Saturday, June 28, 2014

عزيزتي ماهي – جواب مفتوح إلي ماهينور

عزيزتي ماهي 

بما اننا مش عارفين ندخل لك جوابات ف السجن، والناس كلها شافتك واتكلمت معاكي النهاردة ما عدا أنا، فقررت أكتبلك جواب مفتوح وعارفة انه هايوصلك بالحاسة السادسة :D



ايه يا ولية الحلاوة دي، شعرك متسرح وجميل والضفيرة اللي بحبها باينة وشكلك بتتغذي كويس ف السجن، مصر كلها تقريبا عرفت قصة الكوارع هع هع
النضارة البني كمان لايقة عليكي بما انك بتحبي البني.. بس الأبيض ده مش قد كده، ماينفعش يسمحولك بساري هندي؟ انا شايفة هايبقى اشيك عليكي.. رنوة وزياد بيجهزولك الفستان اللي هاتلبسيه ف اطاليا، وبسنت العثل قالت انها عايزة تصمملك واحد مخصوص

انا كنت عارفة ان الجلسة هاتتأجل زي ما جلسة لؤي وعمر واسلام ف الاستئناف اتأجلت، كنوع من أنواع التكدير.. اللي ماكنتش عارفاه (أو يمكن متخيلاه لأني كئيبة) هو كمية البهجة اللي انتي فيها، تقريبا احنا المحبوسين مش انتي؟ أو يمكن انا اللي بقيت نكدية فوق الوصف



نازلي بتقول انك مستريحة، أنا فاهمة كويس جدا انك مستريحة أخيرا لأن الشباب ف السجن وانتي كمان... لأنك كنتي دايما بتسألي اشمعنى احنا مابيجرالناش حاجة، الصحاب محبوسين واحنا برة بيعمل شعور بالقهر...الخ. طبعا الكائن اللي بيجلد ذاته جواكي زمانه دلوقتي ف الكومفرت زون بتاعته ومش حاسس بالذنب غير عشان الغلابة اللي انتي محبوسة معاهم

المشكلة ف الاحساس بالنكد والعجز لأننا شايفين اننا أولى بالضحكة المزة بتاعتك دي من الحبس، كمان احنا مش عارفين نقلش من غيرك ولا عارفين نقلش عليكي... المشكلة الأكبر ان الكل بقى محبوس، وده قاطع فينا يعني، يا اما نتحبس كلنا سوا، يا نطلع كلنا سوا

أنا كنت بألس ع الشيخ امام لما يقول "مين اللي يقدر ساعة يحبس مصر" بس فهمت لما شفت صورتك وقلت "مين اللي يقدر ساعة يحبس ماهي"... معلش بقى اعذريني فهمي بطيء وأديني لسة باتعلم


ماعرفش قالولك على جايزة لودوفيك ولا لا، أكيد عرفتي، بس دي حاجة فخيمة قوي وأنا كـ إيفا سعيدة بيها جدا، وقررت أقابلك ف ايطاليا وانتي بتستلمي الجايزة ف اكتوبر، رجلي على رجلك، عاجي معاكو كده زي اللمبي ماليش فيه.. :(  أنا نفسي أروح اطاليا من زمان ودي فرصة كويسة، تفتكري هالاقي حد احسن منك اروح معاه؟ صباح الاستغلال اللي انا فيه يعني :D
الناس بتحبك قوي..زي مانا كنت فاهمة ومتخيلة، بس في ناس ماكنتش أتخيل انهم هايتفاعلوا مع سجنك بالطريقة دي ويتضامنوا معاكي ويصلولك ويدعولك بالقوة دي... برضه سجنك خلاني أفهم يعني ايه "سجنك بيحرر وطن"...

كل الهتافات اللي انتي بتقوليها ف الفيديوهات بترن ف وداني، باتفرج عليها دايما عشان مانساش. قررت إني لو ف يوم جبت أي كائنات حية على وجه الأرض القبيح ده، إني مش هاضيع وقت احكيلهم عن سندريلا وسوبر مان وماعرفش ايه، أنا هاحكيلهم عن ماهينور الفراشة والمزة، ملاكي الخاص... فاكس القصص الهبلة اللي بيحكوها للعيال، لازم نستنسخ منك شوية كتير حفاظا على ما تبقى من انسانيتنا...

اتبسطت قوي لما ايمان وجبر وصلولك سلامي وبعتيلي السلام معاهم من جوا القفص، أه عيطت وحسيت اني بعيدة قوي، بس برضه عرفت انك قادرة تفرحينا حتى وانتي محبوسة...

أنا مش قلقانة عليكي ف السجن بس قلقانة علينا، أنانيتي بتقولي احنا محتاجينك هنا معانا، ومحتاجين كلامك وألشك وهزارك وطفاستك وهبلك... ليه يحبسوكي وماتعرفيش تلبسي الحلقان اللي بتحبيها؟ ليه يحبسوكي ومانبقاش عارفين نكلمك ف أي وقت؟ ليه يحبسوكي ومالاقيكيش أول واحدة عاملة لايك على أي حاجة باحطها ع الفيسبوك وأبقى مستنية تعملي لايك ومفيش حاجة تحصل؟ ليه يحبسوكي والناس محتاجينك معاهم ف اللف ع اللاجئين والأهالي ومايلاقوكيش؟

امبارح بالليل قعدت أسمع الأغاني اللي انتي مرة حطيتيهالي ع الوول "يا أهلا بالمعارك" و "نشيد الأممية" عشان مكانش جاييلي نوم 



أنا عايزاكي تخرجي قبل مارجع، عشان على ما الناس كلها تشبع منك أخدك ليا لواحدي لما أجي، ونقعد ف لمتنا الصغيرة نشرب لمون وناكل كرواسون ونروح كارفور زي البرجوازيين ف عربية ماجد المهكعة مانشتريش حاجة وتطلعي علينا العرق الشيوعي ونروح...

غالبا مش انتي المحبوسة يا ماهي..كلنا محبوسين
خليكي زي مانتي، احنا اللي محتاجين نتغير نبقى شبهك
مسكين اللي مايعرفكيش ولا اتعامل معاكي، بيصعب عليا انه في ناس ماشافتش يعني ايه أجمل مخلوقات ربنا ويمكن لما يقروا كلامنا عليكي بيقولوا علينا مجانين


بنحبوكي قد الدونيا


 إيفا

بي.إس: أنا جبتلك حلق مزركش عشان تلبسيه لما تخرجي..وهاجيبلك تاني 

1 comment:

sun of free dom said...

الحرية للحلم .. ربنا يفك اسرها