Friday, July 1, 2011

#TweetNadwa Eskandarany!


المكان: مدرسة سان جابريل في الابراهيمية
الزمان: 30 يونيو 2011



وصلت الساعة ستة الا تلت.. مكانش في غير شوية ولاد بيلعبوا كورة.. وفضلت قاعدة مستنية الثواااااااار ييجوا

وللأسف الحضور للندوة توقعت يكون اكبر في البداية لكن الحمد لله الدنيا زحمت بعد ما  بدينا والاسكندرانية ماكسفونااااش

علاء عبد الفتاح طبعا انتوا عارفينه ومتعودين على ادائه الرائع في ادارة تويت ندوة ومن قبل الثورة كمان.. علاء ركبته اتصابت في موقعة الداخلية ورغم كده كان واقف وبيشتغل طول الوقت وبيضحك ويهزر وهو ديكتاتور في ادارة النقاش من طراز خاص، فهو بهدوء وذوق عالي يقدر يظبط الدنيا ويمشي الندوة بايقاع سريع بحيث محدش يزهق ولا ينام




كل الناس الجامدة جت م القاهرة تحضر كمان مش بس المتكلمين..  وهاتشوفوهم في الصور.. منهم منال و جيجي ابراهيم وسارة اللي لعبت كورة مع العيال :) ـ

ليليان وجدي عملت اجدع تغطية مصورة للندوة والحقيقة هي شخص رائع على تويتر بس أكثر روعة في الحقيقة :) ـ

أما بقى الكلام عن الحركة الحقوقية في مصر، فأقل ما يقال انه كان فوق الرائع وأنا أول مرة أعرف ان في ناس كانت بتشتغل في القضايا دي بالاستماتة دي قبل الثورة... نهى عاطف وهدوئها وابتسامتها في الكلام عن نشاطها في فضح قضايا التعذيب
ماهينور الثائرة الاسكندرانية اللي تلاقيها في أي مظاهرة في اسكندرية وبتشتغل زي المكوك
رامي رؤوف ومالك عدلي وحسام بهجت وجمال عيد وغيرهم...ايه الناس دي يا جدعان!! من انتم!!! جنود مصر المجهولين اللي بهدلتهم الداخليه كتير ولسه بيدافعوا عن تراب البلد دي وحقوق ناسها..  مجموعة من الحقوقيين فوق الرائعة.. مش كلهم دارسين حقوق، دول من خلفيات مختلفة كتير، جمعهم وفائهم وحبهم لقضيتهم وبلدهم.. وتواضعهم هو أكتر حاجة ممكن تلمسك..مايبانش عليهم غير الطيبة لكن هما في الحقيقة اسود في الدفاع عن حقوق المصريين

تويت ندوة اسكندراني جمعت اهل القائد ابراهيم بأهل التحرير.. قربت المسافات.. واستمرت من الساعة 6:30 لبعد 10 مساء بشوية

انا حسيت ان الناس الطائفيين وبتوع احنا اسفين يا ريس لو سمعوا اللي اتقال في تويت ندوة يا اما هايقتلوا نفسهم او هاينزلوا التحرير حالا.. فعلا الانتهاكات اللي اتحكت والنضال اللي اتعمل قبل وبعد الثورة يتكتب فيه كتب مش بس ندوة.. وممكن يوحد ويحشد الشعب بصورة هائلة

اللي نفسي الناس تطلع بيه من الكلام اللي اتقال في الندوة ان اللي في التحرير مش بلطجية.. الثوار مش بلطجية.. هي دي الناس اللي في التحرير.. اللي بيدافعوا عن الحق لكل الناس مش ناس اه وناس لا.. لأن مفيش حاجة اسمها ده بلطجي ومالوش حق.. لازم احترام انسانية كل البشر.. وكمان نفسي الناس تعرف انك مش شرط تكون م المشاهير عشان تدافع عن قضية وتتبناها.. ممكن تعمل حاجات كتير م الكنبة اللي انت قاعد عليها والكيبورد والماوس اللي ف ايدك.. بس اهم حاجة هو النزول للشارع

والله الموفق يا متوتين

وكل تويت ندوة وانتم طيبييييين

صور من تويت ندوة
فيديوهات البث المباشر: فيديو 1، فيديو 2

No comments: