Thursday, July 21, 2011

الشهداء ماتوا ليه؟

كل يوم تقدر تسأل نفسك:  الشهداء ماتوا ليه؟ هل اللي نزلوا شايلين كفنهم ومات منهم مئات واتصاب الوف حققوا اللي كانوا نازلين عشانه؟؟
هل اللي قتلوهم اتحاكموا؟ هل تمت محاسبة الداخلية وامن الدولة في جرايمهم؟ لا طبعا، عيب، دول حتى رقوا وائل الكومي!!ـ
 خالد سعيد؟ القديسين؟ سيد بلال؟ رامي فخري؟ حقهم فين يا ثورة؟؟ وغيرهم من ضحايا التعذيب والقتل الغير مبرر قبل وبعد الثورة كمان!!ـ

احنا اصلا عمالين نقول يسقط النظام مش رأسه بس - اللي هو المخلوع - طب وهو احنا فعلا اسقطنا المخلوع لما هو لسه قاعد في شرم الشيخ والمصابين مش لاقيين علاج؟؟ ولما المحكمة تحكم ان اسمه مايتشالش من الميادين والمؤسسات، اللي هي اكتر من نص البلد يعني اسمها مبارك وسوزان اساسا؟!؟!؟ـ

طب يا ترى الشهداء ماتوا ليه؟؟

مع كامل احترامي للحاجات اللي هاقولها والناس اللي هاذكرها، بس مش ده السبب اللي الشهداء ماتوا عشانه

الشهداء مماتوش عشان نسمع رامي عصام ونتفرج ونقهقه على منى توف ودكتور باسم يوسف
الشهداء مماتوش عشان نرسم جرافيتي ونمسحه ونكتب عليه الله اكبر ونتخانق 
الشهداء مماتوش عشان نشتري تي شيرتات مكتوب عليها ثورة 25 يناير
الشهداء مماتوش عشان الأمن الوطني يفضل مراقبنا لحد دلوقتي - ايوه انت ياللي بتقرا!ـ
الشهداء مماتوش عشان نسمي نفسنا نشطاء على تويتر وكل واحد يفتحله مدونة ثورية
الشهداء مماتوش عشان كل واحد يحط صورته جنب الدبابة على الفيسبوك
الشهداء مماتوش عشان كل واحد ينزل مظاهرة يتصور وهو ماسك علم مصر وعامل علامة النصر بصوابعه
الشهداء مماتوش عشان ندهن جذوع الشجر والرصفان بعلم مصر
الشهداء مماتوش عشان الناس تركن في الممنوع وتقوللك دي حرية الثورة ونعد نشتم في الثورة واللي عملوها
الشهداء مماتوش عشان  فلورا وفاين ينزلوا علم مصر على بواكي المناديل
الشهداء مماتوش عشان نتهم وائل غنيم والبرادعي بالخيانة ونعد نتفرج على عكاشة وهو بيتكلم على دكر البط
الشهداء مماتوش عشان نعد نجاوب على أسئلة مستفزة مثيرة للفتن على الفيسبوك ونعمل استطلاعات رأي "هطلة" عن ايه رأيك في تغيير النسر اللي في العلم المصري بمش عارف ايه!!ـ
 الشهداء مماتوش عشان نحاكم المدنيين عسكريا
الشهداء مماتوش عشان نعمل قانون يقيد حريتنا ويجرم الاعتصامات

نسأل تاني.. طب الشهداء ماتوا ليه؟؟

الشهداء ماتوا عشان يكون فيه عيش وكرامة وحرية وعدالة اجتماعية للجميع
الشهداء ماتوا عشان الداخلية تتحاسب وتتطهر وأمن الدولة يمشي بتعذيبه وقتله وجرايمه ويبطلوا يراقبوا تليفوناتنا
الشهداء ماتوا عشان  يكون في حد ادنى واقصى للأجور
الشهداء ماتوا عشان الاعلام يكون حر ونزيه
الشهداء ماتوا عشان يبقى عندنا حكام ثوريين --- مش اللي ينتقض حاجة يتشال م التشكيل الوزاري
الشهداء ماتوا عشان تطهير الفساد في كل المؤسسات المدنية والحكومية والقضائية وكله كله!!ـ
الشهداء ماتوا عشان مايكونش في محافظين ووزراء فاسدين
الشهداء ماتوا عشان يكون فيه مشاريع للشباب ومراقبة ع الاسعار 

وعشان كده: الشارع هو الحل.. انزل الشارع.. طالب بحقي وحقك

الثورة تملي مطالبها - الثورة تقوم بتغييرات جذرية ولا تطالب اصلاحات - انت تقول وانا اقول والثورة تفعل ما تريد

الثورة فوق الجميع - دم الشهداء فوق الجميع - لا تتاجروا فيه

الثورة مستمرة - نختلف، نتحاور، نتفق، ولكن لا نترك الميادين

No comments: