Friday, March 11, 2011

مقالات شبه سياسية بقلم ثورجية مصرية - ثقافة القطيع

مقالات شبه سياسية بقلم ثورجية مصرية





الجزء الثالث: ثقافة القطيع


رشحوا بطوط لرئاسة مصر - لا! بطوط بيمشي حافي وده حرام! 
كمان احنا جبنا صور - من مصدر مؤكــــد- لبطوط وهو في البحر واتضح ان المايوه اللي بيلبسه بيكيني، واحنا لن نتنازل ابدا عن ان مرشح مصر يلبس مايوه شرعي! 
وبعدين بطوط ده ابن بنت خالة عم حماة اخته كانت ماسونية ومتجوزة واحد بوزي وأمه كان بيقال عنها - من مصادر مؤكده برضه - انها بتاكل لحم خنزير صنع في مدينة الواك واك...ازاي تقبلوا ان بطوط العميل الخاين ده يبقى رئيس مصر!!!! 

يا جماعة برضه عيب تقولوا على بطوط كده.. بطوط خدم كل البط اللي في البركة بقاله سنين، بطوط ده مفيش في ادبه، شوفوا ده حتى سحنته زي القمر وتحس كده انك مستريح وانت بتتكلم معاه وانت بتطبطب على ريشه... يا سلام يا بطوط.. مصر هاتخسر كتير من غيرك.. 
احنا اسفين يا بطوط.. من كل قلوبنا.. كل جنينة الحيوانات بتتأسفلك.. 
يلا نعمل مسيرة رد جميل وشكر وتقدير وعرفان لبطوط ابو البطابيط.. بطوط ابونا وحبيبنا وابن جنينتنا المخلص العزيز...


اللي كتبته فوق هو سيناريو مصغر من اللي بيحصل كل يوم على الفيسبوك من ساعة ما الثورة قامت. فيسبوك بس الحمد لله مش تويتر.

السيناريو ده مشكلته مش بس في اللي بيقوله، مشكلته في اللي بينشره او بيصدقه، لأنه معناه انه ماشي مع أو ورا "القطيع". ثقافة القطيع للي مايعرفش هي ثقافة "هوبا يلا بينا"، بمعنى اني النهاردة اقول حاجة كله يمشي ورايا ويسمع كلامي بدون ادني تفكير، تاني يوم ارجع اقول عكس الكلام تماما، الاقي كل الناس ماشية ورايا بدون برضه تفكير. م الآخر، ثقافة القطيع تتمثل في انك تصدق اي حاجة اي حد بيقولها وبتلغي تفكيرك.

بعض اعراض ثقافة القطيع أثناء الثورة:

1- النقاش على اي حد حلو او كويس بناء على شكله، كلامه المعسول، او العاطفة اللي في قلوبنا - وكأننا بننقي عريس بالظبط!!
هاستعير تشبيه وجملة جمله من صديقتي ماريان مجدي
" ده شكله غلبان، و ده شكله محترم، و ده شكله ابن ناس و ده شكله و شكله... السياسة يا جماعة ميتحكمش فيها بالعواطف ولا بالشكل!  هو أحنا كنا بنحكم علي الناس أزاي!!!! الأحكام دي نحكمها ع العرسان بس D:"

احترم جدا الرأي المختلف عن رأيي في تأييد أو رفض شخص أو فكر ما.. لكن بناء على أسس موضوعية سياسية بحته ومش اسس الادب والشكل والمش عارف ايه.. يهمني في اللي يحكم مصر شغله، "اجندته"، فكره، اعماله، انجازاته، خطته المستقبليه، انتماؤه الفعلي للنظام واساليبه.. وبالتالي، الناس اللي رفضت أو طالبت ببقاء أو ترشيح مبارك، شفيق، موسى، البرادعي، شرف،..الخ، بناء على اي سبب غير اللي فات ده، يبقى سوري يعني ماشي مع القطيع ومش بيسمع لصوت العقل لكن لصوت الصفحات اللي مالهاش لازمة ع الفيسبوك.

2- تخوين نص المصريين على انهم عملاء ومش كويسين
هاحكي قصة واقعية في السريع كده.. انا مرة وانا في ثانوي كنت باكتب على forum مدارس طلبة IG  المندسين وكنا بندردش وكل واحد يقول على ايه اكتر اماكن بيحبها او زارها في مصر وانا ذكرت "ما معناه" ان انا زمان انا رحت بورسعيد ومالقيتش معاملة كويسة هناك ساعتها وبالتالي انا مش باحب اروحها دلوقتي.. عادي انا كنت باعبر عن رأيي وسط اصحابي وماحسيتش اني غلطت في حد وماحدش زعل من كلامي.. بعد كام سنة كنت بادور في جوجل على اسمي ولقيت اسمي مذكور في forum لبورسعيد. ولأني طبعا مندسة وباين عليا، لقيت حملة شنيعة ضدي في الموقع وشتيمة واتهامات. واللي يضحكك بقى، واحد قاللك دي يهودية صهيونية مزقوقة وبتتكلم انجليزي اهو مع ناس خونة وبتشوه سمعتنااااااا، وكلام بقى زي اللي اتقال على غنيم بالظبط! وبعدين رحت انا شمرت ونزلت عليهم رديت وبالعربي عشان افهمهم ان انا مصرية ومش جاية اسوأ سمعة مصر وكنت باكلم مصريين، وعادي جدا ان حد يقول هو بيحب يروح فين او ييجي منين.. هوبا لقيت لك واحد قالك يا عم دي اسرائيلية برضه وبتكتب بالعربي عشان تتوهنا .. ونزلوا فيا! لول.. ! المهم انا كبرت دماغي منهم عشان دول مكانوش قطيع طبيعي، دول كانوا فضائيين !! 
وبالتالي انا كنت من أوائل المدافعين عن تخوين غنيم لأنه بصراحة مفيش اي دليل يقول انه ماسوني والهجص ده، ولأن انا طول عمري باحاول اقنع ناس كتير اني مش اجنبية ولا من اصل اجنبي ومش يهودية ولا أصلي اسرائيلي وحتى عمري ما ركبت طيارة هاهاا! فأنا بصراحة باعذر وائل غنيم وفاهمة هو حاسس بايه D:

عارفين حتى لو وائل غنيم كان عميل بجد؟ (افتراض وهمي انا غير مؤمنه بيه) انا هاشكره برضه!! على رأي البلوجر صديقي "محمد أويس" اللي قال "عليك أن تؤمن أو ترفض الفكرة و ليس الشخص..فالمفترض أن نتبع أفكاراً وليس أشخاصاً ! "

 رداً على من يحاول تبرير و تلويث نوايا وائل غنيم او اي حد تاني في الثورة: كلنا نتفق على ان ما حدث كان ثورة على السرقة و الظلم و الفساد.. ووائل كان أحد العوامل اللي أدت الى قيام الثورة باشعال فتيل البداية.. فإذا كان وائل هو رئيس الموساد شخصيا، فشكراً للموساد .. اما اذا كنتم خايفين على نوايا وائل أو غيره في المستقبل هايعمل ايه، فمصير البلد بأيدي 85 مليون دلوقتي و مش بإيد وائل، هما اللي هيفكروا و يقرروا مصيرهم.. ايوه مصيرنا احنا اللي نحدده ومش هانبقى قطيع يجيبوه يمين فيروح يجيبوة شمال فيروح..


3- محاولة تبرىء ناس كتير من اعضاء النظام البائد ونعد نتأسف بقى ونعمل مسيرات رد جميل، جميل ايه ماعرفش!
يحضرني خبر قريته من كام يوم عن محاكمة الرئيس الفرنسي السابق جاك شيراك باتهامات بأنه أساء استخدام أموال عامة.. جاك شيراك يا راجل؟ عيب ده في مقام جدنا، والراجل ما شفناش منه حاجة وحشة، لا لا عيب عيب تتكلموا بالطريقة دي على الراجل...يلا نعمل له مسيرة رد جميل!
مش فاهمة هو في ايه بيننا وبين اي مسئول؟ هو من بقية عيلتنا؟ هو كبر السن او المرض بيمنع اننا نحاسب الناس على افعالها اللي اضرت بالبلد؟ ارجعوا للجزء الأول  في السلسلة دي اللي كتبت فيه اننا نحاسب ونقيم كل مسئول على انه موظف وشخصية عامة!

كمية الجروبات اللي على الفيسبوك ضد ناس ومع ناس مهولة ومخيفة، وتلاقي كل واحد على الفيسبوك داخل في تلات اربع خمس صفحات وجروبات تأييد لأكتر من شخص (سبحان الله!! كأن رئاسة الجمهورية هاتبقى تورتة تتوزع على 5)  ورفض لناس تانية.. المهم، ناس مشغولة جدا انها تعمل جروب ضد البرادعي او موسى او اي حد، المهم اننا نشتم فيهم طبعا، مش مهم ابــــــــــــدا نشوف مين نازل قصادهم في الانتخابات، مين يصلح للمنافسة، ايه برامجهم، ليه اصلا بنشتم فيهم من الاساس، هل لأسباب موضوعية سياسية ولا عشان واحد كح ولا عطس قاللك ده عميل، قوم هوووب جمع الفين تلاتة واعمل جروب "يا واد يا عميل" وهيص وعيش! 


4- تصديق (ونشر) الاشاعات الغريبة بطريقة سريعة جدا
الاشاعات الاشاعات... حرقوا ده، لا موتوا ده، لا ده عاش، لا ده مات، ايوه ده خبر من مصدر مؤكد، واحد فضائي ماحدش يعرفه كتب اي كلام ع الفيسبوك ويقول لك شاهد عيان وهوبا تلاقي كله نشره..

من اهم الاشاعات واخطرها لما النيل للأخبار نشرت اكتر من مرة اخبار عن سفن حربية تهاجم فين وتنتشر فين وكلام بقى ايه.. تحس ان الحرب العالمية هاتقوم بكره.. المشكله ان الاخبار دي وغيرها كتيـــــــــر بتمثل حرب اعلامية غير شريفة تسمة (media propaganda) واشهر من استخدمها كانت امريكا وروسيا في الحرب الباردة.. المهم، انا هاتكلم عن الحرب الاعلامية في مرة منفصلة بس اللي انا عايزة اقوله هنا ان في اخبار بتبقى باينة انها متفبركة، وحتى لو مابانتش بالنسبة لبعضنا، مش اول ما تسمع اي خبر تهرول وركبك تخبط ف بعض وبدل ما تحاول تفهم تعد تنشر كلام مالهوش اي اساس من الصحة ومن غير اصلا ما تحاول تتأكد اللي سمعته ده صح ولا غلط، من حقك تخاف وتاخد حذر بس استخدم عقلك هاتلاقي 100 الف رد.

فمثلا في موضوع السفن الحربية اللي في البحر دي الجيش رد عليها بعدين وكذبها، وتقدر تفكر تشوف عدد جيش مصر كام وان الجيش مش منتشر بكامل قوته وقواته الخاصة جوا البلد وبالتالي هما مش سايبين الحدود، وتفهم ان في اتفاقيات بتنظم عدد الجنود اللي بيبقوا على الحدود، وطريقة السفن اللي تروح وتيجي، وتفكر برضه ان في قاعدة امريكية موجودة في الخليج، وان مش شرط السفن تكون جاية تهد امن وامان مصر.

يعني انا بس باحاول ادي مثال ازاي الواحد ممكن يفكر اول ما يسمع خبر "مخيف" بالنسبة لناس كتير اول مرة تلاقي نفسها بتتكلم في السياسة غصب عنها بسبب الظروف الحالية، والناس معذورة طبعا، بس ياريت نفكر ومانتعبش اللي حوالينا بالخوف والتقوقع وانسياقنا ورا القطيع. في أسوأ الطروف لو في خبر انت مش متأكد منه، اسأل، استطلع آراء الناس المثقفة اللي بتثق في رؤيتهم، ولو نشرت حاجة وطلعت اي كلام، خليك شجاع وكذّب اللي نشرته، وثق تماما ان الناس هاتحترم شجاعتك دي.
   

5- اي حد يختلف معاك في الرأي اشتمه وقولله انه مش فاهم وبوظ البلد
خلاص يا سيدي انا بوظت البلد، انت نزلت وحاولت تصلحها؟ ولا قاعد ع الكمبيوتر تشتم وخلاص وتردد كلام كل الناس بتقوله؟! الثورة مش عاجباك؟ الثوار المثقفين صفوة البلد مش بيفهموا وانت اللي فتك؟ زعلان من الثورة عشان مش عارف تروح النادي؟ ولا عشان ابن اخت عفاف شعيب مش بياكل يا كبد أمه "بيدزا" وريّش بقاله 10 أيام؟ ولا عشان مش لاقي مكان تركن العربية من كتر الدبابات اللي في الشارع؟ ولا زعلان انك لما هايوقفوك بعد كده في مخالفة مرور مش هاتلاقي الظابط صاحبك بيظبطك ويجيبلك الرخصة ويشيل من عليك الغرامة؟ ايها الشباب السيس.. دي ثورة مش اتاري.. اللي مش عاجباه الثورة، هانجيب له حبيب العادلي يحكمه ونقعدهم هما الاتنين في جزيرة واحدة!

انا مش هادافع عن الثورة مرة تانية، كفاية اللي كتبته في الجزء اللي فات واللي غيري كتبه، بس الاتهامات بتاعة انت مش فاهم وانت بوظت البلد دي عيب بقى ومايصحش وانا باخدها على نفسي حتى لو مش موجهة ليّ! وباتضايق! عشان اللي بيتكلم ده غالبا مرفه ومغيب عن الواقع والتاريخ الدولي والمحلي! الثورات بتاخد سنين والناس بتحارب عشان الحرية، الحرية غالية وصعبة والناس عمالة تقول انتوا وانتوا وينساقوا وخلاص!!! ما تركزوا في اللي جاي والدستور والانتخابات وفككم مني ومن الثورة واللي بدع الثورة من اساسه؟ مستقبل مصر اهم من ماضيها.. خلينا نبص لقدام احسن.


6- القاء اللوم على الثورة لأي حاجة مش عاجباك حتى لو نزلت الصبح لقيت عربيتك مخبوطة 
ونسينا او تناسينا كل البلاوي والفساد المالي والسياسي والاجتماعي والمؤسسي اللي قبل الثورة؟ اللي بيقول عصر مبارك كان منظم وآمن هاقوله ان النظام في عصر مبارك كان فعلا موجود.. بدليل ان الانفجارات والعمليات الخارجة عن القانون كانت بتحصل بمواعيد.. اما دلوقتي للأسف البلطجية بيطلقوهم على الناس من غير ميعاد هاهاهاا!! انتم فعلا مش حاسين كان فيه ايه في البلد لو بتلوموا الثورة على أي حاجة غلط بتحصل... وبالتالي صمتكم أيها القطيع هو أكثر فائدة تقدموها لبلدكم.


الحل الأضمن والسريع للخروج عن ثقافة القطيع:

1- لا للتقليد والانقياد وراء أي رأي سياسي حتى لو ورا اقرب الناس ليك .. لازم انت تكون مقتنع باللي بتقوله وتردده.
2- لو حد قال اي رأي قدامك ماتوافقش لمجرد انك بتحب الشخص لنفسه أو معجب بشكله أو لأنه كوووول، افصل رأيك عن عواطفك.
3- فكر فكر واقرا كتيــــــــــر في التاريخ والاخبار واستند لمصادر موثوق فيها اعلاميا مش القناة الأولى والأهرام فقط!! اسمع الرأي والرأي الآخر وشوف اللي بيقول كلام مختلف عن اللي انت بتقوله ده ايه مبرراته واسبابه، مش يمكن هو صح؟
4- اهبط كده وقبل ما تاخد اي قرار انت مع او ضد مين، فكر وخد وقتك وشوف الرأي والرأي الآخر وشوف انت ميال تصدق مين أكتر، ومين اللي رأيه مدعوم بوثائق ومواقف واقعية ومش اشاعات.
5- لا لخلط الدين مع السياسة - ماتروحش تسأل رجال الدين انتخب مين، اقول ايه في الاستفتاء، فكر انت بذات نفسك كده، ربنا ادانا مخ عشان نوزن بيه الأمور مش نخلي حد يفكر لنا ويقرر لنا.
6- ماتحكمش ع الامور بعاطفية.. بمبدأ حرام عليكم جدو جاك شيراك!
7- ماتنساقش في قراراتك وراء الخوف والفتنة اللي النظام بيحاول يزرعهم.. يعني ماتنتخبش مسلم أو مسيحي لمجرد ديانته، شوف انت فعلا مقتنع مين هايفيدك ويخدم البلد.
8- ماتدوسش لايك على الفيسبوك على كل من هب ودب وعلى أي صفحة وأي كلام وكأن اللايك ده هو اللي هايغير مصير البلد! استفيد بالوقت في انك تقرا كلام ونقد مفيد وبناء.
9- لما تحس انك بتستفز اللي حواليك بعدم ثقافتك عن أي موضوع.. سمعهم صوت صمتك المدوي، واحترم انفعالات الناس.
10- بغض النظر انت مع أو ضد الثورة.. ارجوك، اظهر شوية احترام لدم الشهداء، وحاول تغير من نفسك وسلوكك لو بتعمل حاجة تضر بالبلد، ان شالله حتى لو كان كسر اشارة مرور، المهم، ماتقولش مفيش فايدة، والبلد دي زفت، ابدأ بنفسك يا جدع انت بس!

والله المستعان

3 comments:

il sognatore said...

can't agree more

المشكلة كلها ممكن تتلخص فعلا فى نقص الثقافة .. ده اللى يخلينى أمشى ورا أى كلمتين حد يقولهم، وده اللى يخلينى أصدق أى اشاعة وأنشرها، ده اللى يخلينى أحكم على الناس بشكلهم واحد شكله طيب وواحد شكله رخم .. والمشكلة ان الناس اللى بنتكلم عليهم دول الشريحة المثقفة فما بالك بباقى الشعب ..

Evronia said...

ايوه للأسف فعلا حاجة تحزن ان دول الشريحة المثقفة وفي منها المثقف جدا كمان
:(

محمد أويس said...

إستكمالاً لكلامك و تعليقك على الثورة وما قد ينتج عنها
إحنا عاملين زي دولة كانت محتلة ولا قررنا نحارب عشان نحررها طلعلنا شوية ناس تقولنا
تحاربوا ميييين؟؟؟
انتوا مجانين؟؟؟
دول أجمد منكم بكتيير قوييي
ده انتوا هتتقطعوا
المهم نفضنالهم و قمنا حاربنا
و كسبنا شوية حاجات في بداية الحرب
كل بقى ما العدو يجي يرد علينا الهجوم الجماعة اياهم يقولونا شوفتوا هيقطعوكوا
يموت مننا واحد ولا اتنين
ما قولنالكم مش هتقدروا عليهم
ايوه ماهي حرب على فكرة
و متوقع فيها خسائر
هو مش ماتش من جانب واحد