Friday, July 8, 2011

ملاحظات على يوم 8 يوليو في اسكندرية

بقالنا من امبارح بنقول مفيش مسيرة في اعتصام.. فعلا كله راح القائد ابراهيم وماحدش مشي

اللي حصل بقى ان الاخوان ومعاهم ناس من 6 ابريل حبوا يقودوا مسيرة لغاية الابراهيمية وبعدين لف وارجع تاني.. خدوا معاهم طبعا ناس وراهم لأن محدش فاهم، يقوللك نمشي بنمشي وراهم.. لغاية الابراهيمية وقفوا واحد قال للناس ترجع، مش كل الناس رضيت ترجع، اتخانقوا،  رجعوا القائد بعدد اقل بكتير، وعدد ضئيل كمل للمنطقة الشمالية وبعدين روحوا  - ادي التشتيت اهو.. وانا شفت بنفسي الولد اللي كان واقف يقول للناس لف وارجع والناس اللي كملت واللي روحت

في مسيرة حشد طلعت من الشباب الغير منتمي لأي فصيل سياسي وراحت ع المنشية ورجعوا بالناس اضعاااااف اضعاااف والوف مؤلفة.. وابراهيم كان فيها

نرجع للقائد تاني.. فوجئنا باعتصام عند سعد زغلول في الجنينة.. ليه يا جدعان؟ اهالي الشهداء عند القائد ابراهيم وعملنا اكتر من مسيرة في الايام اللي فاتت معاهم عشان الناس تروح تعتصم معاهم، دول هايموتوا على حد يقعد معاهم، وبيتحايلوا ع الناس فعلا!ـ

الجنينة اللي في ميدان سعد زغلول فيها اصحاب المصالح من القوى السياسية... الاخوان جروا وراهم الناس من القائد بالعربية ووقفوا في الميدان وبعدين العربية انسحبت قبل ما الليل يليل وعملوا باي باي للناس.. يعني يا ثورة فوتي علينا بكره

حمدين صباحي  لقينا نسخة من دعاياه الانتخابية في الجنينة اللي في سعد زغلول، مش عارفين اتوزعت النهاردة ولا قديمة

اصحاب المصالح في الجنينة كان اكثرهم استفزازا هم المصريين الاحرار.. مانعين اي حد يدخل الخيمة غير اعضاء الحزب ولابسين تي شيرتات وكابات.. دخلت انا وماجد الخيمة نشوف هايحصل ايه.. راحوا طلعوا كل الناس وواحد زعق كده ف وشنا قال: " ايييه انا مش فاتحها مؤسسة خيرييييييييييييية".. قلتله صح، المفروض اللي يدخلوا اعضاء الحزب بس (ايوة جرجرته) وسألته انت عضو في الحزب، قاللي ايوة!ـ


شوية يا عم والناس مسكت بتوع المصريين الاحرار بتي شيرتاتهم وكاباتهم وغسلتهم وقالولهم انتوا جايين مصلحة، راح واحد منهم قال: احنا هدفنا هو انجاح الثورة، قالوله ماكونتش لبست تي شيرت الحزب

انا صورت جزء م الحوار ده فيديو

المصريين الاحرار بعد منظرهم ما بقى وحش شالوا اليافطة اللي على باب خيمتهم، بس على مين، كنت صورتها خلاص



حزب الوفد برضه كان حاطط يافطة على باب خيمته وشباب ائتشيلاف الثورة.. و6 ابريل كانوا موجودين بتي شيرتاتهم، ولو اني قريت انهم كانوا هاينزلوا عادي مش هايحطوا اي شعارات ليهم

حزب فجر الثورة وزع ورق عند اعتصام اهالي الشهداء.. مين الحزب ده ؟ الله اعلم.. المهم ان كله عايز يركب الموجة ويلحق نفسه



طيب ادي التشتيت والخيانة، شتتوا مكان الاعتصام، فسحوا في الناس يمين وشمال، وزعوا وعلقوا شعارات احزاب رغم الاتفاق انه لا.. شوية يقولوا ارجعوا ، لا ماترجعوش، طب روحوا، ماتروحوش...يا سيدي ماتعتصمش، ماتعملش حاجة، خليك في بيتكم.. بس ماتضيعش مجهودنا وتشق وحدة الصف وتعد تمشور في الناس يمين وشمال فيروحوا بيوتهم وطظ في الاعتصام

اهالي الشهداء القعدة معاهم  تشرح القلب وتحس انك في بيتك، يدوك مياه والخيم بتاعتهم مفتوحة للكل، وهتافاتهم ضد المشير والداخلية ومش بيخافوا لأن ماعندهومش حاجة يخسروها اكتر من اللي خسروها، دول بينضفوا الارض كل شوية عشان الناس ترضى تقعد معاهم!! ده غير اصدقائنا اللي في الجونينة ف سعد زغلول تماما، القعدة خنيقة جدا وعاملين مسرحيات في الميكروفون زي سينما الاطفال كده

انا ولا هدفي اني اهاجم الاخوان ولا المصريين الاحرار ولا دياولو.. انا لا انتمي ولن انتمي لأي حزب سياسي وهافضل مستقله لأن واضح ان ده بيزود مصداقيتي وحيادي!!! انا مش عايزة حاجة م الدنيا غير حق الناس الغلابة دول اللي حاسة انهم حتة مني وباحبهم قوي...عشان كده، اعزائي اصحاب المصالح من القوى السياسية.. لموا نفسكم.. مش وقتكم.. الثورة أولا، مصر أولا


الصور اللي صورتها

17 comments:

Mohammad Abdelaziz said...

أنا مش هجادلك كتير .. حقك تفضلي مستقلة لو مصداقيتك مهمة عندك .. إنما مش من حقك تشتمي 6 أبريل و الإخوان لأن ببساطة لولا 6 أبريل و لولا الإخوان (بعد فضل ربنا طبعاً) ما كنش هيبقى في ثورة أساساً .. 6 أبريل كانوا بيتمسكوا و يتبهدلوا من أمن الدولة و الإخوان بردة .. أظن لو نزلتي اعتصام سيدي جابر يوم واحد كنتي عرفتي نسبة الإخوان فيه كانت قد إيه و لو كنتي متابعة أخبار الثورة من قبلها بكام شهر كنتي عرفتي يعني إيه 6 أبريل .. الناس دي ضحت بجد و اتبهدلت بجد .. الناس اللي أنتي بتقولي عليهم مشوا ورا الإخوان كأنهم قطيع دول .. كانوا عارفين إن دي عربية إخوان و مش فاهم مين اللي إدالك الحق إنك تقرري إن في اعتصام .. ليه مش مسيرة و بعدين اعتصام؟ .. يعني أنتي عايزة تقرري إن مفيش مسيرة و الناس كلها تمشي وراكي؟ طب ما نفس اللي بتنتقديه في الإخوان

Evronia said...

الاعتصام في القائد ابراهيم موجود بالفعل من فترة واهالي الشهدا هما اللي قاعدين وتعبانين والاعتصام ده عشانهم اصلا وفي منظمين للاعتصام ده وهما اللي دعوا للاعتصام وقادوا الموضوع مش انا عشان بس تبقى عارف.. انا ماشتمتش حد وكل واحد دورة في الثورة معروف، وكمان دوره دلوقتي واللي بيعمله معروف.. وانا مش محدثة ثورة وعارفة كويس مين كان فين .. ومحدش بيدافع عن الاخوان النهاردة غير نفسهم وبالتالي انا مش هاقول اكتر من اللي قلته لأن كل واحد مقتنع باللي في دماغه

Evronia said...

وياريت بلاش دور ان الاخوان شهدا و هما و بس .. كلنا اتظلمنا في النظام القديم .. الدور والباقي ع اللي بيحصل دلوقتي من تجميع اكبر كمية مكاسب ممكنة

Mohammad Abdelaziz said...

و على فكرة دلوقتي حالاً .. الساعة 12:12 اللي هو أنتي في البيت بتكتبي النوت .. إخوان هندسة إسكندرية معتصمين في التحرير و في نسبة من الإخوان مشاركة في الاعتصام .. هما حرين يشاركوا بالنسبة اللي هما عايزينها

Evronia said...

ياريت متزايدش على وطنيتي لأن انت كده دخلت ف سكة غلط معايا

Mohammad Abdelaziz said...

لا يا فندم مش بزايد على وطنيتك و لا حاجة .. أنا بقولك إن في حاجات مش شايفاها .. اللي هي إن في إخوان دلوفتي مشاركين في الاعتصام .. و أنتي مش حتشوفيهم أبداً لأنك مش هناك
.
+
.
أنا ما قولتش إن الإخوان شهداء و بس .. أنا بقولك 6 أبريل قبل الإخوان و قوى وطنية كتير من اللي أنتي بتقولي عليهم قوى سياسية وحشين دول .. ضحوا بحاجات كتير علشان الثورة .. و مش من حقك تاني إنك تقولي اعتصام من غير مسيرة .. كدة عايزة تفرضي رأيك الشخصي على ربع مليون بني ءادم .. اللي هما الإخوان ضحكوا عليهم و مشوهم وراهم زي القطيع يا عيني

Evronia said...

انت كمان مش هناك بس انا اعرف ناس كتير هناك.. وع العموم براحتك :) قول اللي انت عايزه.. الحقيقة في الاخر واحده مابتتغيرش.. وده اسلوبكم دايما انا اتعودت عليه خلاص في المناقشة

Mohammad Abdelaziz said...

أنا ورايا مشروع تخرج يا فندم و أنا ما عملتش بوست أشتم فيه القوى اللي مختلفة معايا :)
+
أنا آسف لو أسلوبي كان شديد شوية

Evronia said...

دي حرية شخصية في التعبير عن رأيي، مدونتي اعتقد ولا ايه؟؟
وبعدين فين الشتيمة؟ انت جاي عليا وبتقوللي شتيمة؟ تحب تشوف الشتيمة بتاعة الاخوان على تويتر النهاردة عاملة ازاي؟؟


وربنا معاك في مشروع التخرج

Mohammad Abdelaziz said...

مش مبرر إن الإخوان يشتموا تقوي أنتي كمان شاتمة :)

بس طبعاً محدش يقدر و لا عايز يحرمك من حريتك الشخصية في التعبير عن رأيك :)

و الاختلاف في الرأي جيد طالما ابتعد عن التخوين و التفسيق

farag505 said...

@Mohammad Abdelaziz
حضرتك بالنسبه للاسكندريه بالنسبه للاخوان و6 ابريل الاسكندريه مش هما بس الي كانو بيتضربو 6 ابريل اسكندريه كانت من اقل الناس الفكره من قبل الثوره والاخوان قبل كده في مظهرات خالد سعيد المحاكمه التانيه رفضو المشاركه في المظهرات عشان الناس كانت رفضه انها متقلش يسقط يسقط حسني مبارك انا بس حبيت اعلق على تعليق بسيط حضرتك قلته لا الاخوان شهدا ولا 6 ابريل شهدا ولو الاخوان مشيوش على راي الاغلبيه فهما غلطنين وكزالك 6 ابريل اما بالنسبه للاعتصام فاظن ان اساس اليوم معمول لاهالي الشهدا الي كانو معتصمين اصلا من حوالي 4 او 5 ايام في القائد ابراهيم مينفعش تقلهم تعلولنا والنبي وبالنسبه للنوت انا متفق معاكي جدااا في تعليقك على اليوم وعيوبه بالنسبه للاسكندريه

Hossam Sharara said...

Thanks Evronia for being there, and for being honest in your reporting...

Yosra said...

Evronia,

I saw what happened today from another point of view. I maybe wrong but I think your analysis could be biased somehow.

About the Sit-in place, we all went to support the Martyrs families but I think putting the Sit-in the their place would not have been correct. First, the place is too small compared to Saas Zaghloul SQ. Second, they have their sit-in on the PAVEMENT, which would have definitely blocked the streets if more people (thousands as we have hoped) had joined. Finally, I talked to some of the Martyrs family and they considered the sit-in in Saad Zaghloul a great way of support. I think the sit-in in that place is not a bad idea or a conspiracy in anyway.

I won't talk about MB cause I talked to none of them but the 6 April movement (and I don't belong to any movements) marched from Qaed Ibrahim to gather more people and they did return with more numbers.

Evronia said...

i know what you mean, i did talk to some of the people responsible for organizing the sit in at qaed, they said that the other sit in will help them of course but it is definitely something they didn't agree about, so they felt let down that things went that way, however, i believe they will try to negotiate an agreement, and i know that the garden is more comfortable, but i feel the ppl there weren't as welcoming as the other sit in! :S
i believe that if it is not a conspiracy, then they should be able to convince everyone to move along in 1 place, and i hope this happens..

Amir said...

وطب وايه الحل مع الناس دى؟

Mohamed_EzEldin said...

وده اللي حصل واتعاركنا مع الاخوان انا واتنين كمان عشان اليفط ولو سمحتي ضيفي دوا عاى البوست ده : حزب العدل - البداية - الكرامه -المصريين الاحرار - 6 ابريل لانها نزلت بشعارها

مدونون بلا قيود said...

بعد التحية ..
تم اضافة مدونتكم الى ـ مدونون بلا قيود ـ
وسوف ننشر مواجز وروابط لكل تدويناتكم خلال نصف ساعة من نشركم لها
لمزيد من التفاصيل http://modawenon.tumblr.com/icq
ولكم فائق الحرية والاحترام