Tuesday, April 30, 2013

علي هشام يكتب "نقل عام"ـ

علي هشام.. صديقي.. جمعتنا الثورة رغم انه اصغر مني ببتاع 9-10 سنين كده :)


بس الحرية بتخلي فكر أي حد ناضج وواعي.. وعلي فكره دايما بيدهشني، ولما قاللي انه هايصدر كتاب، ماتخيلتش انه خلاص هايطلع للنور بسرعة كدة.. 






أدهشني أكتر محتوى الكتاب، مش شوية كلام متجمع في ورق وخلاص، زي كتب كتير حتى من أسماء معروفة. كنت متخيلة انه اكيد مش كاتب أي كلام، وأكيد هايكون في الكتاب فكر مستنير جدا، بس أنا لقيت أكتر من كده..

لقيت السخرية في "س" و "جرايد"
والبكاء في "محطة الشهداء"
وانتقاد هلوسة المجتمع في "المتوفي"
والثورة في قصص كتبها قبل الثورة في "أفعى الكوبرا وأحلام العصافير"
وحب الوطن في "سفر"
والحزن في "عجلة بسنادات"
والانسانية في "الغرفة"
إلي جانب رسومات عمر هشام (أخو علي) اللي دمها خفيف ومعبرة :)

الكتب مابتتقلبش كده - من أحلى رسومات الكتاب 
أنا مابعرفش أكتب حاجات حلوة زي علي، ولا هاعرف أكتب له مقدمة عظيمة زي بهاء جاهين، ولا مقولة ينشرها على ضهر الكتاب زي يسري فودة، بس قررت أكتب له التدوينة دي عشان يعرف أنا فخورة بيه قد ايه انه صديقي، ونفسي كل شباب مصر يكونوا زيه :)

بس أنا كنت قلت لعلي قبل ما جيب الكتاب اني هاخد منه تمنه لو ماعجبنيش، بس انا عجبني الكتاب، وقررت أخد منه تمنه برضه، عشان الكتاب خلص ف يوم واحد بس :)

مستنياك تمضيلي عليه بقى يا عليوة!
وعقبال الكتاب الجاي ؛)

انصح بقراءة "نقل عام" !

No comments: