Thursday, April 14, 2011

خمسة اتهامات في انتظار مبارك.. احنا اسفين يا ريس



حد كان يصدق انه ممكن يشوف الاهرام كاتبة كده ف يوم من الايام؟ او اي جريدة تانية اساسا؟؟
الاهرام جريدة السلطة والتطبيل للحكم، بتاعة سرايا وصوره التعبيريه.. حد كان يصدق؟؟

ده مانشيت الاربعاء 13 ابريل 2011

انا مش حطاه شماته، اكيد مش هاصوره بالكاميرا وأعمل كل ده لمجرد اشمت.. انا بس حبيت اقول للناس بتوع "احنا اسفين يا ريس" انكم مش هاتلاقوا حاجة تتأسفوا عليها لأن مفيش جدوى تتأسفوا لمتهم، زيه زي اي واحد مجرم بيتحقق معاه في البلد

تاني حاجة، الناس اللي كانت بتهاجمني انا شخصيا او بتهاجم الثورة او بتهاجم اي حد بيقول اي حاجة على حسنى مبارك، وبتقول انه راجل كويس وزي الفل بس الناس اللي حواليه ضللته.. اعتقد فهمتم دلوقتي ايه وجهة نظرنا وليه كنا بننادي بسقوط مبارك وليه ماكناش عايزينه يعد لسبتمبر.. انت تقبل ان رئيس دولتك يقتل شعبك ويفضل رئيس ولو  ليوم واحد؟؟ ده كان زمانه دفن الثورة وساوى ميدان التحرير بالأرض وكان زماني انا وانت في أمن الدولة بنغني ظلموه!ـ

اما بقى الناس اللي بتقوللي انتي محرضة وثورية واللي بتعمليه ده حرام والمفروض تهدي الجو بدل اللي انتي بتعمليه ده، الي جانب الرد اللي رديته قبل كده على البلوج، فأحب اقول لكم ان انا باحب بلدي وشايفه ان فيها فساد قاتل، عشان كده قلت يسقط  حسني مبارك.. وانا فاكرة كويس ان اليوم اللي رجعت فيه النت بعد ما مبارك قطعها، وكتبت الكلام ده على الفيسبوك، شبه اتشتمت واتفضحت يعني، ومن ساعتها خرستوني وعملتولي ارهاب فكري

الناس اللي بقى بتحب تفتن وتقول بصوا شوفوا دي كاتبة ايه على الفيسبوك، احب اقول لهم ان انا مش باخاف من حد، وانا مش باعمل اي حاجة غلط  عشان تعيبني.. انا شاركت في الثورة بأقل القليل، واقل عيل في جمعة الغضب انا ماستاهلش ابوس جزمته لأني كنت جبانه وماقدرتش حتى اطلب اني انزل يومها حتى لو عارفة اني هاتمنع، بس انا فخورة اني لحقت اعمل حاجة في خضم مهاجمتكم الشديدة لي وللي باعمله... كفاية اني عملت صفحة مستقلة عشان اكتب فيها اللي انا عايزاه عن الثورة بدل ماكتبها على صفحتي العادية على الفيسبوك

الثورة قامت.. وانا بالثورة استرديت حريتي الفكرية وحرية تعبيري عن اللي انا عايزاه.. من هنا ورايح الكلام في السياسة مش حرام، ومحدش يبصلي كأني كائن فضائي عشان باتكلم في السياسة أو يقوللي "ايه ده، انتي ثورجية قوي كفاياكي مظاهرات خافي على نفسك" ... من النهاردة مفيش "مقالات شبه سياسية".. من النهارده هاكتب مقالات سياسية هبلولليه هندسية هرتليه، اي حاجة ان شالله بطيخية... انا حره في رأيي وأفعالي، ولك حرية التقبل أو الرفض

يا رب يدي لمبارك وليا طولة العمر لغاية ما اشوف الأحكام اللي هاتصدر ضده، وساعتها، هاقول لكم: انا كان عندي حق.. ده بس للناس اللي لسه مقتنعه ان مبارك ملاك وكان حاميهم من الناس الوحشييييييين وان المتهم بريء حتى تثبت ادانته

ربنا يسامح مبارك ويسامح كل طغاة العالم.. ويصبر أهالي الشهداء

احنا اسفين يا ريس.. حقك علينا اننا ماخلعناكش من زمان... خد بوسه 

♫♪♬  اخترناه وخلعناه، واحنا وراه لما شاء الله.. اخترناه وخلعناه


المجد للشهداء
ـــــــــــــــــــــــــــــــــــــــــــــــــــــــــــــــــــــــــــ

مقالات ذات  صله من سلسلة مقالات شبه سياسية بقلم ثورجية مصرية


No comments: