Tuesday, June 10, 2014

لماذا قد يعود علينا سجن ماهينور بإيجابيات

لماذا قد يعود علينا سجن ماهينور بإيجابيات

طبعا الواحد ممكن يفكر إن واحدة زي ماهينور لما تتسجن، مفيش أي ايجابيات ف الموضوع وإن كل الدنيا سودا
وأنا أحب أقولك عزيزي القارىء وعزيزتي القارئة إن ممكن يكون فعلا الدنيا سودا كلها وزي الزفت والقطران والبطيخة القرعة بسبب سجن ماهي
وده لقدرتها الهائلة على التفاؤل والتهييس والهزار والألش والمقاومة ومساندة صحابها وكل الناس حتى وهي مكتئبة

إنما ممكن نبص لخمس الكباية المليان ونقول إن سجن ماهي هايعود علينا بشوية فوايد

أولا راحة الدماغ بسبب شكوتها وزنها المتكررين، واحساسها دايما بالذنب "اشمعنى احنا مش بيجرالنا حاجة" "احنا ناسيين اللي جوه"  "أنا fake قوي" وغالبا معظم كلامها بيدور حوالين النطاق ده، والأنيل من كده ان الكلام ده مُعدي وبقينا نقول زيها احنا كمان، يعني كلنا مرضى بجلد الذات بسببها، ربنا يسامحها بقى P:







دلوقتي نقدر نقوللها يا ماهي انتي بقيتي رد سجون والسجن رجعلك نقاءك وبطلتي ادمان الانترنت زي ما كنتي عايزة وبقيتي مواطنة شريفة ارتجعتي عن الحاجات الوحشة خلاوص 


ثانيا كسر قانون التظاهر مكانش هاييجي بالساهل، لازم حد حبسته تبقى مؤثرة وتزلزل الأفكار الوردية اللي الناس واخداها عن القانون القمعي ده اللي بالتأكيد مش زي قانون التظاهر في أوروبا والدول المتقدمة، اللي احنا مش زيهم برضه في حقوق الحيوان حتى، ما بالك الانسان... والناس تبدأ تفهم ان في غربلة للناس المؤثرة زي ماهينور وإن ماحدش هاينام في بيته مرتاح... هااااح



ثالثا مارك زاكربرج قرر ينقل اكاونت ماهي على سيرفر لواحده. الفيسبوك اتبهدل، لو دخلت على صفحة ماهي، هاتعرف انها مش محبوسة، من كتر الكلام اللي مكتوب عندها ع الوول، وبصفة دورية كأنها موجودة وأكتر...
كمية الكتابة والنشر والصور مهولة ومبهرة، بيقولك إن ماهي كانت تعرف نص الكورة الأرضية، وده حقيقي... وهو مين أحسن منها في الدنيا يعني عشان الناس تسمع عنه وتهتم بيه زيها؟


المشاكل اللي المفروض نهيأ نفسنا ليها بقى لما ماهي تخرج هي كتير الحقيقة
أولا: البهدلة اللي من نوع "انتوا مش بتهتموا بكل الغلابة، اهتميتوا بيا انا بس مع ان في غلابة تاني"
ثانيا: الأسف "معلش انا اسفة انكم اتبهدلتم ورايا"
ثالثا: هاتبهدلنا على كل الفيديوهات والستاتسات والحكاوي اللي فضحت اللي هي بتعمله وخلت كل الناس تعرف ان ماهي من المخلوقات النصف ملائكية نصف يونيكورن




أخيرا.. تعرب حملة الحرية للولية عن قلقها البالغ من حبس الولية الذي قد ينجم عنه إن مخنا احنا كمان يطير من كتر ما الولية وحشتنا
إنما نحن وراهم بالمرصاد 
وراكي ردالة يا ماهي
بنحبوكي قد الدنيا


No comments: