Friday, August 5, 2011

هاتروح التحرير يعني هاتتضرب


كلام قليل بس واقف ف زوري


دلوقتي الاعتصام في التحرير اتفض بالقوة من يومين.. اختلفنا على تأييد أو رفض الاعتصام، لازم مانختلفش على ان القمع مرفوض.. الضرب مرفوض.. الاعتقالات العشوائية مرفوضة.. وان اللي في التحرير مش بلطجية

يومها، العساكر منهم من دخل الجامع بالجزم ومكانش عنده مشاكل، المهم يجروا ويجيبوا الناس من قفاهم

من شوية افطار التحرير اتفض بنفس الاسلوب.. رغم ان الناس ولا كانت ناوية تعتصم ولا حاجة عشان يقولوا كانوا بيعطلوا أو مابيعطلوش  (ملحوظة: ده مش معناه ان الضرب حلال في المعتصمين).. طب ايه؟ الفطار حرام في التحرير؟ بلاش الناس تاكل؟؟ طب يصوموا للعشاء احسن؟؟ دول حتى الناس بيدوا اكل للعساكر اللي حواليهم!ـ



احنا في رمضان.. وكلنا عارفين ان رمضان في مصر معناه افطارات جماعية وموائد الرحمن.. هل هناك قاعدة او قانون تمنع التجمع بهدف الافطار في مكان معين دون آخر؟؟ بالنسبة لتقييد الحريات، اخبارها ايه؟؟

المسيحيين في مصر بيعانوا من اضطهاد وكلنا عارفين اشكاله وأمثله عليه ومش موضوعي دلوقتي، والقمع مش بيفرق بين مسلم ومسيحي..كلنا كلاب في نظرهم..بس لو كانوا اللي اتضربوا كانوا بيفطروا في صيام مسيحي كنا سمعنا تهاليل الاضطهاد..دلوقتي بنسكت ليه؟


طب اللي كانوا في التحرير النهاردة بيفطروا كانوا مسلمين ومسيحيين في أهم شهر عبادة بالنسبة للمسلمين، دعاة حقوق الانسان ساكتين ليه؟؟ أولا: ضرب بني ادمين ، ثانيا: انتهاك حرمة شهر رمضان


اللي دخل الجامع بالجزم وبيضرب الناس في فطار رمضان..لو كان حصل مع مسيحيين كانوا قالوا اضطهاد
وبالتالي الشعب كله لازم يفهم انه كلنا مضطهدين ولازم كلنا نرفض اللي حصل النهاردة اولا لانه قمع وثانيا لانه رمضان


لما البلطجية هجموا على ماسبيرو وقت اعتصام المسيحيين هناك ورغم ان كان ليا تحفظات ع الاعتصام هناك وآلياته، الا ان لقينا ناس كتير قلبت الموضوع اضطهاد، رغم ان مش اول مرة البلطجية يهجموا على اعتصام بهدف فضه... لما الجيش دخل هد سور دير الانبا بيشوي في وادي النطرون وضرب عامل بالرصاص قلنا اضطهاد، طب بالنسبة للتحرير؟ حلال فيهم مثلا وحرام في حد تاني؟؟؟ 


انا باقول كده عشان الناس اللي بتكيل بمكيالين .. الشعب كله مضطهد من رئاساته، كله بيتضرب.. الشعب كله متضايق وتعبان ومقموع
بلاش تبص لحاجة وتتناسى حاجات تانية


التحرير مش منطقة ممنوعة، التحرير مش للضرب.. مصر كلها مش للضرب والقمع والتعذيب.. ولازم اي حد قائم على رئاسة مصر يفهم الكلام ده كويس وإلا مصيره هايبقى زي مصير مبارك 

No comments: