Wednesday, December 14, 2011

قاللك اشتري المصري وماتتحنطقش!!ـ


لأول مرة عن الاقتصاد اتحدث

اصل بصراحة استفزيت من حملة اشتري المصري دي وكأننا يعني بنشتري الاجنبي عشان خواجات أو عشان منظرة.. مش عشان مفيش غيره أو لأنه أكثر جودة، مش عشان معانا قرش محيرنا! ـ
وناسيين ان محلات  البيتزا بتستورد العجينة  من برة - وده مش كلامي، ده كلام يسري فودة على تويتر

يعني أكيد امهاتنا تعرف تديهم كورس عجين ولا ايه؟؟

طب ما بدل ما تكلمني عن شراء المصري ما تكلمني عن تحسين الانتاج والجودة وتوفير فرص عمل ورفع مستوى العامل.. كلمني عن محاسبة المصانع اللي بتلوث البيئة.. كلمني عن حقوق العمال!!!ـ

ماتقوليش اشتري المصري "فقط" وكأنك بتقوللي: شجع اصحاب المصانع الرأسماليين مصاصين الدماء رجال الاعمال ذو الاسهم بالملايين في البورصة

وكأنك برضه بتقوللي: اشتري المصري وامتثل لحملة يقيمها اكثر المذيعين موالاة للنظام عمرو اديب.. اللي اكيد له مصلحة في انه يروج للحملة دي، ولا ايه؟؟

مش باقولك ماتشتريش المصري، بس افهم انت بتدعي لشراء ايه ومقاطعة ايه الاول قبل ما تشمر كده وتردد كلام وخلاص...ـ

عايزين الناس المتحنطقة لشراء المنتج المحلي تتحنتق كده برضه للحد الادنى من الاجور وحقوق العمال وال40% من الشعب اللي عايش تحت خط الفقر بدل ما بندعي لزيادة الاغنياء غنى اكثر!!ـ

وبعدين الاستيراد مش برضه بيقوم شركات تجارية ومحلات فاتحة بيوت مصريين ؟؟ وكارفور ده اللي بتنادوا بمقاطعته مش بيبيع لمصريين ومشغل مصريين ومنتجاته فيها مصري برضه؟؟

مش الاستيراد ده بيكسب جمارك ؟؟ مش بيشغل ناس في المواني والمطارات؟



شوية بقى آراء منقولة:ـ

هو مين المستفيد من حملة اشترى مصرى؟ وياترى الاعلاميين الملمعين اللى بيتكلموا طووول النهار ف الموضوع وهم بيحضروا سهرات ف أوروبا بألاف اليورو هم كمان لما هايشتروا هايختاروا المصرى؟ طيب ولما اصحاب المصانع اللى هم معاهم فلوس ومستورين الحمد لله يكسبوا أكتر من المعتاد ... المواطن المطحون اللى اشترى منتج رديء هايبوظ ف الغالب كمان ربع ساعة هايستفيد ايه؟


انطلاقاً من حملة اشترى المصرى اللى انا مش مقتنعة بيها خااالص!!! انا عايزة أغير الدعوة دى... احنا نعمل حملة اشترى من البسطاء... اشترى من الراجل البسيط أى حاجة ... ماتخليهوش يكره البلد والثورة...
منقول من : "ماريان عبد الملك" ـ


طيب بما ان فيه حملة لشراء المنتجات المصرية واصحاب المصانع المصرية حيكسبو كتير
انا اطالب اصحاب المصانع بصرف مكأفاة للعمال لا تقل عن 100 جنيه للعامل
علشان تبقي الحكاية منطقية الي حد ما
ساعتها انا حشارك في الموضوع واعمل دعاية من هنا ليوم 20-12 مش 16 بس
منقول من: "احمد ابو ادم" ـ

عايزين تدعموا المنتج المصري اشتروا من بازارات خان الخاليلي اللي اتخرب بيوتهم ومن الاسر المنتجة ومنتجات الخيامية والجيارة
منقول من: "فاطمة عابد" ـ

المنتج المصرى إل هو إيه يعنى؟ بتاع رجال الأعمال المحتكرين إل نصهم فى السجن والباقى فلت بأعجوبة، وال واخدين الأراضى بالتخصيص ويقولك مستثمرين
منقول من: "سحر عبد المحسن" ـ

اختم أنا بقى، الخلاصة: المنتج مش هو المهم دلوقتي، دي ثورة للغلابة، المهم  فعلا هو الحاجة اللي تطلعهم على وش الدنيا.. على الجانب الآخر،  شراء المصري لا يزيد أو يقلل من وطنيتك، ما تفعله تجاه بلدك دون مصالح أخرى هو ما يرفع من شأنها..ممكن تساعد بلدك بحاجات كتير.. وأهم حاجة انك توجه المساعدة دي في المكان اللي محتاجها، مش تمشي ورا شوية كلام في التليفزيون لا يودي ولا يجيب

سلامات

1 comment:

Tony Sameh said...

اشتري المصري؟

بعد ماكانت مصري بتورد قمح للامبراطورية الرومانية كلها، وروحنا جرفناها وبورناها علشان نبني عليها صناديق طوب أحمر مقرفة، وروحنا نشحت القمح من الي يسوى والي مايسواش من غير حسيب ولا رقيب؟

أوكي نشتري المصري... بلاش ناكل عيش