Wednesday, January 13, 2010

رحلتي مع البطاقة الانتخابية

قررت السنة دي ان لازم يكون معايا البطاقة الانتخابية بغض النظر عن الاقاويل اللي بتقول وهاتفرق في ايه وهانغير ايه

لأن انا ليا مبدأ ان انا مش باعرف امشي مع القطيع - بمعنى، ان لو عندي رأي مش هاعرف اسكت، ولو في اختيارات لحاجه مش بحب حد يختار لي -- م الآخر بحب أكون ايجابية

المهم، استجمعت شجاعتي ورحت القسم والحمد لله انه مطلعش زي مصلحة المرور اللي ليا فيها مغامرات بالساعات

وطبعا انا عارفه ان الناس هاتقوللي بنت وتروح القسم لواحدها؟!؟ انا فكرت برضه، بس الناس مبيعضوش هناك في الاقسام، واكيد اي حد ف يوم م الايام مسيره يخلص أوراق م القسم

المهم انا رحت لواحدي فعلاً - من غير توصية من بابا ولا من عمو - والدنيا كانت فاضية وسهلة وما اخدتش اكتر من 10 دقايق.. الناس هناك كانت ذوق ومتعاونة - بغض النظر عن الراجل اللي ع الباب اللي قاللي : رايحة فين يا مدااااااااام

ما علينا

انا مليت طلب قيد بجداول الانتخاب وصورت البطاقة - فقط لا غير - الحمد لله مكنش فيه ولا دمغات ولا يحزنون
والطلب يعني هما كلمتين اسم وعنوان مفيش كلام كتير .. وبيتمضي امضاء واحد بس من نائب المأمور
واستلام البطاقة نفسها في ابريل

يعني الي حد ما اثبتت لنفسي ان الواحد لسه في اوراق ممكن يخلصها من غير واسطة او قهوة للموظف


اللي انا عايزة اقوله.. ان اي حاجه الواحد قبل ما يعملها بتلاقي ميت واحد يقول لك: وايه لازمته، هو انت لسه هاتروح وتيجي، ده انت هاتتبهدل، دي الاماكن دي مش عارف ايه

نهايته: متاخدش موقف من حاجه من غير ما تجربها .. احنا بنعيش عشان نجرب
ولو انت فعلاً عايز تعمل حاجه متخليش كلام اي حد يمنعك طول ما انت شايف ان الحاجه دي صح ومن حقك

من حقنا كلنا ننتخب، وان يكون لينا رأي وصوت وكيان
من حقنا نبقى ايجابيين وياريت نبقى ايجابيين

وفي النهاية.. احب اقول لكم ان انا كنت ماشية على جنب متحفّظة شويه جوا القسم.. مش لأي حاجه اكتر من انه مليان قطط - قطط بحق وحقيقي مش بألس - يظهر بيخشوا يتدفوا جوا ويتكاثروا ..الي اخره.. كل ما اطلع من باب الاقي قطة واقفة مستنياني على جنب..وطبعاً يمكن عارفين انا علاقتي حلوة ازاي مع القطط والحيوانات
هاهاهاهاها
:D

بس انا مبسوطة اني اخدت الخطوة دي
عقبال ما استلم البطاقة
:D
وعقبال ما يعملوا قاعدة بيانات موزعة على شبكات كمبيوتر ويسهلوا علينا الدنيا ويبقى الانتخاب عمليه اسهل من كده
بس برضه مادام الدنيا سهلة ومش بتاخد وقت كتير.. متخليش حاجه توقفك

No comments: