير المسيحيين من الموصل غير البروفايل بيكتشر بتاعته لحرف (ن) ... فأنا اتأثرت واتفاجئت ونزلت دمعتي

ألاقيلك ايه بقى، واحد تاني بس مصري المرة دي، مايتهزلوش أي طرف للي بيحصل ف الصعيد من حرق وتهجير للمسيحيين ويبرر لما تكلمه وكل الكلام ده، بس لما تحصل حرب غزة يغير بروفايل بيكتشر بتاعته ل (كلنا غزة) وانصروا اخواتنا وكده.. فانا باتأثر برضه وباتفاجىء وبتنزل دمعتي

وده نفس التأثر اللي بيحصللي لما بالاقي كلام كذب وصور غلط عن بورما وتلاقي اللي ناشر مايعرفش بورما دي نهين نهون ف أنهي ناحية من الكرة الأرضية

وده نفس التأثر اللي حصللي أيام حادثة القديسين لما رحت الشغل تاني يوم فواحدة زميلتي بتقولي ها بقى احتفلتي براس السنة ازاي؟ كأني جاية من كوكب تاني غالبا...

طب التأثر ده سببه ايه؟
أولا: ان الناس دي مزدوجة المعايير، هما مش بيتهزوا للانتهاك الانساني قد ماهو بيحس اكتر بالانتهاك اللي بتحصل لناس بيشاركهم نفس الدين.. وهو مش بيهتم ف الأغلب يشغل باله غير بالقضايا اللي بتمس حاجات معينه مرتبطه بيه هو شخصيا زي الدين (والدين افيون الشعوب زي ماحنا عارفين)

ثانيا: ان الناس دي ف كل الاحوال مش بتحاول تعمل حاجة ايجابية، تغيير صورة البروفايل احد اشكال التضامن المظهري لما تبقى عايز قضية تنتشر اعلاميا مثلا، مش لما تبقى محتاج مساعدات انسانية وتحركات كتير على الأرض وماحدش بيتزحزح من كرسيه. يعني البروفايل بيكتشر مش المفروض تكون تحرك ما، لكن هي بتعبر عن تحرك ما مفروض يحصل...

الخلاصة: حرف النون ولا صورة كلنا غزة مش بتنقذ الغلابة والمستضعفين والمظلومين من الحرب عليهم، كل انسان ليه دور يعمله. ممكن يكون مرتبط بقضايا معينة طبعا أكتر من قضايا تانية، لكن ف الآخر من حقك تختار ازاي عايز تبقى فعال، مش بس ف المجتمع اللي انت عايش فيه، لكن ف المجتمع الاكبر اللي بيضم العالم كله... لو ماكتشفتش دورك، حاول تكتشفه، لو اكتشفته بس مش عارف تعمل ايه، اسأل حد انت شايفه بيعمل حاجة مؤثرة ف نظرك... أما لو مش عايز اصلا تكتشف دورك، ماتزعلش لما الناس تنتقد التضامن الملزق ده اللي آخره بروفايل بيكتشر .. وكل واحد حر ف بروفايله وبيكتشراته وذاته وأهراماته

No comments: