Wednesday, June 1, 2011

لع للمحاكمات العسكرية للمدنيين..دي حقوق انسان يا جدعان..كلاكيت عشرتاشر مرة

من 8 ابريل ومن قبلها كمان واحنا عمالين نقول لا للمحاكمات العسكرية للمدنيين.. المدني حاكمه مدني والعسكري حاكمه عسكري..بس يظهر الجيش مصّر يفرض احكام عرفية في الموضوع ده دون اعلانها والله الأعلم والموفق..لأن الاحكام العرفية هي اللي بتسمح بالغاء العمل بالقوانين المدنية -وده ماحصلش طبعا - وان كل المحاكمات تبقى عسكرية كده


بس احنا بقى بنقول لععععع ، بنرفض وبشده

انا مش بتاعة قانون ولا باعرف ارغي فيه.. بس اللي اقدر اقولهولك ان محكمة عسكرية يعني ممكن تتحاكم في نص الليل من غير محامي ومن غير ما اهلك يعرفوا وتتنش تأبيده زي الفل وانت مش واخد بالك مين طفى النور

محاكمة عسكرية يعني في الأغلب مش هاتقدر تداقع عن نفسك.. حكم سريع.. ممكن يكون ظالم للمدني في معظم الاحوال
والفيديو ده بيشرح اكتر عن الموضوع 


انا ضد المحاكمات العسكرية للمدنيين، حتى لو كانوا حرامية وقتالين قتلة او شباب ثورة او "بلطجية مندسين" على رأي المجلس الأعلى

عندنا احكام مدنية، عندنا محاكمات مستعجلة، عندنا قضاة ممكن نطهرهم ويحاكموا الناس دي .. ومحامين يدافعوا عنهم.. وممكن في خلال المحاكمات، يشرفوا في اي سجن او مستشفى في اي منتجع "انا مش بالقح كلام على حد لا سمح الله" ـ وده حق اي مواطن: محاكمة عادلة ومحامي يدافع عنه.. أظن مش بنطالب بشيء مستحيل، دي حقوق انسان يا جدعان!!ـ

في مظاهرات 8 ابريل نزلنا وزعنا الورقة دي في مظاهرات اسكندرية والجيش وصلتله نسخه، ومسكنا يفط، ونزلنا للموضوع ده تاني يوم 27 مايو.. طب ايه الحكاية؟؟ مش قادرين نفهم يعني ليه اصرار المجلس الأعلى على ادارة موضوع المحاكمات بالطريقة دي

طب احنا بعد اذنكم بقى بـ "نلتمس" من الجيش بكل ادب وذوق واحترام وتقدير وبوسة من هنا ومن هنا باعادة محاكمة الناس اللي اخدت احكام عسكرية، وبنطالب بالافراج عن المعتقلين من "شباب الثورة الشرفاء" .. بس اللي يكون معاهم كارنيه الثورة فقط لا غير.. ويشترط يكون معاهم مؤهل عالي عشان مايتقالش عليهم بلطجية، ولو بنت، تروح تثبت انها بنت ، او تخطف رجلها زيارة للمتحف المصري!ـ

الأهم بقى، ان انا مش بس ضد المحاكمات العسكرية للمدنيين، انا كمان ضد ان أي مدني يجيله استدعاء مثول أو تحقيق أمام النيابة العسكرية، خصوصا لو كان الموضوع بسبب حرية التعبير أو الرأي -اللي هما برضه من حقوق الانسان!-، والأمثلة كتيرة آخرها استاذنا حسام الحملاوي اللي راح امبارح قدام النيابة العسكرية عشان شوية "دردشة" هاهاها بالذمة؟؟ 



طب بالمرة بقى عايزين نعرف آخر أخبار التحقيق في موضوع رامي فخري ايه؟ اللي هو فعلا لازم يتحقق في موضوعه في نيابة عسكرية بس مش سامعين لا حس ولا خبر عن الموضوع؟؟!!  ـ

هاسيبكم في الاخر مع حكاية احد ضحايا المحاكمات العسكرية

وكل التقدير والاحترام مني شخصيا لـ منى سيف اللي بتقود بقوة حملة كبيرة "لا للمحاكمات العسكرية للمدنيين" ـ

كل المعلومات عن المحاكمات العسكرية والمعتقلين في المدونة دي 

ماتنسوش صفحة "كلنا افرونية" بقى لما يجرالي اللي هايجرالي ع الكلام ده... هاهااا

والله الموفق 

1 comment:

Mina Soft said...

المقال جميل .. استمرى فى الكتابة وكل يوم هتلاقى متابعين اكتر :)

علشان تكونى صورة متكاملة عن اللى بيحصل الفترة دى لازم تتفرجى على الفيديو ده

http://www.youtube.com/watch?v=1BVEecuz9Hg

" طب احنا بعد اذنكم بقى بـ "نلتمس" من الجيش بكل ادب وذوق واحترام وتقدير وبوسة من هنا ومن هنا "

البوس حرام شرعاً :P

Just Kidding :D