Saturday, April 6, 2013

انا اسفة اني باتعب..ـ

انا اسفة اني باتعب..
يمكن أنا مش قوية كفاية بس أعتقد انه من حقي..
من حقي أضعف لأني باحارب على جبهات كتير..
كبنت مسيحية حقوقية ثائرة، أنا من أقل الأقليات اللي في البلد دي..

باحارب في الجبهة الطائفية، على المستوى الشخصي بقالي 25 سنة، وفي الفترة اللي فاتت بالأخص اتعرضت لموجة شديدة من المضايقات وأسئلة صريحة للتمييز بالدين "انتي مسيحية ولا مسلمة؟"... وعلى المستوى الأكبر، باتجرح بعنف وباتقتل من موت المسيحيين وتهجيرهم واضطهادهم المنهجي...

باحارب في الجبهة النسوية، بامشي في الشارع زي الأسد عشان ماحدش يضايقني، باخرج عن شعوري مرة في اليوم على الأقل...

باحارب في الجبهة الحقوقية، في كل مرة أي حد يتقبض عليه...

باحارب في الجبهة الثورية، وباحس بالعجز في كل وقت مش قادرة أساعد أكتر من كده ان الغلابة اللي في البلد ياخدوا حقهم...

باحارب طول الوقت في جبهات انسانية متفرقة دفاعا عن الثورة ومبادئي، باحارب أفكار الناس اللي بتلومني، وباحارب عشان اصلاح المؤسسات اللي باتعامل فيها، باحارب عشان اقدر احس إني انسانة...

باحارب حتى نفسي، عشان اقدر اشتغل أكتر، واعمل اللي بيتطلب مني، وأفضل وسط كل ده لطيفة ومبتسمة في وش اللي حواليا، وأفضل قادرة اشتغل وأدرس وأعمل الحاجات الطبيعية اللي الناس بتعملها..

طول الوقت في حرب، مش عارفة هاتنتهي امتى، خلاص تعبت منها، وباتعب برضه وأنا مش فيها، لأن ليا دور وأنا مؤمنة تماما بده...

بس آسفة اني باتعب وباغلط، لأني ببساطة بشر، وأقل كتير من اللي الناس متخيلاه...

No comments: