Monday, December 3, 2012

المسيرة - أحمد حداد

شعر: أحمد حداد
غناء: على الحجار

ارفعي يا حرة راسك
انتي أشرف م اللي داسك

علّي يا حرة الهتاف
علمتيني ابطل أخاف

عَرض كل المصريات
خط احمر يا حضرات

اه يا حرة اه يا حرة
انتي ثورة جوا ثورة

يا بنات يا بنات
غيروا كل اللي فات

البنات طالبين قصاص
مش أسف ني وخلاص

المحاكمة المحاكمة
للديابة اللي هاجمة

بنت مصر هي مصر
حرة وعينها ضد الكسر


----------------------------------------



ياللى ماشية فى المسيرة
تسمحيلى أنحني لك
وأقف تحية 
لجدعنتك وأغنيلك 
يا ريحة الحرية 

يا صحوة الصبح وكلام المغربية
يا وردة بلدي صاحية
تقول لا للمحاكمه للعسكرية
تسمحي أحبك يا مصرية

يا طيبة وعنيدة
يا حرة يا شهيدة
غضبك قصيدة جديدة
وضحكتك أغنية

ماحلى الغنا للجدعنة والجسارة
سَلمى ومُنى ومنال ونوارة
وسناء وفيفيان وسامية
وتريز وفاطمة وأميرة
لو عيون البعدا عميا
قلوبنا احنا بصيرة

نزلت بناتنا المسيرة
رافعين علمنا لفوق
والشمس فوق الضفيرة
أمرت عيونا تفوق

شوف الفقيرة الغنية
شوف العجوزة الصبية
بنت البلد فى المسيرة
الهادية والثورجية
من جديد الثورة جاية
على إيد بنات فى المسيرة


------------------------- 


أبيات خارج الأغنية 

تسمحى لى أحبك
يا مصرية
ماشية وسط المسيرة
لو بيضة لو سمرا
لونك لون الثورة
و سكتك خضرا
و الخطوة نورانية 

مع العدو تعادى
وقت الغضب بتدادى
و فى الخطر بتنادى
سلمية سلمية
يا طيّبة و عنيدة
يا حرة يا شهيدة
غضبك قصيدة جديدة
و ضحكتك أغنية

تسمحلى أكسّر القضبان بصوتك
وألعن الجهل اللى راحته فى سكوتك 
وأبارك لك ع المولود 
أبو ضحكة بتصبّر سجنك 
و اقول ربنا موجود 
وانا باعزيكى فى إبنك 
يا أم الشهداء 
اللى راحوا فى المسيرة 

يا أمهات
شالوا بكرة جواهم
تسعة اشعر
و مناضلات
شمس الميدان عارفاهم
من تسعة اشهر

يا طفلة يا عجوزة يا شابة
يا فن و سياسة و تمريض
يا مُدرّسة محبوبة و حابة
و موظفة مخطوبة لشهيد

الحضن فى نهارك يا حرة يضم
و الحر مختارك حبيبة و أم
على بعد خطوة الموت و بتعدّينا
خدتى بإيدينا خرجنا م الأُم أُم
و مشينا وسط المسيرة

وسط البلد فى عينيها صمت حزين
بنت البلد بتنور الميادين
و نورها خللى الصمت فرحة بدموع
وقفوالولاد كردون يا مصريين
يحموا البنات فى المسيرة

No comments: