Saturday, July 23, 2011

الجمعة 22 يوليو: موقعة سيدي جابر

أولا: الي المجلس العسكري... الشعب خط احمر

انا مش قادرة احكي.. انا تعبانة ومنهكة جسديا ونفسيا...وحكيت حاجات كتير على تويتر عندي.. بس ناس كتير عمالة تسألني وتطلب مني اللي حصل .. فهاحكي وهاسجل الكلام ده احقاقا للحق وتدوين للتاريخ واشهدوا انتوا...وهزود على البوست ده أي صور وفيديوهات عن الموضوع كل ما تيجي

 انا نزلت على ملا وشي لما عرفت ان العدد قليل عند المنطقة الشمالية والدنيا متوترة ونظرا لارتباطات شخصية عندي ماحضرتش المسيرة م الاول وده كان على عيني طبعا

كنت حاسة ان في حاجة هاتحصل ، لبست كوتشي ونزلت.. الدنيا كانت هادية والمتظاهرين كانوا بدأوا في قفل الطريق - يمكن كان معاهم مندسين لكن انا شخصيا اعرف ناس منهم - يعني قفل الطريق كان حركة تصعيد وضغط مش بلطجة.. اهالي الشهدا كانوا معانا وعشانهم احنا اصلا عاملين المسيرة دي، لأن امبارح انا اتكلمت مع بعض منهم وكانوا حاسين ان الاعتصام اصبح لا يمثل اي ورقة ضغط ولا يحقق اي مطالب.. وحسينا بتخاذل شديد من ناحيتهم.. فدعينا للمسيرة

المهم، ناس كانت مع قفل الطريق وناس لا..  والطريق كان بيتقفل شوية ويتفتح لعربيات الاسعاف والموتوسيكلات كانت بتعدي بين الحواجز..اعداد الشرطة العسكرية فضلت تزيد والدنيا بدأت تتوتر اكتر

شوية وسمعنا دوشة من اتجاه شارع المشير وميكروفون: الجيش والشعب ايد واحده!!ـ  وبعدين بعدنا شوية وكنا مجموعة كبيرة مع بعض عارفين بعض .. ودي تويتة من محمد  عن اللحظات دي، بيقول" ناس بدقون ضربتنا بالسيوف والسنج ولما ابتدينا نسيطر الجيش دخل وبعد كدة الجيش ضربنا" .. اول مرة جرينا.. ومكانش في حاجة كبيرة بتحصل ، قلنا مجرد تخويف ولقينا بعض الناس بتجري رحنا جرينا..  وبعدين الدنيا هديت، ورجعنا تاني نقف مكاننا.. وبعدين الطوب اشتغل، وساعتها كلنا جرينا تجاه شارع بورسعيد وبعض منا روحوا البيت منهم انا... الطوب كان بعيد عني جدا ومحدش جراله حاجة من اللي كانوا معايا، فمحدش يقلق.. لكن انا اول مرة اعيش اللحظات دي وكنت هايبة الموقف جدا




كان في ناس طول الوقت بيغمى عليها من التعب والحر والتوتر.. محدش حاول يقتحم المنطقة الشمالية ولا حد جه جنبهم  ولما كان حد بيحاول يتهور كان المتظاهرين بيمنعوه

 اكتر من 7 من صحابي فضلوا هناك، تابعتهم على تويتر و ع التليفونات.. واللي حصل بعد كده، كان ان البلطجية بقوا في ناحية، والجيش والمتظاهرين في ناحية تانية .. والجيش دخل بينهم يفض الموضوع

ودي صور  من الحدث

فيديو لهجوم البلطجية  اللي بدقون 
فيديو لتعامل الشرطة العسكرية أثناء هجمة البلطجية
فيديو لمحاولة فض الاشتباك 


الجدير بالذكر ان دول بعض من اللي ظهروا في الفيديو بيشتغلوا في محل الصعيدي المعروف وده اليونيفورم بتاعه.. في رواية بتقول ان بلطجية كسرولهم الواجهة بتاعة المحل وناس اقنعوهم ان المتظاهرين عملوا كده فحرضوهم يخرجوا علينا





البلطجية تقريبا خلاص دورهم انتهى هنا.. كانوا ذريعة لفض التظاهر... شوية والشرطة العسكرية بدأت تزق الناس ناحية البحر وتطاردهم وتضرب نار والناس تجري ع البحر وسط العربيات


في ناس اتصابت وفي ناس اتعالجت منهم في مستشفى الشفا وراس التين

البحر اتقفل واتفتح كذا مرة وكله في المنطقة سمع ضرب النار و شاف الناس وهي بيشيلوها من ع الارض

الصور اللي فوق ماجد اللي صورها ودي تويته منه عن الموضوع من ضمن تغطيته للي حصل :ـ
 واحد ظابط بلبس صاعقه و عساكر كانو بيجروا ورانا و كلهم مشهرين سلاحهم فى ضهرنا و بيقولوا: امشو يا ولاد ال*** امشو يا ولاد **** يا م******..


دخل 6 او 7 شرطه عسكريه وسط~10 متظاهرين و جابوا واحد من النص و سحلوه عل الارض و هدومه طلعت ف اديهم و جرجروه برضه


فوراغ الرصاص الحي .. صور من محمد


دايما يدسوا بلطجية والبلطجية يمشوا فيضربوا وبعدين يقولوا ضربنا بلطجية.. دلوقتي بيقولوا ماضربناش.. طيب ايه؟؟ صواريخ وازايز كاتشاب يعني اللي كانت مع المتظاهرين؟؟؟  صورة تانية للرصاص النهاردة من محمد


 اي حد هايزايد علينا ويبرر عنف الشرطة العسكرية مايحاولش يكلمني لأن في ناس كانت هاتموت النهاردة بطريقة او بأخرى .. يا اما من الخوف او من الضرب من بلطجية  ومحدش حماهم، او من الجيش او من العربيات المسرعة ع الكورنيش والشرطة العسكرية بتطارد الناس تجاه الكورنيش

انا مش من انصار: لو انتوا عدد قليل روحوا بيوتكوا متتظاهروش، لأن اهالي الشهداء محدش واقف معاهم، والتظاهر ورقة ضغط قوية، فياريت بلاش نخترع اسباب ومبررات لأن القائم على حمى بلدك يضربك بالشكل ده ويعتقل حبة وفي الاخر يقول انا ماعملتش حاجة.. لو عايز تلوم حد، لوم اللي ساب عددنا قليل وسابنا عرضة للبلطجة سواء في الاعتصام الكرنفالي اللي في سعد زغلول او في المظاهرات والمسيرات، من غير ما نحقق اهداف الثورة.. ـ

انا ولا بادعو للصدام مع الجيش، ولا بادعو أو أؤيد أي عنف أو صدام مع الجيش، لكن يا ناس عايزين حقوقنا، لو عندك عيل مات في الثورة هاتعمل ايه؟؟؟؟ قوللي هاتعمل ايه وانا اعمله!ـ






موضوع البنات اللي يتضربوا ده اتكلم عنه نور وقال انه العساكر رفضوا يضربوا فقام  نائب المنطقة الشمالية ضربهم بنفسه !!!ـ ونور برضه قال ان ده كان السبب ان الناس مارضيتش تمشي وتفض الوقفة.. هو كتب شهادته هنا على عهدته - مع تحفظي على بعض الالفاظ


تحديثات:ـ
صورة لواحد من ذوي الاحتياجات الخاصة لسه خارج م المنطقة الشماليه الساعه 3 الفجر دلوقتي وانا باكتب.. وهو اول واحد خرج 

تحديث من محمد بركاتﻣﻌﺘﻘﻞ ﻋﻨﺪﻩ 16 ﺳﻨﺔ ﻭ ﻓﻲ ﺟﺴﻤﻪ ﺍﺛﺎﺭ ﺑﻴﺎﺩﺓ ﻭ ﺧﻠﻮﻩ ﻳﺒﺼﻢ ﻋﻠﻰ ﺍﻗﺮﺍﺭ ﺑﺎﻧﻪ ﺗﻌﺪﻯ ﻉ ﺍﻟﺠﻴﺶ ﻓﻲ ﺍﻟﻤﻨﻄﻘﺔ ﺍﻟﺸﻤﺎلية
  


تويتات محمد بركات عما حدث داخل المنطقة الشمالية -  هو لم يكن من ضمن المجوعة التي دخلت المنطقة




تحديث:ـ
شهادة والدة بتول حول ما حدث فى المنطقة الشمالية  



تحديث:ـ
شهادة مريم عن أحداث اليوم قبل ما أنا اوصل 

شهادة اشقر عن أحداث اليوم


اخيرا... بجد يعني..الناس في مصر بتعتبر الضرب والسحل والتعذيب ايه، رفاهية؟؟ مفيش اخلاق؟ مفيش دين؟ مفيش مخ؟؟؟ 

يعني انت ممكن تختلف مع ناس نازلة في مظاهرة او دياولو.. لكن لا يمكن نختلف على حقوق الانسان في معاملة كريمة بدون ضرب وتعذيب



احنا مقدرين الجيش المصري بس حقوق الانسان مش بتتجزأ.. لا للتعذيب.. الدم خط احمر.. الشعب خط احمر

1 comment:

mohamed hesham said...

شكرا على التغطية