Sunday, June 1, 2014

يا ماهي ماتفقناش انك هاتتحبسي



فاكرة يا ماهي يوم 16 فبراير 2013 لما غنينا سوا مين اللي يقدر ساعة يحبس مصر، ف عيد ميلاد الصندرة؟ طب ما هم حبسوكي اهم وحبسوا مصر وكل حاجة حلوة ف الدنيا معاكي

شفتي يا ماهي العبث اللي احنا عايشين فيه؟ الناس بتجلد فينا بسبب الانتخابات والعك ده كله، ومش فاهمين ان حبسك مخلي الدنيا كلها مالهاش أي قيمة.. بقيت ماعنديش صبر وخُلقي ضاق ومش قادرة اقعد ف تجمعات ...

دول مبهدلينني أسئلة انتي انتخبتي مين وليه وعشان ايه..وبيتهمونا بالسلبية، وبيشتكوني لأهلي حتى بعد ماسافرت وحليت عن دماغ البشر اللي مستقصدينني، عشان باكتب عن الحق ع الفيسبوك.. مش فاهمين ان حياتنا كانت اكتر بهدلة من  ورقة مكتوب عليها علامة صح قدام اسم بني ادم

شفتي يا ماهي؟ الشيخ امام مكانش يعرف انهم فعلا ف يوم هايحبسوا مصر
بيقولوا ان ميسون وميرال ف السجن واحدة قالتلهم ماهينور دي جميلة جميلة.. انا كنت متأكدة انك لما تروحي السجن هايقولوا عليكي كده واكتر
فاكرة لما كنتي بتتكسفي من الناس وانتي بتديهم الفلوس؟ انا عارفة ان مفيش حد بيعرف يتعامل مع الناس كلها في كل الطبقات الاجتماعية زيك، عشان كده متأكدة ان ربنا هايوقفلك ولاد الحلال ف السجن وإنك هاتبقي مع ناس طيبة

بس يا ماهي احنا ماتفقناش انك هاتتحبسي.. انتي كنتي فاكرة القاضي هايتنحى، وانا كان قلبي حاسس يوم 20 طلعت م الامتحان وقعت اعيط لما عرفت الخبر، الواد اللي كان قاعد قدامي ف المترو فكرني هبلة تقريبا

فاكرة لما عيطنا سوا في جنازة ناردين ولما عيطنا على حسن شعبان؟ مش بافكر ف ده كتير، بس بافكر اكتر في عدد كوبايات اللمون اللي شربناها، احنا خلصنا محصول اللمون تقريبا
كنتي دايما تعزميني ونعد نتخانق

طب فاكرة اخر مرة لما سبتي الكوافير وجيتي تسلمي عليا ف الاجازة اللي فاتت وأكلنا كشري وسبتي للراجل 100 جنية وانا كنت خايفة ينسى يديكي الباقي؟
أنا اصلا مش بافكر غير في الحاجات الهبلة دي.. لما باكتب عنك كل يوم باتخيل الناس بتفكر اننا بنحكي عن بطولاتك وانجازاتك.. بس انتي بالنسبة لي اكتر من كده
انتي ماهي! يعني لما اقعد مع كل الناس، في اي حتة ف الدنيا، احكي عنك، ومالاقيش شبهك، وابعتلك من غير ما يبقى عندي حاجة اقولها ونعد نهيس ونقول اي كلام

فاكرة العُقد المكلبظ اللي جبتيهولي فجأة بدون مناسبة؟ أنا مالبستوش لأنه مضحك جدا بس معلقاه من زمان  ف الأوضة عشان يبقى قدامي على طول 

اطلعي يا ماهي..اطلعي عشان احنا كتبنا عنك حاجات انتي ماكنتيش عايزة حد يتكلم عليها، بس كان لازم نقول انتي كنتي بتعملي ايه.. اكيد لما تطلعي هاتبهدلينا كلنا اننا قلنا اللي بتعمليه، بس احنا اصلا مش عارفين نقول كل اللي كنتي بتعمليه، لأنك كنتي بتعملي اللي مايقدرش عليه 100 نفر ف بعض، مهما قلنا ده ذرة ف بحر

اطلعي يا ماهي.. عشان نشرب لمون، ونعد ع البحر، وف وسط البلد، ونروح المنشية نشتري حاجات مالهاش لازمة..

اطلعي يا ماهي.. اطلعي عشان الشيخ امام يبقى عنده حق ومايبقاش في ولا حد قادر يحبس مصر

اطلعي يا ماهي.. انا كنت باهزر لما قلتلك هانعمل حملة الحرية للولية.. اخص عليكي يا ولية وحشتيني قد الدونيا

--


لو مش عارف الكلام ده عن مين، ادخل على:

No comments: