Wednesday, October 3, 2012

عن ازدواجية المعايير وتهجير المسيحيين - انجازات مرسي الطائفية في ال100 يوم

استكمالا لطائفية دولة مبارك، مرسي بيكمل في نفس السكة من غير ما يحط بربع جنية مجهود انه يوقف الطائفية اللي بدأ يغرق فيها المجتمع من عهد السادات.. المشكلة انه بيزود الطائفية مش حتى بيحاول يفضل على النهج الأولاني وكفاية، لا، التهجير وازدراء الاديان بقت كلمات عادية بتتقال كل شوية!!!



هذا البوست موجه لمزدوجي المعايير لتعريفهم اكتر بانجازات مرسي في خلال ال100 يوم

ومش عايزة المسيحيين يقروها ويعدوا يولولوا جنبي عشان انا ماليش ف الولولة
واللي شايفين ان المسيحيين واخدين حقهم تالت ومتلت في البلد ييجوا على جنب كده شوية عشان المرارة واحدة بس 


مدرس مسيحي يتحبس بتهمة ازدراء اديان في بلد اغلبيته مسلم يتم تهجير فيه المسيحيين من قرية كل شهر مرة على الاقل + تخريب ممتلكاتهم



وماتنسوش البير صابر اللي اصلا مش قادرة افهم هو كتب ايه ولا نشر ايه عشان يتعمل فيه ده!
 
لما عادل امام يتحاكم بازدراء الاديان، الدنيا تقوم ماتقعدش، بالنسبة طب لغيره موقفك ايه؟


مداخلة سيدة مسيحية عايشة في رفح بتقول انهم بينزلوا من بيوتهم بالعبايات والطرح  

"هجرة جماعية للأسر المسيحية من رفح.. تهديدات بالقتل وحرق البيوت وراء الهجرة.. والكنيسة تطالب بالتصدى لمخططات الترحيل.. . والمحافظ يصدر نشرة نقل جماعية للموظفين المسيحيين بدلا من تأمين المنطقة "
 المحافظ ماهجرش المسيحيين من رفح ابسولوتلي! هو وداهم يصيفوا! وكتبولهم لا تعودوا على بيوتهم وشوية تكسير في الممتلكات والكنيسة مايضرش..

لما قصر الدوبارة بيتكتب عليها شتايم طائفية، لو كانت اتكتبت على عمر مكرم تقدر تقولي كام مسيحي هايبقى ماشي رافع راسه اصلا؟ ده لو هايتبقى مسيحيين ساعتها

ماتنساش ان في كنايس اتهدت والناس ماتحاسبتش، الناس اللي وشوشها واضحة وهي بتخرب دي لو كانت مسيحية كانت كل كنايس مصر اتهدت  …

ماتنساش ان الكموني بتاع نجع حمادي لما اتعدم اتعملت له جنازة ابطال في بلدك اللي هي نفس البلد اللي قتل فيها الكموني ٧ في الكريسماس
 
ياترى مين بيتحاكم بسبب القديسين؟ هاتقولي الدولة دبرتها، طب والجامع اللي كبر تكبيرات العيد بعد الانفجار مين اتحاسب منه؟


وطبعا ماتنسوش قضية فرشوط اللي مسجون فيها جرجس اللي عنده ضعف جنسي بتهمة اغتصاب بنت.. بس دي من العهد البائد، ونظام مرسي مافتحش اي ملفات طائفية لتهدئتها

لما منى الطحاوي يمسكوها نص يوم يعملولها تويبون ويغيروا صورهم عشان كل الناس تعرف القضية، ولما مسيحيين يتهجروا يعملوا ريتويت


بتعيط على مسلمين بورما اكتر ما بيهمك اصلا تعرف اخبار مسيحيين بلدك.. تفتكر  المفروض انا يهمني المصريين اكتر وحقوقهم ولا مسيحيين شرق اسيا اللي بيتقتلوا برضه كل شوية ويتفجرلهم كنيسة؟ 

يروحوا يتظاهروا عشان فيلم اتعمل بره مصر ولما المسيحيين اللي جوا مصر يطلع بوزهم يقولك دي احداث فردية

يطالبوا المسيحيين بالاعتذار عن حاجة هما ماعملوهاش وبعدين لما يتهجروا من بيوتهم يعملوا عبده العبيط

يخلوا الكنايس كلها تعلق بانرات اعتذار عن المسيء اللي هما مالهمش دعوة بيه، ويعلقولهم ع الجوامع بانرات الا رسول الله وكأنهم برضه هما اللي عملوا المسيء!
  


واخيرا.. طفلين عندهم 9 سنين يتم ايداعهم الاحداث بسبب "ازدراء الاديان" !

يا واد يا مزدري!

عملت ايه يا مرسي في اللي حرق الماريناب واللي هد وخرب الكنايس الباقية واللي هجر الناس من  العامرية ودهشور؟
مرسي رئيسا لتكريس واستكمال طائفية عهد مبارك

No comments: