Tuesday, May 10, 2011

ساعدوني يا ولاد الحلال نعاقب الناس بتوع امبابة

A Video for St Mary's Church in Imbaba, Cairo Being Burnt and Vandalized


  شايف الفيديو ده؟ شايف الصور دي؟؟
عايز تقول انا عايز سيادة القانون في البلد دي وكفايا طبطبة وبوس بين الشيوخ والكهنة؟ 
عايز تقول ان انت بريء من الناس دي وانهم لا يمتوا للدين بأي طريقة؟
عايز راس المحرضين؟ عايز عقاب للمجرمين؟ عايز ترجع حق الكنيسة لأهلها ولكل المصريين؟

ركز معايا

انا اخذت على عاتقى الجري والبحث ورا الناس دي والله الموفق

عايزين نعاقب الناس اللي في الفيديو

عايزين ناس بتوع جرافيكس محترفين يطلعوا وشوشهم ويوضحوها وهانروح للنيابة بالصور والفيديو
لازم لازم نساعد الدولة في تطبيق القانون واعلاء صوت العدالة
انا بعتت بالفعل الفيديو لاون تي في ويسري فودة
ووائل غنيم استجاب وحطه في لحظات على صفحة خالد سعيد ولما كتبت على فيديو هزار على مبارك كان منشور ع الصفحة التعليق ان "ناس في وادي وناس في وادي وياريت تنشر الفيديو ده بدل ما الصفحة مالهاش دور دلوقتي" فعلا في لحظات شال فيديو الهزار ده وحط فيديو الكنيسة على طول.. ولكن يبدو ان الناس اعترضت على الموقف انه نشر الفيديو كنوع من انواع عدم التهدئة، فشاله.. لكن في اي حال انا باشكره لأنه عايز يساعد البلد دي وبيحبها وبيسمع لأي حد بيطلب منه اي حاجة في مقدوره انه يعملها

في ناس كتير عايزة تساعد، وانا باحاول اوصل صوتي لأي حد ممكن يساعد

انت تقدر تعمل ايه؟

انشر الفيديو وساهم في طلب تحقيق العدالة وسيادة القانون.. انشر مش عشان الفتنة، عشان تقول انك مش موافق ع اللي بيحصل، وانك عايز الناس اللي في الفيديو ده تتجاب من قفاها


لو تعرف حد جرافيكس تقوللي

توعي الناس اللي حواليك بمدى أهمية دور العبادة ومفهومها وخصوصا عند المسيحيين، لأن المسيحي بيقدس الكنيسة أكتر من بيته، وعنده استعداد يتسحل ع الارض ويلحس التراب قبل ما يشوف عصايا واحده بتترفع جوا بيت ربنا

تنزل يوم الجمعة معانا في مسيرات تطالب بتحقيق العدالة وسيادة القانون في البلد.. وللمطالبة بمحاسبة رادعة لكل المسئولين الحقيقيين والمحرضين على الحوادث الطائفية بدءاً بنجع حمادي، ابو فانا، العمرانية، القديسين، اطفيح، المقطم، مارمينا بامبابة، السيدة العذراء بامبابة


واخيرا.. اهم حاجة تعملها.. انك تحب غيرك وتساعد اخواتك.. اخواتك مش اللي هما اصحابك.. لأنك لو حبيت الناس اللي بتحبك، يبقى ماعملتش حاجة! لازم تحب كل الناس حتى أعدائك


"
إن قال أحد: إني أحب الله وأبغض أخاه، فهو كاذب. لأن من لا يحب أخاه الذي أبصره، كيف يقدر أن يحب الله الذي لم يبصره ولنا هذه الوصية منه : أن من يحب الله يحب أخاه أيضا
"
Video of St. Mary Church in Imbaba, Cairo Being Burnt




وأخيرا.. الي كل من حرق الكنيسة أو افترى على بيت ربنا.. ربنا يسامحك، بنحبك، وبنصليلك.. والصلاة اقوى من الجبال.. ومع الصلاة، هانشتغل برضه وهانحقق العدل في بلدنا مصر.. اكيد مش مئات الناس تموت عشان نعد في الآخر نتخانق على شوية تفاهات.. خلينا نهمد والأهم اننا نبطل كلام ونشتغل كلنا لمصلحة وطن واحد لكل المصريين


Photos from the church after the attack

1 comment:

FEM4Ever said...

I hope they get caught and punished soon.
Will share and spread as much as possible.
God bless Egypt.