Thursday, February 17, 2011

مقالات شبه سياسية بقلم ثورجية مصرية - مقدمة

مقالات شبه سياسية بقلم ثورجية مصرية 
الجزء رقم صفر: مقدمة


أنا مقدرش اكتب في السياسة.. هو احنا نسينا اصلنا ولا ايه.. سياسة ف مصر؟؟  ايه يا جدعان.. ده يقفلولي البلوج وياخدوني سين وجيم وسلك عريان وحاجات  تشيّب .. دي مقالات "شبه" سياسية.. يعني شويه كلام على خفيف عشان ما احبش ابقى زي الضيف التقيل الرزل كده.. وبعدين بصفتي ثورجية، لا لا اوعوا تفهموني غلط، مظاهرات ايه، انا جنب الحيط، ثورجية قصدي يعني لو في حاجة مش كويسة باتكلم ومش باسكُت.. ماشي كده؟  ايوه بصفتي ثورجية قديمة، قلت أكتب شوية حاجات كده واقفين في زوري بسبب الثورة، وقلت اقولهم والسلام بس المهم إن الناس ماتزعلش مني .. واهو يمكن كلامي يعجب حد .. 

أنا من شباب الثورة بصفتي من المؤيدين لها وليس بصفتي قائدة القيادة العليا فيها و مديرة غرفة العمليات.. وبصفتي اني من الشباب اللي عانى كتير في البلد زيكم كلكم وفي نفس الوقت عاني بعد الثورة في تنظيف الشوارع.. اه صدقوني ظهري مقطوم .. بس حبيت اقول لكم ان الثورة غيرتني، زي ما غيرت مصر، ع الأقل ما بقيتش هاموت وأسافر وبقيت حاسة انه يمكن في يوم ارشح نفسي لمجلس الشعب ويبقى فيه منبر اكلم فيه الراجل اللي بدل فتحي سرور، اللي خلل في المجلس، وأقول له على مطالب الشعب وأعارض وانكش الحكومة واطلع عينهم. هذا ليس طموحاً في العمل السياسي، ولكنه طموح ساذج بيعبر عن أمنيتي في أن يكون لي منبر أتكلم فيه زي ما كل البشر اللي في الدنيا بتتكلم، ما عدا احنا المصريين، زي ما كان لساننا مقطوع ورجع أطول من الأول بعد الثورة. 

أنا مش هاتكلم عن مواقف شخصية قد ما هاعرض اللي ليا واللي عليا، والناس دي بتقول ايه ودي بتقول ايه. الهدف من شوية الرغي اللي باكتبه إن الناس تتعود على ثقافة الحوار، الرأي والرأي الآخر، وازاي نختلف من غير تخلف وشتيمة، وازاي مانخسرش اصدقاءنا بسبب اتجاهاتهم السياسية، ونفهم ان السياسة مالهاش دعوة بأي حاجة في الدنيا غير السياسة، ونبدأ نتعلم الحرية والديمقراطية بحق وحقيقي، ونبدأ نفهم منين نكوّن رأي، وازاي نكوّنه، ونعرف منين الخبر ده اشاعة ولا لا، ونشكك في ايه، ونآمن بإيه. أنا مش هاقول اني ام العريف، بس  ع الأقل أنا باعمل اللي انا شايفة اني اقدر اعمله لبلدي، واقول اللي اقدر اقوله لأولاد بلدي، لأن انا اتربيت على الديمقراطية والحوار.. وبهذه المناسبة السعيدة أحب أشكر الست الوالدة اللي رضعتني سياسة وأخبار وراديو وتليفزيون من صغري (لا مش هاتترشح للرئاسة حتى لو ناويين تعملولها صفحة ع الفيس بوك بعنوان نؤيد افرونية ومامتها لرئاسة مصر). 

احنا دلوقتي في مصر عاملين زي العصفورة اللي اتحبست كتير وبعدين فتحولها قالولها طيري، طب وانا أطير ازاي وانا مش عارفة؟ طب ما نتعلم نطير سوا يلا بقى! نتعلم بس بالراحة.. ولو حد في نيته من دلوقتي يشتمني او يتخانق معايا او يقنعني برأيه يبقى ارجوك ماتدخلش ع البلوج ده تاني، لو ناوي تقرا في تحضر يبقى تنورنا يا باشا! 

الحاجة المهمة اللي عايزة اقولها ان انا عدت عليا كمية لا حصر لها من المعلومات وأقوال ومواقع وفيديوهات عن الثورة، ممكن أكون أخدت أفكار من عبارات وأقوال ناس كتير قالتها، أو ممكن أكون خزنتها في الهارد ديسك بتاع دماغي من غير ما افتكر اسم اللي كتب أو اللي قال.. فأرجوكم اعذروا أي اقتباس، لأنه غير مقصود بيه السرقة. وأحب أشكر كل اخواتي واصدقائي الثوار اللي وقفوا جنبي وقت الثورة بمعلوماتهم ونقاشاتهم وتشجيعهم وآرائهم وفيديوهاتهم، اللي هاتلاقوني باستعين بيها في المقالات اللي جاية دي.. واشكر كل اللي شتم الثورة برضه، باعتبرها شتيمة شخصية ليا، وباقولله اشكرك، دي بَركة كبيرة.. بس لو انت مش عاجباك الثورة وبتقول علينا شباب فاشل ومنقاد واخوان وبتاع كنتاكي واجندات، ولو كنت تخجل من الثورة ولا تنظر لها أنها ثورة من الأساس، فرجاء اخرج من البلد دي سالماً غانماً، اخرج والقلب داعيلك. مش باطردك من بلدك لا سمح الله، لكن انا شايفة انه لو البلد مش عاجباك، شوف مكان تاني احسن، وسيب لنا بلدنا بقى نعك فيها براحتنا عشان احنا هبل وعايزين نفضل هبل ومانتغيرش! أما بقى لو انت كنت شايف ان العهد السابق كان نعيم وقشطة، يبقى اكيد انت يا قريب أحمد عز، يا اما عايش في مصر اللي في أوروبا مش مصر اللي على ايدك الشمال وانت داخل من قناة السويس. 

طبعاً تلاقيكم بتقولوا كل دي مقدمة أمال اللي بعد كده ايه! اقول لكم: ماهو الواحد لما يبقى محروم وأخرس، وبعد سنيــــــــــن يرجعوا له أحباله الصوتيه بعملية صعبة ومؤلمة جداً، بيعد يرغي يرغي، وما أدراكم من الرغي!! 

أحب اقول لكم برضه اني باحب ساعات كتير اكتب بالفصحى عشان باحس ان في كلام مجعلص كده لازم يتقال بفصحته ببابا غنوجه، لكن انا اخترت اكتب المقالات دي (اتمنى فعلاً انها ترقى لمستوى مقالات) بالعامية عشان توصل لقلب الشعب الطيب ده زي الصاروخ.. ومين عارف، يمكن انشر كتاب قريب واسرق فلوسكم (اكاد اسمع هنا حد بيقول اني معايا اجنده لترويج افكار دخيلة على الشعب المصري).. على فكرة انا مصرية ومن اصل مصري واسمي مجرد لاتيني، واسم العائلة مش بس يهودي لأنه كمان مسيحي (عشان اتشتمت على الاسم ده قبل كده ها؟؟)


يلا كفاياكم كده .. صدعتكم .. فتتكم بعافية 

انتظروا الجزء الأول ...

5 comments:

Amira Ramadan said...

Can't wait for the next posts :)
Really , we need this soooooooo much .. I was really disappointed from the way people discussed their opinions.I didn't know why would some people lose each other , only cause they don't have the same opinion :( .
But as you said, may be it's not something we were raised on , hasn't been practiced enough. May be also it's because of the education system , which is only one way, no discussions , no different opinions can be right or should be respected, just
"اللى فى كتاب الوزارة هو اللى صح"
Hope this will change insha2 ALlah :)

mariana.georgy said...

عايزين نعرف ازاى نتعلم نطير علشان دا موضوع مهم وكمان نحدد احنا ناويين نطير على فين ، ماهو مش كل اللى بيطير بيحلق فى السما ممكن تلاقيه بيحلق فوق البرك والمستنقعات ولا بيحوم حولين الجثث ....مستنية المقال اللى جاى مسز ثورجية مصرية

Evronia said...

احلى حاجة بتعجبني في مصر اننا دايما عندنا اعتراض على اي حاجة.. بس ده شيء كويس على فكره عشان كده معناها اننا بنفكر.. و ع العموم احنا كلنا عايزين نطير نحو التغيير للافضل ، لكن مش هانقول لكل واحد اعمل ايه وازاي، لاننا اصبحنا احرار اخيرا .. نتعلم، وكل واحد يعيش بطريقته الخاصة، ومفيش حجر ع الافكار

fayyaz said...

It took me a while to determine weather to write a comment or not ... But we are talking about democracy ... AND how could be a democracy for me if i didn't share MY THOUGHTS..:)

So here i a come

1) I loved it, the whole post and the whole idea [LET'S LEARN DEMOCRACY 101 :) ]

2)I've got very tiny objections .. I'd like to share and hear others' opinions about it .
a)(Main objection) In your post you said "Egypt is like a bird locked up for so long .. Then the cage door was opened...."
I think the cage door didn't open on it is own..but the bird break it down..!!!
DOES IT REALLY DEFERS ??? Yeah.. a lot.
HOW COME ?? Now Let's map it to another example to make it more clear..
A family of 4 , a dad ,a mom and 2 sons. The elder son wants to marry a girl he know , so he went to his father , but father refused (may be for a good reason or a bad reason .. it doesn't matter).The elder son couldn't let his love down, so he opposed his father's well , he broke his father's words , his voice now overpowered his father's voice. For the younger one (who is our case ) what will happen when he wants anything..?? He knew the way to do what he wants ... and the father have to do it due to fear , fear of losing his second child.
That is our Egypt now ...
Any government will just do what the people wants... even if it doesn't have any possible benefits on the long run..
HOW COULD I SAY THAT .. ?
- Can any one tell me why not Dr Ahmed Zaki Badr ... ?? ..
To me , he is a decent man with a vision of the future of education.
According to Mr Shafik , he did not used it because of fear of people.
- what happens now a days also is a plus to my thought.

SO WHAT DO YOU THINK ABOUT THAT..??

3) I loved "El 3AMYA" and computer geek keywords.."HARD DISK BTA3 DMA3'Y"...:) VERY CSED !!!

NB:
-"MASR WE 2NTA GAY MEN 2ORBA 3AL 2EEDAK EL YMEEN WE 2NTA DA5EL MEN KNAT EL SUIZ"
-The facebook page .. is kinda playin' in my mind ... beware..!!
:)

Evronia said...

شكرا يا فياز على كلامك
موضوع مين فتح باب القفص، التشبيه كان تعبيري مش حرفي ومفهوم طبعا المقصود بالكلام ايه
ومعروف كويس ان اللي جوا القفص هوا اللي فتحه

انا مش هدفي اتناقش مين كويس ومين مش كويس وليه زكي بدر او غيره.. بس ده هايخليني اقوللك ان انا هاتكلم عن اننا بنبص للناس من منظور واحد، مثلا يعني حكمك عليه جه من خلال انك شفت كلامه في التليفزيون، لكن انت ما تعايشتش مع اي تطور هو عمله في منظومة التعليم.. وهو ده اللي انا هاتكلم عنه في مرة من المرات، ازاي تحكم على القيادات من منظور شامل

انا مش هدفي افتح البلوج
forum
ونرشح رئيس واخلي الناس تنتخبه، قد ما ان انا ادي الناس فرصه تفكر هي فعلا عايزة مين بناء على اسس واضحة ومعرفة كاملة بأي مرشح في الانتخابات

عشان كده كنت كاتبة ان محدش يتخانق على الآراء لكن طبعا في ديمقراطية والناس تعبر عن رأيها بس يكون له علاقة بالمقال مش بالابعاد السياسية وعلاقتها بأشخاص معيني دون غيرهم

وطبعا كلامك وكلام كل الناس على راسي من فوق :)