Monday, May 16, 2011

Ramy Fakhry

رامي فخري.. شاب مصري في العشرينات... مهندس.. رايح شغله... اتضرب رصاص من الجيش، مات



ده اللي يهمني في الحكاية.. كسر كمين، الجيش كان بيطارد بتوع مخدرات، وقف بعربيته، ما وقفش بعربيته، كل ده لغو

المهم، ان رامي من يومين كان في وسطنا، دلوقتي مش معانا!! ليه؟ من غير اسباب

لحد امتى الدم المصري رخيص؟ لحد امتى كل لما حد يموت نندب ونطالب ونشجب وندين وفي الآخر ماحدش بياخد حق ولا باطل! ـ

رامي، في نظري، هو خالد سعيد بعد الثورة..ويمكن رامي يكون هو مفجر غضب الثورة المصرية مرة تانية، ويرجعنا نطالب بالكرامة والحرية والعدالة الاجتماعية

الجمعة 27 مايو هو اليوم اللي هاننزل نطالب فيه بحق رامي وحق كل المصريين اللي ماتوا غدرا بعد الثورة 

ع الهامش
ياريت اللي بيحولوا موضوع رامي طائفي ييجوا على جنب شوية، عشان احنا مش ناقصين فتن.. رامي رمز زيه زي أي شهيد في الثورة، زيه زي أي واحد فينا عايش النهاردة، وممكن مايكونش موجود بكره

اسأل نفسك بس، يا ترى لو مت  النهاردة، الناس هاتقول عليك كلام حلو زي اللي بيتقال على رامي؟ يا ترى أمك هاتزفك في الجنازة بالشمع زي ما مامة رامي عملت؟ يا ترى هاتأثر في كام واحد بموتك؟ يا ترى انت عايش ع الأرض بتقدم رسالة ولا لا، ويا ترى  حياتك بتأثر في كام واحد؟ عملت ايه لبلدك؟ عملت ايه للناس اللي حواليك؟

حب غيرك زي ما رامي كان بيحب الناس.. لما تبعد عنهم، هايعرفوا قد ايه انت عملت فرق في الدنيا
كلنا رامي فخري

1 comment:

John Essmat said...

7elo el kalam elly 3la el hamesh :)