Saturday, March 5, 2011

مقالات شبه سياسية بقلم ثورجية مصرية - ستوكهولم وعواطفنا المرهفة..دي ثورة مش اتاري!ـ

مقالات شبه سياسية بقلم ثورجية مصرية




الجزء الثاني: ستوكهولم وعواطفنا المرهفة.. دي ثورة مش اتاري!


ما هي متلازمة ستوكهولم؟ اتفرج على الفيديو ده وانت تعرف

الفيديو ده مش تأليس لا سمح الله، ده بجد.. الفيديو ده بيشرح حالة خوف رهيبة كل الشعب المصري دخل فيها بعد سنين القمع اللي عشناها..

ستوكهولم اللي كنت عايزة اكتب عليها الأول هي بتاعة أنا اسف يا ريس.. بس طبعا اعتقد ان نسبة الناس اللي لسه بتعتذر لمبارك دلوقتي ضئيلة جدا بعد ما شفنا حجم الفساد اللي يخض، وغالبا الناس دي مش بيقروا لي حاجة... ولأن انا اتأخرت في كتابة المقالة فمبقاش في لازمة دلوقتي اتكلم عن مبارك..

ستوكهولم المصرية دلوقتي تتمثل في الحكم على كل شيء بعواطفنا وتقديم الأسف لمن استعبدونا وعذبونا لسنوات.. تتمثل في صفحات الاعتذار اللي عملها نص الشعب الأول عشان يعتذر بيها لنص الشعب التاني بمن فيهم تامر حسني...!!

تعالى  الأول احكيلك حدوته، الحدوته دي رد على الفنانة التي تفتقر للذوق والوطنية وحاجات تانية كتير.. زينا اللي قالت: مصر فيها ايه حلو قوي كده عشان عايزين ياخدوها؟

انا كنت مرة وانا صغيرة كنت عايزة اخد كورس باور بوينت، حجزت في مركز مدعم ونضيف كده كان عامل اتفاقية مع الحكومة بتقديم كورسات بأسعار مخفضة.. وبعدين قررت ان الموضوع سهل ومش محتاج كورس وكنت عايزة اسحب فلوسي.. المركز مارضيش وقاللي قابلي المدير.. المدير في الحقيقة كان واحد كوري، راجل لذيذ قوي، قعد يحكي معايا كتييير عن البلد وهو جه ليه هنا يفتح بيزنس وساب منصبه الكبير قوي كمدير في شركة اليكترونيات، مش فاكرة سيمنز ولا اريكسون ولا ايه..  
قاللي ان مصر فيها خير كتير احنا مش حاسين بيه، وقعد يكلمني عن الجو والزراعة والاثار والنيل وحاجات كتير، وانهم في كوريا الرئيس عندهم ركع على رجليه عشان يطلب منهم يتبرعوا ويبنوا بلدهم لأن مكانش عندهم فلوس وماعندهومش خير زي اللي عندنا، وان المدير ده شخصيا باع دبلته عشان يدي فلوسها للبلد ... قاللي انا حسيت انكم مش مستفيدين باللي عندكم.. فالحمد لله واضح ان الراجل جه يستفيد هو بدالنا :D

حسدته على انه استأمن بلده يديها فلوسه كده في الوقت اللي كلنا كنا حاسين ان بلدنا بتسرقنا، وحزنت وانا كنت ماكملتش 12 سنة يعني، بإن بلدي خيرها مش لينا...

تقوم تيجي بقى زينا الواعية المثقفة تقول مصر فيها ايه حلو.. واضح انها في المدرسة ماحفظتش دروس القراءة والدراسات الاجتماعية كويس..


اللي عايزة اقوله تعقيباً على قصة صديقي الكوري وزينا حبيبة قلبي، ان مصر دخلها ومستواها لا يقارن بمواردها ونعمها.. احنا نستاهل احسن.. نستاهل نكون نمرة واحد في العالم الحديث مش بس في عالم الفراعنة. اللي نزل يتظاهر لغاية امبارح هو شخص طموح لبلده لا يجب ان نتهمه بعدم الوطنية لأنه مثلا عايز خطة زمنية لتنفيذ المطالب أو حل جهاز امن الدولة أو حكومة تكنوقراط أو غيره، لأن كل المطالب دي في الأخر بتصب في مصلحة بلده لجميع الشعب، مش ليه هو بس، يعني احنا كلنا مستفيدين، وعلى رأي عمرو سلامة، لو مش عايز تنزل معاهم او معارضهم، اقلها ماتهاجمهومش ..
ماتقولش دول عايزين واحد على مزاجهم وماحدش هايعجبهم.. هما عايزين واحد مالهوش علاقة بالنظام.. واحد ايديه مش متلوثة بدم الناس.. واحد يقود البلد للي نستاهله فعلا مش للي نمشي بيه حالنا دلوقتي وخلاص.. وأؤكد ليكم ان النزيه مبيختلفش عليه اتنين.. عايزين قيادات تستاهل مصر وتعمل للشعب ده اللي يستاهله فعلاً، وأرجوكم مايبقاش عندنا مبدأ نرضى بقليله وكفايا، لأن نفس الناس بتقول كفايا من أول الخطاب التاني لمبارك، وهي نفس الناس اللي فرحانة بمكاسب الثورة من غير حتى ما يبقى قلبهم على الثورة - ايه يعني شوية تييت قاعدين في التحرير، احنا عايزين نروح النادي في أمان!!

عمرو سلامة رد ردا كافيا على موضوع التحرير ده واعتقد ان انا مش احسن واحده تكتب عنه لأني مش في التحرير وماكنش عندي الشجاعة الكافية اني اقف في وش الرصاص زي ما الناس دي عملت..


يا جماعة دي ثورة.. ثورة.. ثورة، يعني ظروف صعبة علينا كلنا، وفي الاخر كله هايعود بنفعنا بس لو عملنا ثورة كاملة، ومحدش التف على مطالبها، الثورة محتاجة قلب جامد مش قلب بيخاف، محتاجة صبر، اننا نعرف ان ثمار الثورة الاقتصادية والاجتماعية هاتيجي في خلال سنوات مش اسابيع وشهور، وان التاريخ حكى عن ثورات كتير قامت وفشلت بسبب الالتفاف عليها سواء من الجيش او النظام السابق او عدم تحقيق كافة المطالب او غيره.. وأنا عاذرة تماما الناس اللي خايفة وعايزة تعيش في امان واستقرار.. بس خليني اقول معلومة ع الهامش كده.. الثورة دي قامت عشان تحقق ده مش العكس.. احنا كنا مش في امان قبل كده والناس اللي شافت موضوع كنيسة القديسين فاهمة انا باتكلم عن ايه.. احنا كنا في امان مزيف، حامينا كان حرامينا.. واحسن واحدة اتكلمت في الموضوع ده صديقتي رانيا في البوست بتاعها هنا

واللي بيحصل دلوقتي هو الانفلات الامني اللي يخليك ترجع لستوكهولم وتقول مفيش احسن من ايام مبارك، لما كان يادوبك الواحد يتعذب بالسلك العريان كام شهر كده ومش قدام الناس.. ع الاقل البلطجية بيضربوا في النور.. هاها!

عمايل الانفلات الامني واخفاء وحرق مستندات الفساد ريحتهم ريحة نظام.. اكيد الناس اللي في التحرير دول مش سبب الانفلات الامني يعني.. لو عايز تحاسب حد حاسب الداخلية! ماتحاسبش الثورة!
واقرا تاني عمرو سلامة قال ايه عن الموضوع ده ..

واللي المفروض نحاسبه برضه هو أي مسئول، حسب اعماله اللي عملها في عهده على الأقل، خلاص بلاش هو مين اللي عينه او هو اتعاون مع مين قبل كده. مش بنحاسبه في شخصه، يعني كون المسئول مؤدب وجميل وابن ناس وطيب واخلاق والكلام ده مايمنعش انه يتحاسب على افعاله.

نحاسبه.. ايوه نحاسبه.. تمام؟ مش نرشحه لرئاسة الجمهورية!! ننشف، دي ثورة! تطهير شامل يعني!

يعني لما تقرا في الصحف الاجنبية ان عمر سليمان كان مسئول عن تعذيب الناس في الدول الأخرى لما كانوا يبعتوهم لمصر لأن مسموح عندنا بالتعذيب فيما يعرف بالـ rendition program، وتسمعه بيقول مصر مش مستعده للديمقراطية وان كل اللي بيحصل ده بإيدين الـ"برازر موسليمهووود"، يبقى ترشحه للرئاسه ولا تتحقق الاول من الكلام وتتأكد من توجهاته قبل ما تاخد قرار ترشح مين او لا؟

رشح اللي انت عايزة، بس ماتحكمش بعواطفك ارجوك..

احمد شفيق على عيني وعلى راسي.. بس اي حد شارك في الثورة شعر باهانة شديدة جدا وانا لحد دلوقتي مش قادرة استحمل الكلمة نهائيا لما قال هاجيبلهم بونبوني.. بجد لو انت من الناس اللي نزلت في الشارع ولو لعشر دقايق بس، الكلمة دي كانت هاتمثل لك صدمة رهيبة وماكنتش هاتستحمل انه يعد دقيقة واحدة في المنصب ده.

بس مش هو ده السبب الوحيد اللي انا كنت معارضة لشفيق انه يمشي من منصبه .. رغم انه سبب كافي وهو الاستهزاء بالثورة والمتظاهرين.. طبعا هو قبل موقعة الجمل بيوم قال انها مش ثورة اصلا..  وبعد الثورة قال ثورتنا.. ما علينا!

بس تعالى كده شوف اللي حصل في دريم من وقف اعادة بث حلقة ابراهيم عيسى ومنع برناج واحد من الناس واللي حصل مع محمود سعد من شد وجذب مالهوش لازمة.. التفسير ده بالنسبة لي هو انعدام الحرية فقط لا غير.. واحنا نعمل ثورة، ونكلبش الاعلام اكتر؟ اي حد ينتقدني امنعه من الاعلام؟ 

تعالى شوف جابر عصفور قال ايه عن الحكومة دي وايه اسباب استقالته "الوحيد الذي استقال من حكومة شفيق بعد أيام من توليه منصبه في 30 يناير لأنه لم يتحمل كم الظلم والفساد"؟

تعالى نشوف اهم سبب في نظري لاقالة شفيق وهي حكومته. نستفتح بأبو الغيط.. ولا يسعني الكلام عن ابو الغيط.. ليبيا تتكلم عنه، والناس اللي رجعت منها تهتف ضده في وسائل الاعلام.. ابو الغيط اللي ساب موضوع النيل وليبيا وقت الثورة وغيرها من قبل كده.. انا باتكلم على احداث اليومين دول عشان ماعنديش وقت اقلب في القديم والجديد بتاعهم، نسيب ده للنائب العام.

ممدوح مرعي وزير العدل المتهم في بلاوي كتير من ايام النظام وتزوير الانتخابات واللي اتمنع من السفر اول ما خرج من الحكومة..

محمود وجدي وزير الداخليه بتاع الاجندات والمندسين اللي مازال سايب البلد في فوضى وبلطجة مفيش حد يستفيد منها غير النظام السابق..

مين المسئول عن الحرايق اللي بتتم كل يوم في مباني حكومية فيها اوراق هامه يحاسب عليها النظام؟ مش حكومة شفيق؟ مين المسئول عن اخفاء الادلة اللي يتحاكم بيها الفساد؟ مش حكومة شفيق؟

وان كان الجيش يملي على شفيق قراراته في اختيار اعضاء الحكومة او غيره، وشفيق رجل لا علاقة لا بنظام مبارك، يبقى الاكرم له انه يستقيل لانه بيساعد النظام بالطريقة دي، ولو دي قراراته فعلا شخصيا، يبقى هو تبع النظام..

من ناحية الشرعية الثورية، والكلام ده اصدقائي الثوار هايقدروه، انا عارفه ان الناس اللي مانزلتش الشارع ممكن مايعجبهاش الكلام ده، بس النظام لما بيسقط بيسقط كله على بعضه بسلطاته ببابا غنوجه، مش اسقاط للرئيس فقط.. شفيق اتعين من قبل نظام فاقد شرعيته، يبقى يمشي لأننا محتاجين نحاسب النظام ده كله بمن فيه .. ع العموم النقطة دي مش مربط الفرس بالنسبة لي لأني باحب احاسب الشخص بأفعاله هو فقط. 


ولو عندك وقت شوف لقاء شفيق على السي ان ان

واخر اسباب بقى، قاله الخباز الفصيح اللي بانحني له احتراما

انا حبيت بس اعرض وجهة نظري لأن انا شايفة هجوم وشتيمة لفظية بالحيوانات واتهامات بالجهل الرهيب على الناس اللي طالبت ان شفيق يمشي.. حبيت ادافع عن نفسي من الهجوم واعبر عن وجهة نظري. شفيق كان ممكن يصلح لبناء مؤسسات، ولكن مش لمكافحة الفساد.. الموضوع كان اكبر منه وهو قال انه مش بايده وان مالهوش فيها.. في اسئلة كتير مكانش عنده رد عليها..

موضوع بقى هو احسن الموجودين والكلام ده، قالهولي سواق تاكسي، انا مارديتش عليه، مش خوف انه يعلي الأجرة بس كنت قربت انزل وكنت مصدعة بقى وشايفة مظاهرة تأييد معدية وحسيت بستوكهولم بياكلني.

قلنا كلمة احسن الموجودين دي على مبارك، سليمان، شفيق، موسى، افرونية،..الخ

افترضنا ان كل واحد فيهم هو احسن الموجودين..
وماذا تعرف عن الموجودين؟
النظام السابق قام بابعاد اي شخص نزيه مش تبع البرتيته بتاعته عن الحياة السياسية وعيون البشر.. مثال: هيكل

هل مصر عقيمة؟ وماذا لو توفى المسئول في اي لحظة؟ مش هانلاقي غيره؟

اعرف الحقائق ، ابحث واقرا في التاريخ، وبعدها انت حر في تأييد شخص أو لا..

نختلف في الرأي - ممكن.. نختلف في ان نحكم ان هناك فسادا او لا.. غير ممكن.. مثال: نظام مبارك

من مؤيدي مبارك لا يردون على الاتهامات الموجهه له بل هم فقط يعودون الي امجاد الماضي مثل اول طلعة جوية، زي ماحنا بالظبط كنا بنرجع لامجاد الفراعنه ..

طب نتفاوض في الفساد ازاي؟ ازاي يختلفوا اتنين ان قتل المتظاهرين في مظاهرات سلمية جريمة؟ حتى لو كانوا ناس معاهم اجندات؟ معرفش هل مؤيدي مبارك موافقين على كده؟ ولو موافقين، المبرر اننا عايشين في غابة ولا ايه؟ طب لو مش موافقين بيأيدوا مبارك عشان هزم اسرائيل؟ طب ده ياريت كنا بنتعامل في مصر زي ما نظام مصر السابق كان بيعامل اسرائيل وبيديهم الغاز بابخس الاسعار وبنخسر فيه.. حكم مبارك جعل بعض الناس يقولون: لو لم اكن مصريا لوددت ان اكون بعد الشر صهيونياً، لا واللي يحرق دمك ان مبارك لما راح يشتكي همه، راح لوزير اسرائيلي "صديقه".. !!

الم يكن من حلمك ان تسافر او تهاجر في اقرب فرصة؟ يبقى البلد كان حالها مايل، طب ماحنا عايزين نعدلها يا جدعان!! لماذا لم تؤيد مبارك اثناء فترة حكمه ما دمت تشعر بكمية الرخاء اللي في عهده؟



اخيرا.. ادعو بالرحمة لخالد سعيد وشهداء القديسين والثورة .. الله يرحمكم .. احنا طلعنا على دمكم
ولتبقى دائما كلمة الشعب هي السيف القاطع على رقبة كل مسئول...


مقالات تهمك:

1 comment:

Amr Ebaid said...

جلال عامر قال: يا ريته كان ضربنا احنا الضربة الجوية و حكم إسرائيل