Saturday, January 28, 2012

سحقاً لاعلانات مارسيليا فلورنس الطبقية

طالعتنا القنوات التليفزيونية مؤخراً بنوعية اعلانات اقل ما توصف به انها حقيرة من كثرة طبقيتها وتمييزها العنصري

طبعاً أقصد اعلانات مارسيليا فلورنس 

لو ماكنتش شفتها شوف منها جزئين هنا
http://www.youtube.com/watch?v=vrkFCB0YAMc
طبعا انت لو من ولاد الذوات وعمرك ما غمست الملوخية يبقى ياريت ماتقراش البوست ده! ـ

 هو يعني  لو واحد بيغمس او بيستخدم السَبَت ده معناه انه مش مستوى؟؟ أصل السبت مش حاجة تعر يعني،  ولأن الانسان يقاس بعقله مش بأفعاله البسيطة اللي  بتعبر عن انسانيته واحتياجاته !! ـ

الاعلانات دي مش بس بتستهزأ بثقافة وتراث شعب، انما كمان بتحقر من شأن المجتمع لأنهم بيعملوا حاجات "يااي" كده!ـ 



طبعا انت لو مستعر من اصلك ومن اهلك عشان كانوا بيدلدلوا السبت، دي تبقى مشكلتك مش مشكلة السبت، لأنك محدث نعمة، ومش فخور بكل حاجة في حياتك ، يعني مش فخور بنفسك، يعني عندك زعزعة في مبادئك وشخصك!!!ـ


أما بقى انت لو عايش في حتة كوول قوي ومافيهاش بياعين بيعدوا عشان تشتري منهم بالسبت، وبتستعر من البياعين دول، فافتكر لو سمحت جنابك ان
 البياعين الوحشين دول هما نفس الطبقة اللي منها نص شهداء ومعتقلين الثورة.. ـ


ماتستعروش من الشعب، وتقولوا يااي، لأن اصلا الشرف والعقل والثقافة والرجولة مالهاش دعوة بمعاك كام..ولأن الفقر اللي البلد فيه سببه إن خيرالبلد مش لناسها وإن مفيش عدالة اجتماعية، مش لأن الناس بتغمس الملوخية!!ـ

وماتنسوش ان اكتر من نص الشهداء والمعتقلين ف الثورة من الفقراء اللي كنا بنستعر من اشكالهم..لأننا اصلا مش عارفين شكل شعبنا ايه من كترانغلاقنا! ـ
اخرجوا بره الفقاعة ربنا يهديكم! تواضعوا!!! ـ

سحقا لاعلانات مارسيليا فلورنس
سحقا لوكالة الاعلان اللي عملت الحملة الاعلانية التي تحقر من مصر وناسها

اطالب بمنع بث اعلانات مارسيليا فلورنس العنصرية.. لأنها تستهزىء بتراث شعبي وبساطة مصرية اصيلة، ولأنها طبعا عنصرية وطبقية جدا

حد أدنى م الأجور للي عايشين في القبور، حد أقصى م الأجور للي عايشين في القصور او عايشين في مارسيليا البطيخ

No comments: