Wednesday, June 29, 2011

حقوق الانسان والبلطجية والاعلام الفاسد


قمة الاهانة انك لما تشوف واحد شكله بسيط بيطالب بحقه تقول عليه بلطجي.. خصوصا لو فقد حد من احبائه في الثورة وماخدش فيه عزا ولا خد حقه لغاية دلوقتي.. ومش لاقي ياكل.. والدنيا كلها بتقولله انه بلطجي وبيعمل اعتصامات فئوية... فئوية ايه لما الشهداء واهاليهم اهم من اي حد تاني؟ دول ضحوا بأهم ماليهم عشان حرية حضرتك؟ فئوية ايه لما الداخلية لسه فسادها هو هو؟ فئوية ازاي لما الثورة دي قامت عشان العيش والكرامة؟؟


انا ماكنتش في التحرير..وبغض النظر عن اشتباكات وزارة الداخلية وكمين مسرح البالون والكلام ده..  التحرير والمطاردة اللي حصلت فيه "للثوار" مش بلطجية..في ناس كتير انا باثق فيها كانت هناك.. وانا مش محتاجة ناس تحكيلي على بلطجة الداخلية وانتهاكها لحقوق الانسان لما يكون في صور وفيديوهات تثبت ده


 وببساطة انك تشهر سلاح في وش اعزل ده انتهاك لحقوق الانسان 


انك تضرب غاز مسيل للدموع على متظاهر اعزل انتهاك لحقوق الانسان 


انك تضرب رصاص وخرطوش ومطاطي على ناس عزل ده انتهاك لحقوق الانسان 


طب والمولوتوف جه منين في الميدان؟؟ في ناس كتير من اللي كانوا امبارح في الميدان كتبوا على تويتر ان المولوتوف عميله ف 3 دقايق ممكن ومش محتاج تصنيع يعني!!!ـ 


ناس عايزة تدافع عن نفسها ضد اقذر جهاز في الدولة جهاز الداخلية الفاسد .. يعلموا ايه يعني؟؟ 


اللي مش مصدقني يقرا اللينكات اللي في اخر البوست واللي مش عايز يصدق بلاش يصدق بس مايقولليش بلطجية !ـ

انتهاك حقوق الانسان مالهوش دعوة بلطجية ولا مش بلطجية يا بشر.. فوقوا بقى م العبودية احنا مش كلاب


ولسة في لينكات كتير جدا وصور كتير.. بس انا باحاول اوضح لكم وجهة نظري


الاعلام اقنع وبجدارة كل الناس اللي في البيوت امبارح ان اللي في  الميدان بلطجية في الوقت اللي الناس اللي في الميدان كانت بتكتب مباشرة على تويتر وتنشر صور ويجروا ويصرخوا.. لكن نقول لمين!!!ـ


انا باعتبر الثورة بتبدأ... مفيش اي مبرر بالنسبة لي في الدفاع عن الداخلية اللي عمرها ما حميتنا لكن على طول بتضربنا.. مفيش اي مبرر للسكوت على انتهاكات الشرطة وأي انتهاكات لأي جهاز في الدولة.. مفيش اي حاجة تجبرنا نستحمل القمع ده تاني.. مفيش حاجة  ممكن تسرق  الثورة طول ما احنا موجودين في الشارع والميادين


الفقراء اولا.. حق الشهداء ومحاكمة قتلتهم.. علاج المصابين والاهتمام بهم.. بس كده


شوية كلام كان واقف في زوري .. يمكن مالهوش معنى ولا قيمة ولا أهمية.. بس كان لازم اقوله

No comments: